Hechos 26 - Quiché Bible

Ri Pawl xuto' rib chuwäch ri ajawinel Agrip

¹ Ri Agrip xubij che ri Pawl: “Cuya' catch'awic rech cato' awib.” C'äte ri' xuyac ri u k'ab ri Pawl, xuchaplej u to'ic rib:

² “Nim ajawinel Agrip, camic quinquicotic chi quincuinic quinch'awic che u to'ic wib chwäch la, che ronojel ri quinquitzujuj wi ri aj judeyib.

³ Are' wa' quinbij rumal rech chi eta'm la ronojel ri qui nak'atisabal xukuje' ri qui chomanic ri aj judeyib. Rumal c'u ri' quintz'onoj che la chi quintatabej la, ruc' coch'onic.”

Ri Pawl xutzijoj ri u c'aslemal nabe canok

⁴ “Ri nu c'aslemal kas pa ri wac'alal ri oc'owinak chic, kas pa ri utiquiritajic ulok chquixo'l ri e nu winakil pa Jerusalen.

⁵ Queta'm c'u wa', we cäcaj cäquik'alajisaj, chi in parisey ulok are c'u juk'at wa' ri sibalaj coc il che u nimaxic ri ka cojonic.

⁶ Are c'u ri camic in tac'al chwäch la rech cäk'at la tzij panuwi' rumal ri weyebal c'u'x ri nu yo'm chrij ri chi'nic ri xuban ri Dios chque ri ka mam.

⁷ Ri eye'm u rikic cumal ri cablajuj kamak'. Ri queboc wi il che u k'ijilaxic ri Dios chi pa k'ij chi chak'ab. Rumal c'u rech we eyebal c'uxaj ri' ri aj judeyib in qui tzujum chwäch la, ajawinel Agrip.

⁸ ¿Jasche man cacoj ta alak chi ri Dios quebuc'astajisaj cäminakib?”

Ri Pawl cutzijoj ri c'ax ri xuban chque ri cojonelab

⁹ “Ri in xinchomaj canok chi rajawaxic quinban q'ui tak jastak che u c'ulelaxic ri u bi' ri Jesus aj Nazaret.

¹⁰ Je xinban pa Jerusalen. Yo'm c'u takanic pa nu k'ab cumal ri e c'amal qui be ri e cojol tabal tok'ob, xebentz'apij pa tak che' e q'ui chque ri cojonelab. Aretak c'u xecämisaxic, in jun xinya' nu tzij che qui cämisaxic.

¹¹ Q'ui mul xinc'äjisaj qui wäch pa tak ri ja ri cäquitijoj wi quib ri aj judeyib che ri pixab. Xincoj chuk'ab chque che u k'ilic quib che ri qui cojonic. Sibalaj xpe woyowal chquij, c'ä xinoc pa tak ri tinimit ri man e aj kuc' taj che qui c'axc'obisaxic.”

Jumul chic ri Pawl xubij jas xubano xcojon che ri Jesucrist

¹² “Che c'u wa' in benak wi pa Damasc, ri in takom bic, xukuje' yo'm takanic pa nu k'ab cumal ri e c'amal be ri e cojol tabal tok'ob.

¹³ Pa ri be c'ut, nim ajawinel, pa niq'uiaj k'ij xinwil jun sakil chicaj, ri sibalaj xjuluw na chuwäch ri k'ij. Xjuluw chkij cuc' ri e benak wuc'.

¹⁴ Xujtzak konojel pa ulew. Xinta' jun ch'abal ri xubij chwe pa ri ch'abal hebrey: ‘Sawl, Sawl, ¿jasche cäban c'ax chwe? C'ax cärik che ri yak'anic cho ri ch'ipibal.’

¹⁵ Xinbij: ‘¿Jachin ri' ri lal, Ajawaxel?’ Ri Ajawaxel xubij chwe: ‘In ri' ri Jesus ri caban c'ax chwe.

¹⁶ Chatwalij ba', chattac'alok. Nu c'utum c'u wib chawäch, che a cojic che pataninel xukuje' che k'alajisal quech ri jastak ri e awilom xukuje' ri jastak ri quinc'ut wi na wib chawäch.

¹⁷ Catinwesaj na pa qui k'ab ri a winakil xukuje' pa ri qui k'ab ri man aj judeyib taj, cuc' c'u wa' catintak wi na bic,

¹⁸ rech quebajak ri qui bak'wäch; rech quebel pa ri k'ek'um, quek'ax pa ri sakil; rech quebel chuxe' ri u cuinem ri Satanas, quek'ax ruc' ri Dios; rech cäquic'am jun quechbal cuc' ri banom tastalic tak winak chque rumal cojonic chwe in.’ ”

Ri Pawl xunimaj ri xbix che pa ri c'utwächinic

¹⁹ “Rumal ri', nim ajawinel Agrip, man xinux ta ma ta nimanel che ri aj chicajalaj c'utwächinic.

²⁰ Xane' nabe xinya' u tzijoxic chque ri e c'o pa Damasc, xukuje' pa Jerusalen, xukuje' pa tak ri tinimit re Judey, xukuje' chque ri man aj judeyib taj. Xinbij chque chi chquiq'uexa' qui c'u'x, chchetzelej ruc' ri Dios. Xinbij chque chi aretak cäquiq'uex qui c'u'x, chquibana' utzalaj tak chac ri takal che ri q'uexoj c'uxaj.

²¹ Rumal rech wa', xinquichap ri aj judeyib pa ri rachoch Dios, xquitzucuj nu cämisaxic.

²² Ri Dios in u to'm ulok c'ä pa we k'ij ri'. Quink'alajisaj c'u ri u tzij chquiwäch conojel ri winak, chi nimak qui banic chi man nimak ta qui banic. Man c'o ta nu tzijom ri ma ta je qui tzijom ri e k'axal tak tzij xukuje' ri xubij can ri Moises chi cäbantaj na.

²³ Ri e are' qui bim ulok chi ri Crist curik na c'ax, chi are' ri nabe cäc'astaj na chquixo'l ri cäminakib, cuya' c'u na u bixic che ri tinimit Israel xukuje' chque ri man aj judeyib taj chi c'o jun chäj rech colobal ib.”

Ri Pawl cäraj chi ri Agrip cäcojon che ri Crist

²⁴ Aretak ri Pawl cätajin cubij we jastak ri' che u to'ic rib, ri Pest co xch'awic, xubij: “¡At ch'ujirinak, Pawl! Ri nimalaj awetamanic at ch'ujarisaninak.”

²⁵ Ri Pawl xubij che: “Pest ri sibalaj nim k'ij la, man in ch'ujirinak taj, xane quinbij ri kastzij, quinbij utzalaj chomanic.

²⁶ Ri ajawinel Agrip cuch'ob we jastak ri'. Man quinxe'j ta wib che u bixic ronojel wa' chuwäch. In weta'm chi man c'o ta jun chque we jastak ri' ri e c'u'tal ta chuwäch. Man xbantaj ta c'u wa' pa jun c'olbal c'u'talic.

²⁷ Ajawinel Agrip, ¿la cacoj la ri qui tijonic ri k'axal tak tzij? In weta'm chi cacoj la.”

²⁸ Xubij c'u ri Agrip che ri Pawl: “Xa' jubik' man catcuin che nu ch'äquic chi quinux ajcrist.”

²⁹ Ri Pawl xubij che: “Quintz'onoj ri' che ri Dios chi we xa' cumal quieb oxib tzij o cumal q'ui tzij, man xuwi ta ri lal, xane' xukuje' conojel ri cäquitatabej ri nu tzij camic, quebux ta ne je jas ri in, ma ta c'u e c'o we tikom tak ch'ich' ri' chque.”

³⁰ Xwalij c'u ri ajawinel xukuje' ri k'atal tzij, are jun ri Berenis xukuje' conojel ri e t'uyut'uj cuc'.

³¹ Aretak xebel apanok, xquitzijobela' quib. Xquibij: “Man c'o ta jun jasach u banom we achi ri' rech takal che chi cäcämisaxic o cäcoj pa che'.”

³² Ri Agrip xubij che ri Pest: “Cuya' cätzokopix we achi ri', we ta ma ta u tz'onom chi cätak bic chuwäch ri Sesar.”