Hechos 25 - Quiché Bible

Ri Pawl chuwäch ri k'atal tzij Pest

¹ Xopan c'ut ri Pest che u c'amic ri rekle'n che k'atal tzij, churox c'u k'ij xel bic pa Sesarey, xbe pa Jerusalen.

² Xek'alajisan ri c'amal qui be ri e cojol tabal tok'ob xukuje' ri qui nimakil ri aj judeyib chrij ri Pawl.

³ Xquitz'onoj jun tok'ob che chrij ri Pawl, chi chuya' takanic chi chc'am ulok ri Pawl chelyok pa Jerusalen. Ri e are' c'ut qui banom jun chomanic chrij chi quequeyej na pa ri be che u cämisaxic.

⁴ Are c'u ri Pest xubij chi ri Pawl chajin pa Sesarey, cäbe c'u ri are' chila' chanim.

⁵ Xubij c'u chque: “Rumal c'u ri', ri e i k'atal tak tzij, junam chekaj bic wuc' pa Sesarey. We c'o jun itzelalaj jasach chrij we achi ri', cuya' cäquitzujuj.”

⁶ Cäraj xa' wajxakib o lajuj k'ij xbeytaj ri Pest chquixo'l, xkaj bic pa Sesarey. Chucab k'ij xt'uyi' pa ri k'atbal tzij, xtakan che u c'amic ri Pawl.

⁷ Aretak xpetic ri Pawl, xsutix rij cumal ri aj judeyib ri e petinak pa Jerusalen. E q'ui ri itzelalaj tak mac xquiya' chrij. Man quecuin ta c'ut cäquic'utu chi kastzij jas ri cäquibij.

⁸ Are c'u ri Pawl xuto' rib, xubij: “Man c'o ta mac nu banom chrij ri qui pixab ri aj judeyib, mawi chrij ri rachoch Dios, mawi chrij ri nimalaj k'atal tzij Sesar aj rom.”

⁹ Ri Pest are xraj chi utz quil wi cumal ri aj judeyib, xubij che ri Pawl: “¿La cawaj catbe pa Jerusalen, rech chila' cäk'at wi tzij pawi' chquij we jastak ri' chnuwäch?”

¹⁰ Ri Pawl xubij: “Chuwäch ri u k'atbal tzij ri Sesar in tac'al wi, ri rajawaxic wi cäk'at wi tzij panuwi'. Man c'o ta etzelal nu banom chquij ri aj judeyib, jacha' ri kas eta'm la.

¹¹ We ta c'u c'o etzelal nu banom, o we ta nu banom jun jasach rech takal chwe chi quincämisaxic, man quinwesaj ta wib pa ri cämical; we c'u man kastzij ri quinquitzujuj wi, man c'o ta jun cäcuin ta che nu jachic pa qui k'ab. Quintz'onoj chi quintak la bic chuwäch ri nimalaj k'atal tzij Sesar.”

¹² Ri Pest xquiban chomanic cuc' ri e ya'l tak u no'j. C'äte ri' xubij che ri Pawl: “Xatz'onoj ya' chi catintak bic chuwäch ri Sesar. Chuwäch c'u ri Sesar catbe wi na.”

Ri Pawl c'o chuwäch ri ajawinel Agrip

¹³ E oc'owinak chi quieb oxib k'ij, ri ajawinel Agrip xopan pa Sesarey rachil ri Berenis, che u ya'ic rutzil u wäch ri Pest.

¹⁴ Xebeytaj q'uia k'ij chila'. Ri Pest xutzijoj che ri ajawinel ri cäk'abax chrij ri Pawl, xubij: “Are jun achi yo'm can pa che' rumal ri Pelics.

¹⁵ Aretak c'u xinbe pa Jerusalen, ri e c'amal qui be ri e cojol tabal tok'ob xukuje' ri e qui nimak tak tatayib ri aj judeyib xek'alajisan chrij wa' chnuwäch, xquitz'onoj chi quinc'okoj.

¹⁶ Xinbij chque chi man e nak'atal ta ri aj romab cäquijach jun winak pa cämisaxic, we c'ä maja' cätaq'ui' chquiwäch ri e tzujul tak rech, rech cuya' cuto' rib che ri cäquitzujuj wi.

¹⁷ Je c'u ri', aretak xepe ri e are' waral, man xinbeytaj taj. Chucab k'ij xint'uyi' pa ri cäk'at wi tzij, xintakan che u c'amic ri achi.

¹⁸ Are c'u ri xelquitac'aba' quib che u tzujuxic, man c'o ta c'u jun itzelalaj mac xquitzujuj ta wi jas ri nu chomam.

¹⁹ Xane' ri xquiya' chrij ri achi, are jastak chrij ri qui cojonic, xukuje' chrij jun Jesus cäminak chic, ri cubij ri Pawl chi c'aslic.

²⁰ Xsach nu c'u'x chrij we chomanic ri'. Xinta' che we cäraj cäbe pa Jerusalen, rech cäk'at tzij puwi' chila' chquij we jastak ri'.

²¹ Xutz'onoj c'u ri Pawl chi cak'at na tzij puwi' rumal ri August Sesar. Rumal ri' xintakan che u chajixic c'ä quintak na bic ruc' ri Sesar.”

²² Ri Agrip xubij che ri Pest: “In xukuje' quinwaj quintatabej we achi ri'.” Ri Pest xubij che: “Chwek catatabej na la.”

²³ Chucab k'ij xpe ri Agrip rachil ri Berenis ruc' sibalaj nimal. Xeboc bic pa ri k'atbal tzij, e cachil ri qui nimakil ri ajch'ojab xukuje' ri achijab ri nimak qui banic pa ri tinimit. Xtakan ri Pest che u c'amic ulok ri Pawl, xc'am c'u ulok.

²⁴ Xubij c'ut ri Pest: “Ajawinel Agrip, xukuje' conojel ri achijab ri quimulin quib kuc', c'o we achi ri' chwäch alak, conojel c'u ri aj judeyib pa Jerusalen, xukuje' waral, xquirak qui chi' chi man ya'tal ta che chi cäc'asi'c.

²⁵ Are c'u ri in xinwetamaj chi man c'o ta jun jasach u banom rech takal ta che chi cäcämisaxic. Ri are' c'ut xutz'onoj chwe chi quintak bic chuwäch ri nimalaj k'atal tzij August Sesar. Nu chomam c'u u takic bic.

²⁶ Chrij ri are' man c'o ta jun mac ri k'alaj ri quintz'ibaj ta bic che ri wajaw ri k'atal tzij, rumal ri' xinc'am ulok chwäch alak, kas c'u are na chwäch la, nim ajawinel Agrip, rech cäc'ot alak u chi', te c'u ri' c'o quintz'ibaj bic chrij.

²⁷ In c'ut quinwilo chi man utz ta u takic bic jun ajpache', we man cäbix bic ri mac ri catzujux wi.”