Hechos 24 - Quiché Bible

Ri Pawl cuto' rib chuwäch ri Pelics pa Sesarey

¹ E oc'owinak chi job k'ij, xkaj bic ri Ananiy ri qui nimal ri e cojol tabal tok'ob cachil jujun chque ri e nimak tak tatayib que ri aj judeyib xukuje' jun cojol tzij, Tertul u bi', xebopan c'u wa' che u tzujuxic ri Pawl chuwäch ri k'atal tzij.

² Aretak xsiq'uix ri Pawl, ri Tertul xuchaplej u tzujuxic, xubij che ri k'atal tzij, ri Pelics: “Rumal ech la, uj konojel uj c'o pa jamaril; e banom c'u q'ui suc'umanic chupam we nim tinimit ri' rumal ri no'j la.

³ Ronojel ri banom la kac'amom pa ronojel c'olbal, Pelics, sibalaj nim k'ij la. Cäkamaltioxij wa' che la.

⁴ Rech c'u man quinya' ta latz' che la, quintz'onoj che la chi catatabej la quieb oxib ka tzij.

⁵ Karikom chi we achi ri' are' jun ya'l latz'. Cuyac ch'o'j chquixo'l ri aj judeyib xukuje' pa ronojel ri uwächulew. Are' ri c'amal qui be ri juk'at aj nazarenib.

^6-7 Xukuje' xutzucuj u tz'iloxic ri rachoch Dios, rumal wa' xkachapo.

⁸ Ri lal, aretak cäc'ot la u chi', cäcuin c'u la quetamaj na la conojel we jastak ri' ri cäkabij chrij.”

⁹ Xukuje' ri aj judeyib xquiya' qui tzij ruc' ri Tertul, xquibij chi kastzij ronojel wa'.

¹⁰ Ri k'atal tzij xuban etal che ri Pawl chi cuya' cäch'awic. Ri Pawl xch'awic, xubij: “Quinch'obo chi q'ui junab chic c'o la che k'atal tzij puwi' we nim tinimit ri'. Rumal ri' ruc' ronojel quicotemal quinto' wib chwäch la.

¹¹ Lal c'ut cuya' quetamaj la chi c'äte cablajuj k'ij ri' xinbe che u k'ijilaxic ri Dios pa Jerusalen.

¹² Man xinquirik taj chi quinban chomanic ruc' jachin jun, o chi quebenmulij q'ui winak. Man xinquirik taj chi je ta wa' quinban pa ri rachoch Dios mawi pa tak ri ja ri cäquitijoj wi quib ri aj judeyib che ri pixab, mawi pa ri tinimit.

¹³ Man quecuin taj cäquic'ut chwäch la chi kastzij we jastak ri' ri quinquitzujuj wi.

¹⁴ Are c'u wa' quink'alajisaj chwäch la, chi quinpatanij ri qui Dios ri nu mam je jas ri u banic we C'ac' Be ri', ri cäquibij juk'at che. Quincoj ronojel ri tz'ibam pa ri pixab xukuje' pa ri qui wuj ri e k'axal tak tzij.

¹⁵ C'o c'u weyebal c'u'x chrij ri Dios jacha' xukuje' ri e are' chi quec'astaj na ri cäminakib, chi e utz chi e lawalo.

¹⁶ Rumal c'u ri', quinoc il amak'el chi cac'oji' jun ch'ajch'ojalaj retamabal nu c'u'x chuwäch ri Dios xukuje' chquiwäch ri winak.

¹⁷ E oc'owinak chi c'u q'ui junab, xinopan pa ri nu tinimit che u ya'ic cochinic xukuje' tak sipanic.

¹⁸ Cätajin quinban wa', nu josk'im chi wib, aretak xepe jujun aj judeyib aj Asiy, xinquirik pa ri rachoch Dios. Man in c'o ta c'u cuc' q'ui' winak, man xebentuquij ta ri winak.

¹⁹ Rajawaxic c'ut chi e are' ta xepe wa' che nu tzujuxic chwäch la, we c'o ri caquina' chwij.

²⁰ We man jeri', chquibij ba we achijab ri' jas jun jasach xquirik chwij ri man suc' taj, aretak xintaq'ui' chquiwäch ri comon re ri qui nimakil ri aj judeyib.

²¹ We ne c'o jas cäquirik chwij rumal we jun tzij ri', ri co xinbij aretak in tac'al chquiwäch: ‘Cäk'at tzij panuwi' camic umal alak, rumal rech chi quinbij chi quec'astaj ri cäminakib.’ ”

²² Aretak ri Pelics xuta' wa', ri reta'm chic ri C'ac' Be, xuya' na can ri u chomaxic che jun k'ij chic, xubij chque: “Aretak cäkaj ulok ri Lis ri qui nimal ri jun mil ajch'ojab, kas quinwetamaj na jas ri c'o chixo'l.”

²³ Xutak ri qui nimal ri jun sient ajch'ojab chi cächajix ri Pawl, mäban c'ax che. Xtakanic chi we quepe ri e rachil che u patanixic, mek'atixic chpatanix cumal.

²⁴ E oc'owinak chi quieb oxib k'ij, xopan chi jumul ri Pelics rachil ri Drusil ri rixokil, are chuchu' aj judey. Ri Pelics xutak u siq'uixic ri Pawl, xutatabej c'u wa ri cojonic che ri Jesucrist.

²⁵ Aretak c'u ri Pawl xutzijoj ri jun suc'alaj c'aslemal che, ri k'iloj ib xukuje' ri k'atan tzij ri cäpe na. Ri Pelics xuxe'j rib, xubij che: “Xak je na la', cuya' catbec. Aretak c'ut cäbantaj wumal, quintakan chi na che a siq'uixic.”

²⁶ Are c'u ri cäraj ri Pelics chi cäya' puak che rumal ri Pawl, rech cutzokopij bic. Rumal c'u ri', xak amak'el cusiq'uij, cätzijon ruc'.

²⁷ E oc'owinak chi quieb junab, ri Porsiy Pest xoc can che u q'uexel ri Pelics. Are c'u ri Pelics xraj chi utz quil wi cumal ri aj judeyib. Rumal ri' xuya' can ri Pawl pa che'.