Hechos 23 - Quiché Bible

Ri Pawl utz u banom chuwäch ri Dios

¹ Ri Pawl co xca'y chque ri comon re ri qui nimakil ri aj judeyib, xubij chque: “Wachalal, in in bininak ruc' jun utzalaj retamabal nu c'u'x chuwäch ri Dios c'ä pa we k'ij ri'.”

² Are c'u ri qui nimal ri e cojol tabal tok'ob, Ananiy u bi', xebutak ri e tac'atoj chuwäch che u ch'ayic ri Pawl pa u chi'.

³ Xubij c'u ri Pawl che: “Catuch'ay na ri Dios, at tapia chunam awij. At t'uyul che u k'atic tzij panuwi' jas cubij ri pixab. ¿Jas c'u che cattakan che nu ch'ayic man je ta c'u wa' ri cubij ri pixab?”

⁴ Xquibij ri e tac'atoj chila': “¿La cayok' ri qui nimal ri cojol tabal tok'ob re ri Dios?”

⁵ Xubij ri Pawl: “Man weta'm taj, wachalal, chi are' qui nimal ri cojol tabal tok'ob. Tz'ibatal c'ut: Mac'okoj ri c'o u takanic puwi' ri a tinimit.”

⁶ Cuch'ob ri Pawl chi ri niq'uiaj winak e saduseyib, ri niq'uiaj chic e pariseyib. Xch'aw c'u ruc' chuk'ab chquiwäch ri comon re ri qui nimakil ri aj judeyib, xubij: “Wachalal, in parisey, in u c'ojol jun parisey. Cäk'at c'u tzij panuwi' rumal rech chi cu'l nu c'u'x chi quec'astaj na ri cäminakib.”

⁷ Aretak xbitaj wa' rumal, ri pariseyib xukuje' ri saduseyib xquichaplej u c'ulelaxic quib. Quieb c'u xquiban ri winak.

⁸ Are c'u ri saduseyib cäquibij chi ri cäminakib man quec'astaj taj. Cäquibij chi man e c'o ta tako'n aj caj, man e c'o ta uxlabalib. Are c'u ri pariseyib cäquibij chi e c'o tako'n aj caj xukuje' uxlabalib, xukuje' chi quec'astaj ri cäminakib.

⁹ Conojel xquirak qui chi'. Xetaq'ui' c'u jujun ajtijab re ri pixab chquixo'l ri pariseyib, xquibij: “Man c'o ta jun itzelalaj jasach cäkarik chrij we achi ri'; we ne xch'abex rumal jun uxlabal o rumal jun tako'n aj caj.”

¹⁰ Xnimataj c'u ri c'ulelam ib chquixo'l ri achijab, xuxe'j c'u rib ri qui nimal ri jun mil ajch'ojab, we ne cäch'akatix ri Pawl cumal ri achijab. Xtakanic chi quekaj ulok ajch'ojab, rech cäquesaj bic ri Pawl chquixo'l ri winak, cäquic'am bic pa ri cachoch ri ajch'ojab.

¹¹ Chucab ak'ab xtaq'ui' ri Ajawaxel chuxcut ri Pawl, xubij che: “Chajiquiba' a c'u'x, Pawl. Jas ri xaban pa Jerusalen xinak'alajisaj chquiwäch ri winak, jeri' rajawaxic xukuje' chi quinak'alajisaj na pa Rom.”

Jujun achijab xquiban chomanic che u cämisaxic ri Pawl

¹² Aretak xsakaric, jujun chque ri aj judeyib xquimulij quib. Xequiban ri chi'nic ri kas cäban na chuxe' c'okonic. Xquibij chi man quewa' ta na mawi quebuq'uian na c'ä cäquicämisaj na ri Pawl.

¹³ E c'o na chuwäch cawinak achijab ri xquiban we chomanic ri'.

¹⁴ Ri e are' xebopan cuc' ri e c'amal qui be ri e cojol tabal tok'ob xukuje' ri e qui nimak tak tatayib ri aj judeyib, xquibij: “Ri uj ka banom ri chi'nic ri kas cäban na chuxe' c'okonic chi man c'o ta jas cäkatij na, c'ä cäkacämisaj na ri Pawl.

¹⁵ Camic c'ut, ri ix xukuje' ri comon re ri qui nimakil ri aj judeyib chibij che ri qui nimal ri ajch'ojab chi chwek chc'am ulok ri Pawl chiwäch quiban iwib chi are quiwaj chi c'o ri kas quiwetamaj chrij; ka suc'umam chi c'u kib uj che u cämisaxic c'ä majok chopanok.”

¹⁶ Jun ral ala ri rana'b ri Pawl xuto chi ri achijab queyem ri Pawl. Xbec, xoc bic chupam ri cachoch ri ajch'ojab, xuya' u bixic che ri Pawl.

¹⁷ Ri Pawl c'ut xusiq'uij jun chque ri qui nimakil ri jun sient ajch'ojab, xubij che: “C'ama' la bic we ala ri' chuwäch ri qui nimal ri jun mil ajch'ojab. C'o jas cutzijoj na che.”

¹⁸ Xuc'am c'ut, xuc'am bic chuwäch ri qui nimal ri jun mil ajch'ojab, xubij che: “Ri Pawl ri c'o pa che' xinusiq'uij, xuta' tok'ob chwe chi quinc'am ulok we ala ri' chwäch la. C'o jas ri cutzijoj na che la.”

¹⁹ Ri qui nimal ri ajch'ojab xuchap ri ala che ri u k'ab, xresaj apan pa u tuquiel wi, xuta' che: “¿Jas ri catzijoj na chwe?”

²⁰ Ri ala xubij che: “Ri aj judeyib xquichomaj jun jasach ri cäquiban na: cäquita' na che la jun tok'ob chi chwek cac'am bic ri Pawl chquiwäch ri comon re ri qui nimakil ri aj judeyib, je ta ne cäquetamaj na jas ri kastzij ri u banom.

²¹ Macoj c'u la jas ri cäquibij, rumal rech chi e c'o na chquiwäch cawinak (40) cachijab queyem quic'u'm quib, qui banom ri chi'nic ri kas cäban na chuxe' c'okonic chi man quewa' ta na mawi quebuq'uian na, we man nabe cäquicämisaj na ri Pawl. Camic c'ut e c'o chic, cäqueyej chi caya' la tzij la che wa'.”

²² Ri qui nimal ri jun mil ajch'ojab xujach bic ri ala, xubij che: “Matzijoj che jachin jun chi xabij wa' chwe.”

Xtak bic ri Pawl chuwäch ri k'atal tzij Pelics

²³ Xebusiq'uij c'u quieb qui nimakil tak ri jun sient (100) ajch'ojab xubij chque: “Cocak'ab pa ri ubelej jok'otaj chebisuc'umaj apan quieb sient (200) ajch'ojab xukuje' oxc'al lajuj (70) achijab ri quebe chquij quiej xukuje' quieb sient (200) ajch'ojab ri cäcuc'aj ri qui ch'ich', rech quebe c'ä pa Sesarey.

²⁴ Xtakan c'u ne che qui suc'umaxic quiej rech caquiejen bic ri Pawl, xukuje' xuya' takanic chi utz u wäch cäc'am bic ma ta c'o cuc'ulmaj copan chuwäch ri k'atal tzij Pelics.”

²⁵ Xutz'ibaj bic jun wuj, jewa' cubij ri wuj:

²⁶ “In Clawd Lis quintz'ibaj jun wuj che ri k'atal tzij Pelics ri sibalaj nim u k'ij. Quinya' rutzil wäch la.

²⁷ We achi ri' xchap cumal ri aj judeyib, raj cäquicämisaj. Are c'u ri in xinbe chquij cuc' ajch'ojab, xinwesaj chquiwäch, aretak xinwetamaj chi are aj rom.

²⁸ Xwaj xinwetamaj jas ri mac cäquicoj chrij. Xinc'am c'u bic chquiwäch ri comon re ri qui nimakil ri cäquik'at tzij aj judeyib.

²⁹ Xinwetamaj c'ut chi ri mac ri cäquicoj chrij are jastak rech ri qui pixab. Man ya'tal ta c'u u cämisaxic mawi ne u cojic pa che'.

³⁰ Xk'alajisax c'u chnuwäch chi ri aj judeyib queyem we achi ri' che u banic c'ax che, xintak c'u bic uc' la; xukuje' xinbij chque ri quetzujunic chi chequik'alajisaj chwäch la jas ri caquitzujuj wi.”

³¹ Ri ajch'ojab jas ri u cholajil ri takanic ri yo'm chque, chak'ab xquic'am bic ri Pawl pa Antipatris.

³² Chucab k'ij ri ajch'ojab xequiya' can ri ajquiejab chi cäquic'am bic ri Pawl cuc', xetzelej c'u ulok pa ri cachoch ri ajch'ojab.

³³ Ri ajquiejab xebopan pa Sesarey, xeboc bic. Xquiya' ri wuj che ri k'atal tzij, xquitac'aba' c'u ri Pawl chuwäch.

³⁴ Ri k'atal tzij xusiq'uij ri wuj, xuta' che jachique tinimit cäpe wi. Aretak xuto chi aj Silisiy,

³⁵ xubij che: “Catintatabej na aretak quepe ri tzujul awech. Xtakanic chi cachajix chupam ri rachoch ri Herod.”