Hechos 21 - Quiché Bible

Ri u binem ri Pawl c'ä pa Jerusalen

¹ Aretak xekaya' can ri kachalal, xujbe puwi' ri plo, suc' xujbe pa Cos. Chucab k'ij xujbe pa Rods. C'äte ri' xujbe pa Patr.

² Pa Patr xkarik wi jun nim jucub k'axem re pa Penis. Xujoc chupam, xujuc'am bic.

³ Aretak xkil apan ri Chipr, xkaya' can pa ka mox k'ab, xujbe puwi' ri plo, xujbe pa Siriy, xujopan pa Tir. Chila' c'ut cäkasax wi na can reka'n ri nim jucub.

⁴ Xujc'oji' wukub k'ij chila', xekarik ri cojonelab. Ri e are' xquibij che ri Pawl rumal ri Uxlabaxel chi mäbe pa Jerusalen.

⁵ E oc'owinak chi c'u ri wukub k'ij ri', xujel bic. Uj achilam cumal conojel ri cojonelab cuc' ri quixokil xukuje' ri calc'ual, c'ä tza'm ja. Xujxuqui' chuchi' ri plo, xkaban ch'awem ruc' Dios.

⁶ Xkach'abela' c'u can kib, c'äte ri' xujoc bic pa ri nim jucub. Ri e are' xetzelej can cho tak cachoch.

⁷ Xujel c'u ulok pa Tir. Aretak xkaban ri ka binem puwi' ri plo, xujopan pa Tolemaid. Xkaya' rutzil qui wäch ri kachalal, xujc'oji' jun k'ij cuc'.

⁸ Chucab k'ij xujel bic, xujopan pa Sesarey. Xujoc pa ri rachoch ri Pelip, ri tzijol ri utzalaj tzij re colobal ib chque ri winak. Are' jun chque ri wukub pataninelab que ri takomxenlab. Xujcanaj c'u can ruc'.

⁹ Ri Pelip e c'o quiejeb u mia'l k'apojib. Ri e are' e k'axal tak tzij.

¹⁰ Xujc'oji' na quieb oxib k'ij. Xkaj c'u ulok pa Judey jun k'axal tzij chila', Agab u bi'.

¹¹ Xopan c'u kuc', xresaj ri u pas ri Pawl, xebuyut ri rakan u k'ab chbil rib, xubij: “Je cubij wa' ri Ruxlabal ri Dios: ‘Je cäquiban na wa' ri aj judeyib pa Jerusalen che ri achi ri ajchak'e we pas ri', cäquiyut na, cäquijach c'u na pa qui k'ab ri man aj judeyib taj.’ ”

¹² Aretak xkata' wa', ri uj xukuje' ri e aj Sesarey xkabochi'j ri Pawl chi man cäbe ta pa Jerusalen.

¹³ Ri Pawl xutzelej u bixic: “¿Jasche quixok'ic quiya' bis che ri wanima'? Utz chwe in man xuwi ta quinyutic, xane' xukuje' chi quincämisax pa Jerusalen, rumal rech ri u bi' ri Ajawaxel Jesus.”

¹⁴ Man c'u xujcuin ta che u ch'äquic, xak xkaya' be che, xkabij: “Are chban ri u rayibal ri Ajawaxel.”

¹⁵ Oc'owinak chi wa', xkasuc'umaj kib, xujbe pa Jerusalen.

¹⁶ Xujcachilaj c'u bic jujun cojonelab aj Sesarey. C'o jun aj Chipr cuc', Mänason u bi', are ojer cojonel are' c'u cäyo'w na kokxanibal.

Ri Pawl xusolij ri Santiag

¹⁷ Aretak xujopan pa Jerusalen, ri kachalal xujquic'ulaj ruc' quicotemal.

¹⁸ Chucab k'ij chic xbe ri Pawl kuc', xujbe' c'u chuch'abexic ri Santiag. Conojel c'ut tak ri tatayib ri quetakan ri comon cojonelab e c'o chila'.

¹⁹ Aretak u yo'm chi rutzil qui wäch, ri Pawl xutzijoj ronojel chque, jas ri u banom ri Dios chquixo'l ri man aj judeyib taj rumal ri chac ri u banom.

²⁰ Aretak xquito, xquinimarisaj u k'ij ri Dios. Xquibij che ri Pawl: “Cawilo, kachalal, joropa' mil aj judeyib e cojoninak. Conojel c'ut cäquibij chi rajawaxic u nimaxic ri u pixab ri Moises.

²¹ Ri e are' qui tom u tzijol chi quebatijoj ri aj judeyib ri e c'o chquixo'l ri man aj judeyib taj che u tasic quib chrij ri u pixab ri Moises, chi cabij chque chi man cäquicoj ta ri etal che u kopixic ri qui tz'umal ri qui wi' ri achijab wi ri calc'ual, xukuje' chi mequitakej qui banic tak ri e ka nak'atisabal.

²² ¿Jas c'u lo ri caban camic? Kastzij ri winak cäquita' na chi at ulinak.

²³ Chabana' ba wa' ri cäkabij chawe: E c'o quiejeb achijab chkaxo'l, ri caquitz'akatisaj na jun chi'nic.

²⁴ Chebac'ama' bic awuc', chijosk'ij iwib cuc', chaya' c'u ri qui rajil rech cäsocax ri qui wi'. Jeri' conojel cäquetamaj na chi man kastzij taj ri cätzijox chawij, xane' chi xukuje' ri at canimaj ri pixab.

²⁵ Uj tz'ibaninak c'u bic chque ri man aj judeyib taj ri e cojoninak, chi man cuya' taj cäquitij ri ti'j ri pilom che tabal tok'ob chquiwäch ri e diosib, mawi quic', mawi qui ti'jal awaj ri e jitz'am, xukuje' chi man cäquiban ta ri macunic cuc' achijab ixokib.”

Ri winak xquichap ri Pawl pa ri Rachoch Dios

²⁶ Ri Pawl xebuc'am c'u bic ri quiejeb achijab. Chucab chi c'u k'ij xquijosk'ij quib. Xeboc c'ut pa ri rachoch Dios che u bixic jampa' quetz'akat ri k'ij re ri qui josk'ixic, aretak cäquiya' na ri sipanic cho ri Dios chquijujunal.

²⁷ Aretak xa' c'ol man quetz'akat ri wukub k'ij, xepe jujun aj judeyib aj Asiy. Aretak xquil ri Pawl pa ri rachoch Dios, xequituquij conojel ri winak, xquichap ri Pawl.

²⁸ Xquirak qui chi': “¡Achijab aj israelib, chujito'! Are achi wa' ri benak pa ronojel ri uwächulew, quebutijoj conojel ri winak che u yok'ic ri ka tinimit, ri pixab xukuje' we c'olbal ri'. C'ä xebucoj ne ulok jujun aj Gres pa ri rachoch Dios, u tz'ilom we tastalicalaj c'olbal ri'.”

²⁹ Quilom c'u can ri Tropim aj Epes ruc' ri Pawl pa ri tinimit; pa ri qui chomanic c'ut chi ri Pawl xucoj bic pa ri rachoch Dios.

³⁰ Ronojel c'u ri tinimit xutuquij rib. Xquimulij quib ri winak. Xquichap ri Pawl, xquicharchatej bic, xquesaj bic pa ri rachoch Dios. Chanim xquitz'apij ri u chi' ri rachoch Dios.

³¹ Cämisaxic c'u rij cumal, xya' c'u u bixic che ri qui nimal ri jun mil ajch'ojab, chi ronojel ri tinimit Jerusalen u tuquin rib.

³² Chanim c'ut xebuc'am bic ajch'ojab cuc' ri e qui nimakil. Aninak xebec, xebopan cuc' ri winak. Ri winak c'ut, aretak xequil ri qui nimal ri jun mil ajch'ojab, cuc' ri ajch'ojab, xquitanaba' u ch'ayic ri Pawl.

³³ Ri qui nimal ri ajch'ojab xopan ruc' ri Pawl, xuchapo, xtakan che u yutic cuc' quieb tikom ch'ich'. Xc'otow c'u chi'aj jachinok xukuje' jas ri xubano.

³⁴ Ri winak xquirak qui chi', jun wi ri xquibij ri niq'uiaj, jun chi wi xquibij ri niq'uiaj chic. Ri qui nimal ri ajch'ojab man xcuin ta che u ch'obic ri kas u banic, rumal rech ri wululem. Rumal ri' xtakan che u c'amic bic ri Pawl pa ri cachoch ri ajch'ojab.

³⁵ Aretak xebopan cho tak ri u ware ri k'am, ri Pawl xtelex bic cumal ri ajch'ojab, rumal rech chi ri winak are cäcaj cäquiban c'ax che.

³⁶ Ri winak c'ut e teren chrij, xquirak qui chi', xquibij: “¡Chcämok!”

Ri Pawl xuto' rib chquiwäch ri winak

³⁷ Xa' co'l man cäcoj bic ri Pawl chupam ri cachoch ri ajch'ojab, xubij che ri qui nimal ri jun mil ajch'ojab: “¿La cuya' quintzijon uc' la?” Ri are' xubij: “¿La aweta'm ri ch'abal aj Gres?

³⁸ ¿La man at ri' ri aj Ejipt ri quieb oxib k'ij chi wa' xebutuquij ri winak, xuc'am bic qui be quiejeb mil achijab cämisanelab pa ri chaki'j uwo sak?”

³⁹ Xubij c'u ri Pawl: “In in aj judey. In aj Tars, are jun tinimit re Silisiy nim u banic. Catinbochi'j c'ut chaya' chwe chi quebench'abej ri winak.”

⁴⁰ Aretak xya' che, ri Pawl xtaq'ui' cho tak ri u ware ri k'am, xuban etal ruc' ri u k'ab chquiwäch ri winak. Aretak man c'o ta chi jun cäch'awic, xch'aw ri Pawl pa ri ch'abal hebrey, xubij: