Hechos 16 - Quiché Bible

Ri Timotey xerachilaj ri Pawl xukuje' ri Silas

¹ Xebopan pa Derb xukuje' pa Listr. C'o chila' jun cojonel Timotey u bi', ral jun chuchu' cojonel aj judey, are c'u ri u tat aj Gres.

² Ri Timotey utz u tzijol cumal ri kachalal ri e c'o pa Listr xukuje' ri e c'o pa Icon.

³ Ri Pawl xraj chi cäbe ri Timotey ruc'. Xuc'amo, xucoj ri etal che u kopixic ri u tz'umal ri u wi' ri achi wi xa' rumal quech ri aj judeyib ri e c'o pa tak ri c'olbal ri'. Conojel c'ut queta'm chi ri u tat are aj Gres.

⁴ Chque ri achalal pa conojel ri tinimit ri xeboc'ow wi xequiya' can quibixic ri xequichomaj ri takomxenlab xukuje' tak ri e tatayib ri quetakan ri comon cojonelab pa Jerusalen.

⁵ Je c'u ri' ri cojonelab que tak ri e comon cojonelab co xetac'abax pa ri qui cojonic. Ronojel k'ij queq'uiyiric.

Ri jun achi aj Masedon ri xuc'ut rib chuwäch ri Pawl

⁶ Xeboc'ow pa Prij. Xeboc'ow pa tak ri tinimit aj Galas. Xek'atix c'u rumal ri Ruxlabal ri Dios che u tzijoxic ri tzij chque ri winak ri e c'o pa Asiy.

⁷ Aretak xebopan chuxe' Misiy, are ta xcaj xebe pa Bitin. Are c'u ri Ruxlabal ri Jesus man xuya' ta chque.

⁸ Xeboc'ow bic pa u xcut ri Misiy, xekaj bic pa Troas.

⁹ Chak'ab xuc'ut rib jun c'utwächinic chuwäch ri Pawl. Xril jun achi aj Masedon xutac'aba' rib chuwäch, xubochi'j: “Chatk'ax ulok pa Masedon che ka to'ic.”

¹⁰ Xuwi c'u xilitaj ri c'utwächinic rumal ri Pawl xkasuc'umaj ri ka bic pa Masedon. Xkach'obo chi are ri Dios xujsiq'uin che u tzijoxic ri utzalaj tak tzij chque ri winak chila'.

Ri Pawl xukuje' ri Silas pa Pilips

¹¹ Aretak uj elinak chi bic pa Troas pa jun nim jucub, suc' xujbe pa Samotras. Chucab k'ij chic xujbe pa Neapolis.

¹² Xujel c'u bic chila' are ri tinimit nim u banic pa ri ch'akap ulew ri' re Masedon e q'ui ri aj romab e c'o chila'. Xujbeyetaj c'u quieb oxib k'ij chila'.

¹³ Pa jun k'ij re uxlanem xujel bic chrij ri roquibal tinimit chunakaj ri nima'. Xkachomaj c'ut chi chila' nak'atisam wi ri u banic ch'awem ruc' Dios. Xujt'uyic, xkabij ri utzalaj tak tzij chque ri ixokib ri qui mulin quib.

¹⁴ C'o jun chuchu' Lidiy u bi', are ajc'ay utzalaj tak atz'iak re morato re ri tinimit Tiatir, ri cuk'ijilaj ri Dios. Ri are' xutatabej ri tzij. Ri Ajawaxel xujak ri ranima' che u cojic ri tzij ri xubij ri Pawl.

¹⁵ Xban c'ut ri bautism junam cuc' conojel ri e c'o chupam ri rachoch, xujubochi'j c'u na: “We ri ix i k'alajisam chi kastzij in cojoninak che ri Ajawaxel, chixpetok chixelc'ol chupam ri wachoch.” Xucoj chuk'ab chke chi cujcanaj can chila'.

¹⁶ Xc'ulmataj c'u jumul chi uj benak pa jun c'olbal che u banic ch'awem ruc' Dios, xkarik kib ruc' jun ali ri c'o uxlabal re ch'obonic ruc'. Ri e rajaw cäquich'äc nimalaj puak chrij rumal ri u ch'obonic.

¹⁷ We ali ri' xuterenej ri Pawl xukuje' ri uj curak u chi': “¡We achijab ri' e pataninel rech ri Dios ri aj chicaj, caquiya' c'u u bixic ri be rech colobal ib chiwe!”

¹⁸ Q'ui k'ij chi c'ut je cuban wa'. Jeri' chi xq'uistaj u c'u'x ri Pawl, xubij che ri itzel uxlabal: “Catintak pa ri u bi' ri Jesucrist, chatel bic che.” Ri uxlabal kas chanim xel bic che.

¹⁹ Ri e rajaw ri ali, aretak xquilo chi man c'o ta chic ri u cu'lbal qui c'u'x che u ch'äquic puak rumal ri ali, xequichap ri Pawl xukuje' ri Silas, xequic'am bic chquiwäch ri k'atal tak tzij, ri e c'o cho ri c'ayibal.

²⁰ Xequitac'aba' chquiwäch ri k'atal tak tzij xquibij: “We achijab ri' cätajin cäcan c'ax che ri ka tinimit, aj judeyib c'ut.

²¹ Cäquibij jujun tak nak'atisabal chke. Ri man takal ta qui banic kumal, rumal rech chi ri uj uj aj romab.”

²² Xewalij c'u ri winak chquij. Ri e k'atal tak tzij xquiya' takanic chi chebesax ri catz'iak cherapux c'ut cuc' xic'ay.

²³ Aretak sibalaj e qui rapum chic, xequicoj pa che'. Xquiya' c'u takanic che ri chajil re ri che', chi kas utz qui chajixic chubana'.

²⁴ Xuc'am we takomal ri' ri chajil u chi' che', xebucoj ri Pawl pa ri che' ri naj coc na bic. Xebucoj ri cakan pa ri chapbal akanaj.

²⁵ Pa niq'uiaj ak'ab c'ut, ri Pawl ruc' ri Silas cätajin cäquiban ch'awem ruc' Dios, cäquibixoj bix che ri Dios. Ri e ajpache' quequitatabej.

²⁶ Xak c'u c'ätetal xuban jun nimalaj cabrakan, jeri' chi ri u tac'alibal ri u pa che' sibalaj xeslabetajic. Xejaktaj c'ut conojel ri u chi' ri che'. Ri tikom tak ch'ich' ri e ximibem quech. Conojel xet'okopitajic.

²⁷ Aretak ri chajil re ri che' xc'astajic, xrilo chi ri e u chi' ri che' e jaktal chic. Xresaj ri u ch'ich', raj xucämisaj rib, xuchomaj chi ri e ajpache' xebanimaj bic.

²⁸ Ri Pawl co xch'awic, xubij: “¡Maban jun c'ax chbil awib! ¡Konojel uj c'o waral!”

²⁹ Ri chajil re ri che' xuta' jun chäj, aninak xoc bic chupam ri che'. Cäbirbitic, xutzak rib cho ri ulew chquiwäch ri Pawl xukuje' ri Silas.

³⁰ Xeresaj apanok, xubij chque: “Tatayib, ¿jas rajawaxic quinbano rech quincolotajic?”

³¹ Ri e are' xquibij: “Chatcojon che ri Ajawaxel Jesus, catcolotaj c'u na ri at xukuje' ri e aj uwo awachoch.”

³² Xquibij ri u tzij ri Dios che ri achi xukuje' chque conojel ri e c'o cho rachoch.

³³ Kas c'u pa ri jok'otaj chak'ab, ri chajil che' xebuc'am bic, xebuch'aj tak ri e qui socotajic, chanim xban c'ut ri u bautism, ri are' xukuje' conojel ri e c'o chupam ri rachoch.

³⁴ Xebuc'am bic cho rachoch, xucoj mexa chquiwäch. C'o nimalaj quicotemal pa ranima' ri achi xukuje' conojel ri e c'o pa rachoch, rumal rech chi xecojon che ri Dios.

³⁵ Aretak xsakaric, ri e k'atal tak tzij xequitak bic ri ajch'imiyab ruc' takanic xequibij che ri chajil u chi che' chi chebutzokopij bic ri achijab ri'.

³⁶ Ri chajil re ri che' xuya' u bixic wa' che ri Pawl xubij: “Ri e k'atal tak tzij xquiya' takanic chi quixtzokopix bic. Je c'u ri' chixel bic, jix pa jamaril.”

³⁷ Are c'u ri Pawl xubij chque: “Xujquich'ay c'u chuwäch ri tinimit, xujquicoj pa che', man xk'at ta c'u tzij pakawi', uj c'u achijab aj romab. Are' c'u, camic, ¿la cujquesaj bic chi c'uyal? ¡Jayi' c'ut! Xane' chepe ta ri e are' che kesaxic bic.”

³⁸ Ri ajch'imiyab xequiya' u bixic we tzij ri' chque ri e k'atal tak tzij. Xquixe'j c'u quib aretak xquito chi aj romab.

³⁹ Xepe ri e k'atal tak tzij, xequibochi'j, xequesaj bic, xquita' tok'ob chque chi quebel bic pa ri tinimit.

⁴⁰ E elinak chi bic pa che', xeboc pa rachoch ri Lidiy. Aretak quilom chic qui wäch ri kachalal, xquicu'bisaj can qui c'u'x. C'äte ri' xebec.