Hechos 15 - Quiché Bible

Ri cojonelab xquimulij quib pa Jerusalen

¹ Xebel c'u bic jujun achijab pa Judey, xekaj bic pa Antioquiy, xequitijoj ri kachalal, xquibij: “We man cäcoj na ri etal che u kopixic ri u tz'umal ri u wi' ri ix achijab wi jas ri nak'atisabal ri u bim ri Moises, man quixcuin taj quixcolotajic.”

² Ri Pawl xukuje' ri Bernabe xequic'ulelaj ri achijab ri'. Chuq'uisbalil c'ut, ri Pawl rachil ri Bernabe xukuje' jujun chic xetak bic pa Jerusalen rech quequichomaj we jasach ri cuc' ri e takom e cachil tak ri tatayib ri quetakan pa ri comon cojonelab chila'.

³ Xetak c'u bic cumal ri comon cojonelab, xeboc'ow pa Penis xukuje' Samar. Xquibij chque ri winak chi ri man aj judeyib taj qui yo'm can ri ojer qui c'aslemal, e cojoninak che ri Dios. Xquiya' c'u nimalaj qui quicotemal ri kachalal.

⁴ Aretak xebopan pa Jerusalen, xec'ulax cumal ri comon cojonelab xukuje' ri takomxenlab xukuje' tak ri tatayib ri quetakan ri comon cojonelab chila', xquibij chque ronojel ri u banom ri Dios cumal.

⁵ Jujun chque ri pariseyib ri e cojoninak, xetaq'ui'c, xquibij: “Rajawaxic chi ri cojonelab ri man aj judeyib taj chi cäcoj ri etal che u kopixic ri qui ti'jal xukuje' cäkabij chque chi cäquinimaj ri u pixab ri Moises.”

⁶ Xquimulij quib ri takomxenlab xukuje' tak ri tatayib ri quetakan ri comon cojonelab pa Jerusalen che u chomaxic wa'.

⁷ Aretak q'ui ri tzij xquibij chbil tak quib, xukuje' sibalaj e chomaninak chic, xwalij ri Lu' xubij c'u chque: “Kachalal, ix iweta'm chi xc'ochiri' xinucha' ri Dios chixo'l che u tzijoxic ri utzalaj tzijol re ri colobal ib chque ri man aj judeyib taj, rech quecojonic.

⁸ Ri Dios, ri reta'm ri canima', xuya' k'alajisanic chi quebe u c'amowaj, xuya' c'ut ri Ruxlabal chque jas ri xuya' chke uj.

⁹ Ri Dios man jalan ta queril ri e are' chkawäch uj, u josk'im c'u ri canima' rumal ri cojonic.

¹⁰ Camic c'ut, ¿jasche quitzur ri Dios, ruc' u ya'ic eka'bal chquij ri cojonelab, ri mawi ri uj, mawi ri e ka mam uj cuininak ta che ruc'axic bic?

¹¹ Ri xane' rumal ri u tok'ob ri Ajawaxel Jesus uj cojoninak rech cujcolotajic, je jas ri e are'.”

¹² Conojel c'ut man xech'aw ta chic. Xequitatabej ri Bernabe xukuje' ri Pawl, ri xquibij chque conojel ri mayibal xukuje' ri etal ri e u banom ri Dios cumal chquixo'l ri man aj judeyib taj.

¹³ Xbitaj wa' cumal xch'aw ri Santiag, xubij: “Wachalal, chinitatabej:

¹⁴ Ri Simon Lu' u bim chke jas ri xuban ri Dios che u tok'obisaxic qui wäch ri man aj judeyib taj nabe mul rech cäresaj jun tinimit chquixo'l ri e rech ri are'.

¹⁵ Wa' cajunamataj ruc' ri xquitz'ibaj ri e k'axal tak tzij, jacha' ri cubij ri Tz'ibatalic:

¹⁶ ‘Oc'owinak chi wa' quintzelej na ulok quinban c'u na u banic ri tzakinakalaj rachoch ri David; quinban na u banic ri u tzakinaquil quinyac china',

¹⁷ rech ri niq'uiaj chic cäquitzucuj na ri Ajawaxel junam cuc' conojel ri nimak tak tinimit ri e tastal che ri nu bi'.

¹⁸ Ri Ajawaxel, ri xebuya' ulok quetamaxic we jastak ri' kas xc'ori', u yo'm ulok ri u tzij.’

¹⁹ Rumal ri', ri quinchomaj are wa': man takal taj cäkaya' latz' chque ri man aj judeyib taj ri quequiya' c'u can ri ojer tak qui cojonic che u ternexic ri Dios.

²⁰ Cubana' chi ka tz'ibaj bic chque chi chquitasa' quib maquinak apachique jasach awasim cumal ri diosib, chi man cäquiban ta macunic cuc' achijab ixokib, mequitij qui ti'jal awaj ri e jitz'itajinak, o ri e jik'inak, mawi quic'.

²¹ Kas pa ri ojer tak k'ij c'ä camic, pa conojel tak ri tinimit, e c'o winak ri cäquisiq'uij u wäch ri u pixab ri Moises ronojel k'ij re uxlanem pa tak ri ja ri cäquitijoj wi quib ri aj judeyib che ri pixab.”

Wuj chque ri cojonelab ri man aj judeyib taj

²² Ri takomxenlab xukuje' tak ri tatayib ri quetakan ri comon cojonelab pa Jerusalen xukuje' conojel ri e re ri comon cojonelab utz xquilo ri qui cha'ic achijab chquixo'l che qui takic bic pa Antioquiy rech quecachilaj bic ri Pawl rachil ri Bernabe. Xquicha' c'u ri Juds ri cäbix Barsabas che rachil ri Silas, achijab wa' e qui nimakil ri kachalal.

²³ Xquitz'ibaj jun wuj, xquiya' bic pa qui k'ab. Ri je cubij wa': “Uj ri uj takomxenlab, xukuje' tak ri tatayib ri e iwachalal c'o takanic kuc', cäkaya' rutzil qui wäch ri kachalal ri man aj judeyib taj, ri e jekel pa Antioquiy xukuje' pa Siriy xukuje' pa Silisiy.

²⁴ Ka tom c'ut chi jujun ri e elinak bic chkaxo'l ri man c'o ta takanic ka yo'm bic chque ri e qui yo'm latz' chiwe cumal tak ri e qui tzij, xqueblaj c'ut i c'u'x cumal.

²⁵ Xa jun ka chomanic, utz xkil wi xekacha' achijab che qui takic bic iwuc', quecachilaj bic ri Bernabe xukuje' ri Pawl, ri e lok' chkawäch.

²⁶ E are' achijab wa' ri qui jachom ri qui c'aslemal pa cämic rumal rech ri u bi' ri Kajaw Jesucrist.

²⁷ Je c'u ri', xekatak bic ri Juds xukuje' ri Silas. E are' c'u wa' quixquich'abej na, xa junam u bixic caquiya' na chiwe.

²⁸ Utz c'u xril wi ri Ruxlabal ri Dios, xukuje' ri uj, chi man q'ui taj ri eka'n cäkaya' chiwij. Xane' xuwi we jastak ri' ri e rajawaxic:

²⁹ Mebitij qui ti'jal awaj ri e chi'm che tabal tok'ob chque ri e diosib, mebitij quic'. Mebitij quiti'jal awaj ri quejitz'itajic. Miban macunic cuc' achijab ixokib. We c'u kas quichajij iwib chi man quebiban ta wa', utz ri quibano. Chixuchajij ba' ri Dios.”

³⁰ Aretak e jachom chi bic, xekaj bic pa Antioquiy. Xequimulij ri cojonelab chila', xquiya' ri wuj chque.

³¹ Aretak xquisiq'uij u wäch ri wuj, xequicotic, rumal rech chi xcu'bi qui c'u'x rumal.

³² Ri Juds xukuje' ri Silas, e k'axal tak u tzij ri Dios, xquicu'bisaj qui c'u'x xukuje' xquiya' nimalaj chajin anima' chque ri kachalal rumal tak ri e qui tzij.

^33-34 E sachalinak chi c'u quieb oxib k'ij chila', xejach bic pa jamaril cumal ri kachalal, rech quetzelej cuc' ri xetakow ulok.

³⁵ Ri Pawl rachil ri Bernabe xecanaj can pa Antioquiy cuc' q'uia kachalal chic, xequitakej u ya'ic tijonic xukuje' u tzijoxic ri cubij ri Ajawaxel.

Ri Pawl cuchaplej ri ucab u binem che u tzijoxic ri utzalaj tzij

³⁶ E oc'owinak chi jujun k'ij, ri Pawl xubij che ri Bernabe: “Jo' chi jumul che qui solixic chic ri kachalal pa conojel ri tinimit ri e tzijom wi ri u tzij ri Ajawaxel, che quilic jas ri qui banom.”

³⁷ Ri Bernabe are ta xraj xuc'am bic ri Xuan che cachil, ri cäbix Marcux che.

³⁸ Are c'u ri Pawl xuchomaj chi man utz taj cäquic'am bic we achi ri' che cachil, rumal rech chi xutas can rib chquij pa Panpil, man xerachilaj ta bic pa ri chac.

³⁹ Nim c'ut ri c'ulelanib xwalij chquixo'l chi xquitasquib ri jun che ri jun chic. Ri Bernabe xuc'am bic ri Marcux, xebe puwi' ri plo, xebe pa Chipr.

⁴⁰ Ri Pawl xucha' ri Silas, xebel bic. Xejach bic cumal ri kachalal pa ri u tok'ob ri Ajawaxel.

⁴¹ Xeboc'ow pa Siriy, xeboc'ow pa Silisiy, quebucowirisaj can ri comon cojonelab.