Hechos 12 - Quiché Bible

Xcämisax ri Santiag xukuje' xcoj ri Lu' pa che'

¹ Pa tak ri k'ij ri' ri ajawinel Herod xebuc'axc'obisaj jujun chque ri e re ri comon cojonelab.

² Xtakanic chi cacämisax ri Santiag che ch'ich', ri rachalal ri Xuan.

³ Aretak xrilo chi xkaj chquiwäch ri aj judeyib, xukuje' xuchap ri Lu'. Are c'u k'ijol wa ri quetijow ri caxlanwa ri man caya' ta ch'am cuc'.

⁴ Chaptajinak chic ri Lu', xuya' pa che', xujach pa qui k'ab ri ajch'ojab. Ri ajch'ojab e waklajuj, e cajcaj mulaj. Ri Herod cuchomaj cäresaj ulok ri Lu' chquiwäch ri winak aretak oc'owinak chic ri nimak'ij re ri Oc'owem.

⁵ Chajin c'u ri Lu' pa che'. Are c'u ri e comon cojonelab man xquitanaba' ta ri u banic ch'awem ruc' Dios puwi' ri Lu' ruc' ronojel canima'.

Ri Dios xresaj ri Lu' pa che'

⁶ Pa ri u chak'abil ri k'ij ri xresaj ta ulok ri Herod, ri Lu' cätajin cäwar chquixo'l quieb ajch'ojab, ximom che quieb tikom ch'ich', e c'o chi c'u niq'uiaj chajinelab chuchi' ri che' che u chajixic ri che'.

⁷ Xak c'u c'ätetal xopan jun aj cajalaj u tako'n ri Ajawaxel xtaq'ui' chuxcut ri Lu', xtunun c'u jun sakil pa ri che'. Xunak ri Lu' pa ri u c'alc'a'x, xuc'asuj, xubij che: “¡Aninak chatwalijok!” Ri tikom ch'ich' xetzak chque ri u k'ab ri Lu'.

⁸ Ri tako'n aj caj xubij che: “Chacojo' ri awatz'iak xukuje' ri a xajäb.” Jeri' xubano. Ri tako'n aj caj xubij che: “Chach'uku' awib ruc' ri a k'u', chinaterenej.”

⁹ Xel bic, ri Lu' xuterenej; man xuch'ob ta c'ut chi kas je quelic jas ri cätajin cuban ri tako'n aj caj. Are c'u pa u c'u'x chi xa' cätajin cäril jun c'utwächinic.

¹⁰ Xeboc'ow chquiwäch ri nabe tak chajinelab, xeboc'ow chquiwäch ri ucab. Aretak c'u xebopan chuwäch ri uchi'be, ri re räx ch'ich' ri quel bic pa ri tinimit, xujak rib pa rech wi chquiwäch. Xebel ulok, xcoc'owisaj ri nabe u xo'l be; ri tako'n aj caj c'ut xuya' can u tuquiel.

¹¹ Ri Lu', aretak xul pa sak, xubij: “Camic xinwetamaj chi kastzij ri Ajawaxel u takom ulok ri u tako'n aj caj che wesaxic pa u k'ab ri Herod. Xinresaj chuwäch ronojel ri queyem ri aj judeyib chi quinrik na.”

¹² Aretak kas xuch'ob wa', ri Lu' xbe cho rachoch ri Mariy ri u nan ri Xuan ri cäbix Marcux che. Chila' qui mulin wi quib e q'ui, cätajin cäquiban ch'awem ruc' Dios.

¹³ Aretak xuc'oroc'a ri uchi'be, xpe jun ali che rilic jachinok, ri Rods u bi'.

¹⁴ Aretak xuta' ri u ch'abal, xuch'obo chi are ri Lu', man xujak ta c'u ri uchi'be rumal rech ri u quicotemal, xane' xxiq'uin che u ya'ic u bixic chi ri Lu' tac'al chi' ri be.

¹⁵ Ri e are' xquibij che: “¡At ch'ujirinak!” Ri Rods xujiquiba' u bixic chi kastzij are' ri Lu'. Ri e are' caquibij: “Man are' taj; are' ri u tako'n aj caj ri chajil rech.”

¹⁶ Ri Lu' sibalaj xuc'oroc'a ri uchi'be. Aretak xquijako, xquilo, xquimayo.

¹⁷ Ri are' c'ut xuban etal ruc' ri u k'ab chi mech'awic. Xubij chque jas xuban ri Ajawaxel che resaxic ulok pa ri che'. Xubij: “Chiya' u bixic wa' che ri Santiag xukuje' chque ri e kachalal.” Xel bic, xbe pa jun c'olbal chic.

¹⁸ Aretak xsakaric, sibalaj xquituquij quib ri ajch'ojab, man cäquich'ob taj jas xc'ulmataj ruc' ri Lu'.

¹⁹ Ri Herod xutzucuj, man xurik ta c'ut. Aretak u c'otom chic qui chi' ri chajinelab, xtakan che qui c'amic bic pa cämisaxic. Xel c'u bic ri Herod pa Judey, xbe pa Sesarey, xejekel c'u chila'.

Ri Herod xcämic

²⁰ Oyowarinak c'u ri Herod chquij ri aj Tir xukuje' ri aj Sidon. Ri e are' c'ut xquichomala' ulok chquixo'l, xepe chuwäch ri Herod, aretak qui ch'äcom chic ri Blast, ri c'o u takanic puwi' ri u warabal ri ajawinel. Rumal ri are' xquitz'onoj jamaril che, are c'u ri Tir xukuje' ri Sidon e tzukum rumal ri ulew ri ajawinel.

²¹ Ri Herod xuch'ic jun k'ij chque. Xopan c'u ri k'ij, ri Herod u cojom ri je'lalaj ratz'iak re ajawinel, xt'uyi' pa ri cäk'at wi tzij, xtzijon c'u chquiwäch.

²² Ri winak xquirak qui chi': “¡U ch'abal ri Dios wa', man rech ta winak!”

²³ Chanim ri Herod xsoc rumal jun tako'n aj caj rech ri Ajawaxel, rumal rech chi man xunimarisaj ta u k'ij ri Dios. Kuchum ri u cuerp cumal xjut, xcämic.

²⁴ Are c'u ri u tzij ri Dios xq'uiyic, xtzijox pa tak q'ui c'olbal.

²⁵ Aretak ri Bernabe rachil ri Sawl, xbantaj ri qui patan ri xequibana' pa Jerusalen, xetzelej ulok. Xquic'am ulok ri Xuan che cachil ri cäbix Marcux che.