Hebreos 8 - Quiché Bible

Ri Jesus are' ri cojol tzij re ri jun c'ac' c'ulwächinic

¹ Ri u c'u'x ri ka bim are wa': Chi je u beya'l wa' ri qui nimal ri cojol tabal tok'ob ri kech uj xt'uyi' chicaj pa ri u wiquiak'ab ri u tem ri Dios re ajawibal, ri nim u k'ij ri c'o pa ri caj,

² are c'u cojol tabal tok'ob ri cäpatanin pa ri kas k'ijilabal ri xban rumal ri Ajawaxel, man rumal ta winak.

³ Ronojel qui nimal ri e cojol tak tabal tok'ob cojom che qui ya'ic sipanic xukuje' tabal tak tok'ob. Je c'u ri' ri Jesucrist rajawaxic chi xukuje' ri are' c'o jas cuya'o.

⁴ We ta c'o ri Jesucrist cho ri uwächulew, ma ta cojol tabal tok'ob ri'. C'ä e c'o c'u na cojol tabal tok'ob ri cäquiya' sipanic jas ri cubij ri pixab.

⁵ E are c'u wa' quepatanin pa jun k'ijilabal ri xa' e u wächbal xukuje' e u mu'jal ri c'o chicaj. Jas ri xbix che ri Moises aretak xa' co'l man cuchaplej u banic ri Lic'om Rachoch Dios re Rikoj ib: “Chawila', chabana' ronojel jas ri u wächbal ri xc'ut chawäch pa ri juyub.”

⁶ Are c'u ri camic ri Jesus u c'amom jun chac ri sibalaj nim na u k'ij chuwäch ri qui chac ri e cojol tabal tok'ob. Are' ri cojol tzij re jun c'ulwächinic ri utz na chuwäch ri c'ulwächinic ri xc'oji' can cuc'. Ri c'ulwächinic re camic tiquibam paquiwi' chi'nic ri e utz na chuwäch ri c'ulwächinic re nabe.

⁷ We ta ri nabe c'ulwächinic junam ta xel ruc' ri u chomanic ri Dios, ma ta xajwataj ta chi ri' ri ucab c'ulwächinic.

⁸ Xubij c'u ri Dios aretak xuk'alajisaj ri qui mac ri winak: “Cächa' ri Ajawaxel: ‘Chiwilampe', quepe na ri k'ij, aretak quinban na jun c'ac' c'ulwächinic ruc' ri Israel xukuje' ruc' ri Juda.

⁹ We c'ulwächinic' man je taj jas ri xinban cuc' ri e qui mam pa ri k'ij aretak xebenc'am che ri qui k'ab che quesaxic ulok pa Ejipt; rumal c'u rech chi ri e are' man xquitz'akatisaj taj ri nu c'ulwächinic, ri in xebenya' canok,’ cächa' ri Ajawaxel.

¹⁰ ‘Oc'owinak chic ri k'ij ri', are' wa' ri c'ulwächinic ri quinban na cuc' ri e aj Israel,’ cächa' ri Ajawaxel: ‘Quebenya' na ri nu pixab pa ri qui chomanic, pa ri canima' quintz'ibaj wi na. In quinux qui Dios are c'u ri e are' quebux na nu tinimit.

¹¹ Man quequitijola' ta chi na chquijujunal ri cachalal rech cäquich'ob u wäch ri Ajawaxel. Rumal rech chi conojel cäquich'ob na nu wäch, chi e ch'utik chi e nimak.

¹² Ri in c'ut man quinc'äjisaj ta na qui wäch rumal rech ri etzelal ri qui banom, man quenataj ta chic ri qui mac xukuje' ri quetzelal chwe.’ ”

¹³ Aretak ri Dios cubij chi c'o jun c'ac' c'ulwächinic, cuban k'e'l che ri nabe. Are c'u ri cabixic chi k'e'l chic, cutakej c'u k'elobic, chanim cäsach na u wäch.