Hebreos 5 - Quiché Bible

Ri Crist cojol tabal tok'ob ri cäjunamataj ruc' ri Melquisedec

¹ Ronojel qui nimal ri cojol tabal tok'ob ri cha'om chquixo'l ri winak, are' cojom chuwäch ri Dios che qui q'uexwäch ri winak, rech cuya' sipanic cho ri Dios xukuje' quebucämisaj tak awaj che tabal tok'ob cho ri Dios rumal quech ri mac.

² Ri cojol tabal tok'ob cäcuinic quil u c'u'x chque ri man c'o ta queta'm xukuje' ri e subutajinak, rumal rech chi xukuje' ri are' tukar.

³ Rajawaxic c'ut chi cuya' tabal tok'ob cho ri Dios man xuwi ta rumal quech ri qui mac ri winak, xane' xukuje' rumal quech ri u mac are'.

⁴ Man c'o ta jun ri xak ta pa re wi coc ta pa we chac ri' ri nim u k'ij, xane' are coc ri cäsiq'uix rumal ri Dios, jas ri Aaron.

⁵ Jeri' xukuje' ri Crist man xunimarisaj ta u k'ij chbil rib, che u banic rib che qui nimal ri cojol tabal tok'ob, xane' are' ri Dios, ri xbin che: “At ri' ri nu C'ojol, in xatinwalc'ualaj camic.”

⁶ Jas xukuje' cubij ri Tz'ibatalic pa jun c'olbal chic: “At cojol tabal tok'ob amak'el chbe k'ij sak, jas ri u cholajil ri u beya'l ri Melquisedec.”

⁷ Ri Crist, aretak xc'oji' waral cho ri uwächulew, xurak u chi', xok'ic aretak xuban ch'awem ruc' Dios. Xuban bochi'nic xukuje' tz'ononic che ri Dios, ri cäcuin che u to'ic chuwäch ri cämical. Xtataj c'ut rumal ri u nimanic.

⁸ Pune' C'ojolaxel, xretamaj ri nimanic rumal ri c'ax ri xuriko.

⁹ Tz'akatirinak chi c'ut, xux junalic colol quech conojel ri queniman che.

¹⁰ Xcoj che qui nimal ri cojol tabal tok'ob rumal ri Dios, jas ri u banic ri Melquisedec.

Sibalaj c'ax curik jun we cuya' can ri cojonic

¹¹ Sibalaj c'o na ri cäkabij che wa'. Sibalaj c'ax c'u u bixic, rumal rech chi ri ix beyowinak che ch'obonic.

¹² Takal chi chiwe we ta quixoc che ajtijab, rumal rech chi ojer chic ix cojoninak. Man je ta c'u wa' i banom, xane' c'ä rajawaxic quixtijox chi na jumul chque ri nabe tak takanic re ri chaplebal re ri u tzij ri Dios chi rajawaxic chi na ri leche' chiwe, man are ta ri wa.

¹³ Ronojel jachin ri cutij leche', c'ä maja' cäresaj u no'j chrij ri tzij re suq'uil, rumal rech chi c'ä ch'utin na.

¹⁴ Ri wa ri' are quech ri tz'akatinak chic qui junab. Rumal rech chi amak'el qui tijom quib, c'o chic qui no'j, quecuin che u ch'obic jas ri utz xukuje' jas ri man utz taj.