Hebreos 4 - Quiché Bible

Uxlanem

¹ Xbix chke rumal ri Dios chi cujoc na pa ri uxlanem. Chkaxe'j ba kib, we ne c'o jun chiwe muc'ulmaj chi man coc ta pa ri uxlanem.

² Ri uj xukuje' ka tom ri tzij re colobal ib junam jas ri e are'. Ri e are' c'ut man c'o ta xquechbej che ri u tatabexic ri tzij rumal rech chi man xecojon taj aretak xquitatabej.

³ Are c'u ri uj cujoc ruc' pa ri uxlanem, ri uj cojoninak chic, jas ri xubij ri Dios: “Xinbij pa ri woyowal ruc' ri chi'nic ri kas cäban na chi man queboc ta na wuc' pa ri c'olbal ri quinuxlan wi.” Xuq'uis c'u ne ri Dios ri u chac aretak xtiquiritaj ri uwächulew.

⁴ Pa jun c'olbal c'ut je cubij wa' ri Tz'ibatalic chrij ri uwuk k'ij: “Xuxlan ri Dios che ronojel ri u chac pa ri uwuk k'ij.”

⁵ Jumul chic cubij ri Tz'ibatalic: “Man queboc ta na wuc' pa ri uxlanem.”

⁶ Cäraj c'u na jujun ri queboc na pa ri uxlanem. Are c'u ri qui tom ri tzij re colobal ib nabe man xeboc taj rumal rech chi man xeniman taj.

⁷ Rumal ri', jumul chic ri Dios xuchomaj jun k'ij, are ri camic. Oc'owinak chi q'ui junab, xubij rumal ri David, jas ri bim canok: “We quito jas cubij ri Dios camic, micowirisaj ri iwanima'.”

⁸ We ta ri Josue xuya' ta ri uxlanem chque ri e aj israelib, ri Dios ma ta xutzijoj chi jun k'ij ri' ri cäpe na.

⁹ Rumal ri' c'o na jun uxlanem che ri u tinimit ri Dios.

¹⁰ Apachin c'ut ri coc pa ri ruxlanem ri Dios, are' xukuje' uxlaninak che ri u chac, jas ri Dios xuxlan che ri rech.

¹¹ Chkacojo' ba' ka chuk'ab rech cujoc pa ri uxlanem ri', rech man c'o ta jun cätzakic cutakej ta c'ut ri c'utbal que ri man xeniman taj.

¹² Ri u tzij ri Dios c'aslic xukuje' c'o u cuinem. C'o na u ware chuwäch apachique ch'ich' ri quieb u pa u chi'. Cuban quieb chque ri anima' ruc' ri uxlabal, cuban quieb chque ri u wiki'b ri bak ruc' ri u pa bak. Reta'm ri u chomanic xukuje' ri u rayibal ri canima' ri winak, we utz o man utz taj.

¹³ Man c'o ta jun jasach banom ta cho ri uwächulew c'u'm ta chuwäch ri Dios. Conojel ri jastak e ch'anach'oj xukuje' e k'alaj chuwäch ri u bak'wäch ri Jun ri cäkabij wi na jas ri ka banom.

Ri Jesus are' ri nimalaj qui nimal ri cojol tabal tok'ob

¹⁴ C'o jun nimalaj qui nimal ri cojol tabal tok'ob kech uj, ri xroc'owisaj ri caj, ri Jesus u C'ojol ri Dios. Rumal ri', chkak'alajisaj ri ka cojonic, co chujtac'alok.

¹⁵ Ri qui nimal ri cojol tabal tok'ob ri c'o kuc', cäcuinic quil u c'u'x che ri ka tukaril, rumal rech chi xtakchi'x che ronojel u wäch c'ambejenic je jas ri uj, man xmacun ta c'ut.

¹⁶ Mäkaxe'j ba' kib, chujkeb chuwäch ri tem re ajawibal rech ri u tok'ob ri Dios, rech ri are' quil u c'u'x chke, cuban tok'ob chke che ka to'ic pa ri k'ij ri rajawaxic na chke.