Hebreos 3 - Quiché Bible

Nim na u k'ij ri Jesus chuwäch ri Moises

¹ Je c'u ri', tastalic tak wachalal, ix siq'uim cuc' niq'uiaj chic chi quixux rech ri Dios. Kas chichomaj ba' ri Crist Jesus, are takom xukuje' qui nimal ri cojol tabal tok'ob re ri ka cojonic.

² Ri are' jic chuwäch ri Dios, ri xcojow che qui nimal ri cojol tabal tok'ob, jas xukuje' ri Moises are jic chuwäch ronojel ri rachoch Dios.

³ Takal che ri Jesus chi nim na u k'ij chuwäch ri Moises, jas ri nim quil wi na ri xbanow ri ja chuwäch ri ja.

⁴ Ronojel ja cäban rumal jachin jun. Are c'u ri xebanow conojel ri jastak, are' ri Dios.

⁵ Ri Moises kastzij jic pa ronojel ri rachoch Dios, je jas jun pataninel, che u k'alajisaxic jas ri cätzijox na.

⁶ Are c'u ri Crist jacha' jun c'ojolaxel, puwi' ri rachoch Dios; uj c'u ri' we ja ri', we co ka tiquibam ri jiquibam c'uxaj xukuje' ri u nimarisaxic ka k'ij che ri cu'lbal c'uxaj.

Uxlanem che ri u tinimit ri Dios

⁷ Rumal ri', jas ri cubij ri Ruxlabal ri Dios pa ri Tz'ibatalic: “We quito jas cubij ri Dios camic,

⁸ micowirisaj ri iwanima', jas ri xquiban ri winak aretak xetzak pa takchibal mac pa ri chaki'j uwo sak, xquiyac c'u woyowal.

⁹ Are chi' ri e i mam xquiban jastak chnuwäch xa' che rilic jas quinbano, pune' xquilo cawinak junab jas ri xinban cuc'.

¹⁰ Rumal c'u ri' xpe woyowal chque ri winak ri', xinbij c'ut: ‘Amak'el e sachinak pa canima', man e qui ch'obom ta c'u ri nu be.’

¹¹ Xinbij c'u pa ri chi'nic ri kas cäban na pa ri woyowal jas ri quinban na, xinbij: ‘Man queboc ta na pa ri wuxlanem.’ ”

¹² Chiwila', wachalal, c'o jun chiwe mäc'oji' itzelalaj ranima' ri man cäcojon taj, ri cutas rib cuya' can ri Dios c'aslic.

¹³ Xane' chipixbela' iwib ronojel k'ij, aretak c'ä c'o ri k'ij camic, rech c'o jun chiwe mucowirisaj ri ranima' rumal ri u subunic ri mac.

¹⁴ Je c'ut e jacha' ri alc'ualaxelab re jun ja winak e re xa' junam ti'j xukuje' junam quic', jeri' xukuje' ri Jesus aj ti'j xukuje' aj quic' aj winak, ruc' ri u cämical xuch'äc ri cuinelalaj cämisanel, ri u bixic wa' are' ri itzel.

¹⁵ Chkajiquiba' ka c'u'x chrij aretak c'ä cäbixic: “We quito jas cubij ri Dios camic, micowirisaj ri iwanima', jas ri xquiban ri winak aretak xquiyac woyowal.”

¹⁶ ¿Jachin tak ri xquiyac royowal ri Dios pune' xquita' ri u tzij? Are' conojel ri xebesax ulok pa Ejipt rumal ri Moises.

¹⁷ ¿Jachin tak chquij xc'oji' wi ri royowal ri Dios pa cawinak junab? Are' chquij ri xemacunic, ri are' xecäm can pa ri chaki'j uwo sak.

¹⁸ ¿Jachin chque tak xubij wi ri Dios ri chi'nic ri kas cäban na, chi man queboc ta na ruc' pa ri uxlanem? Are' chquij ri man xeniman taj.

¹⁹ Cäkil c'ut chi man xecuin taj xeboquic rumal rech chi man xecojon taj.