Hebreos 12 - Quiché Bible

Xuwi chkila' ri Jesus

¹ Jeri' xukuje' ri uj, ri sutim kij cumal e q'ui k'alajisanelab ri qui c'utum ri qui cojonic, chkesaj ronojel alal, chkesaj ri mac ri c'o chkij che ka chapic. Chkac'ama' kanim, chkach'ija' ruc' coch'onic ri xiq'uinem ri yo'm chkawäch.

² Xuwi chkila' ri Jesus, ri xutiquirisaj xukuje' cutz'akatisaj na ri ka cojonic. Are xuch'ij ri ripibal man xuya' ta c'u u wäch che ri u q'uixbal ri xelic, rumal rech chi reta'm chi curik na quicotemal. Xt'uyi' c'u pa ri u wiquiak'ab ri u tem ri Dios re ajawibal.

³ Chichomaj rij ri jun ri xuch'ij ronojel ri c'ax ri xban che cumal ajmaquib, rech man quixcos taj, man quixk'itaj ta pa ri iwanima'.

⁴ Maja' quitij i chuk'ab c'ä ruc' ri i quiq'uel, aretak quitij i chuk'ab chrij ri mac.

⁵ Sachinak chic pa i jolom ri pixbenic ri cuya' ri Dios chiwe, jas ri cuya' jun tataxel chque ri e ralc'ual, ri cubij pa ri Tz'ibatalic: “Walc'ual, nim cawil wi ri c'äjisabal a wäch rumal ri Ajawaxel, matk'itajic aretak cäk'alajisax ri a mac rumal.

⁶ Ri Ajawaxel cuc'äjisaj u wäch apachin ri culok'ok'ej, ronojel ri cuc'am che ralc'ual, curapuj.”

⁷ Aretak cäc'äjisax i wäch, chich'ija' wa'. Ri Dios cuban chiwe jas cuban jun tataxel chque ri e ralc'ual. ¿Jachin lo ri alc'ualaxel ri ma ta cäc'äjisax u wäch rumal ri u tat?

⁸ Conojel alc'ualaxelab cäquic'am que ri c'äjisabal qui wäch. We man cäc'äjisax i wäch, ix ba' ri' ri man k'alaj ta u wäch i tat, man ix ta kas alc'ualaxelab.

⁹ Xukuje' ri ka tat cho ri uwächulew xquic'äjisaj ka wäch, nim c'u xekil wi. ¿La ma ta are utz na cäkaya' na kib pa takic che ri ka Tat ri c'o chicaj, rech cujc'asi' na?

¹⁰ E are ri ka tat xa' quieb oxib k'ij xquic'äjisaj ka wäch jas ri xquichomaj chi utz. Are c'u ri Dios cuc'äjisaj ka wäch rech c'o cäkechbej che xukuje' rech cuban tastalic tak winak chke, jas ri are' tastalic Dios.

¹¹ Man c'o ta jun, aretak cäc'äjisax u wäch, ri cuchomaj chi quicotemal pa ri k'ij ri', xane' bisobal. C'äte chi c'ut cuya' na jamaril xukuje' suq'uil pa ri u c'aslemal ri xc'äjisax u wäch, jas jun tico'n cuya' wächinic.

Miwesaj bic ri u to'banic ri Dios

¹² Rumal rech wa', chicojo' qui chuk'ab ri i k'ab ri man c'o ta qui chuk'ab xukuje' ri i ch'ec ri man quechacun ta chic.

¹³ Chebibana' suc'alaj tak qui be ri iwakan, rech ri ch'oco'j man cujal ta u be, xane' cäcunatajic.

¹⁴ Chicojo' ri chuk'ab che ri c'olem pa jamaril cuc' conojel xukuje' ri ruc'axic jun tastalic c'aslemal; we c'u man jewa', man c'o ta jun cäcuinic querila' u wäch ri Ajawaxel.

¹⁵ Chiwila' c'o jun chiwe muya' can ri tok'ob ri cäban chiwe rumal ri Dios, o muban je ta ne jun c'ayalaj k'ayes ri cuban c'ax chque ri niq'uiaj chic xukuje' quebuchuwirisaj,

¹⁶ c'o jun muban macunic cuc' ixokib achijab, o märetzelaj u wäch ri jastak re ri Dios, jas xuban ri Esau, ri xuc'ayij ri u nabealil che u q'uexwäch jun lak riquil.

¹⁷ Iweta'm c'ut, aretak are ta xraj xuc'am ri u tewichibal ri u tat, man xya' ta chi che. Man xya' ta c'u che chi cuq'uex ri u banom canok, pune' sibalaj xok'ic.

Ri juyub Sinai

¹⁸ Man ix opaninak taj chunakaj ri juyub ri cuya' cämakamaxic, ri cänicow pa k'ak', chunakaj ri k'ekmuj, ri k'eku'm xukuje' ri nimalaj quiakik'.

¹⁹ Man i tom ta ri rok'ebal ri trompet xukuje' ri u ch'abal ri Dios ri xtzijonic. Ri winak ri xquito xquibochi'j chi c'o chi jun tzij mäbix chque,

²⁰ rumal rech chi man quecuin ta che u ch'ijic jas ri xetakan wi: “We c'o jun ri cänakajin cho ri juyub, pune' jun awaj, chäcämisax che abaj.”

²¹ Sibalaj xibibal ri xquilo, jeri' chi xubij ri Moises: “Quinxe'j wib, quinbirbitic.”

Ri juyub Sion

²² Are c'u ri ix ix opaninak chunakaj ri juyub Sion, chunakaj ri u tinimit ri c'aslic Dios, ri Jerusalen aj chicaj, chquiwäch e q'uialaj mil tako'n aj caj ri qui mulin quib.

²³ Ix opaninak cuc' ri nabeal tak winak re ri comon cojonelab, ri qui mulin quib, ri e tz'ibam qui bi' pa ri caj. Ix opaninak chunakaj ri Dios, ri qui K'atal Tzij conojel, chquiwäch ri cuxlabal ri suc'alaj tak winak ri e tz'akatisam chic.

²⁴ Ix opaninak chunakaj ri Jesus, ri ch'awenel re ri c'ac' u c'ulwächinic, xukuje' chunakaj ri u quiq'uel ri xchiquichaxic, ri c'o na ri cubij chuwäch ri u quiq'uel ri Abel.

²⁵ Rumal ri' chixoc il mixutuj ri cujch'abenic. E are' tak c'ut ri xquixutuj ri Dios aretak xepixbex rumal waral cho ri uwächulew, man xeto'tajtaj. Mawi c'u ne ri uj man cujto'tajtaj, we are cakaya' ri uwo kachak chuwäch ri cujpixben kas pa ri caj.

²⁶ Are' ri u ch'abal ri Dios xslabesan ri uwächulew ojer. Camic c'ut cubij: “Jumul chi na quinslabesaj man xuwi ta ri uwächulew xane' xukuje' ri caj.”

²⁷ Ri tzij ri', “Jumul chi na”, cubij chi quebesax na ri jastak ri queslabesaxic, are ri e bantajinak, rech quec'oji' na ri jastak ri man queslab taj.

²⁸ Ri ajawibal ri cäkac'am che ri Dios, are man slabel taj. Chujmaltioxin ba' che ri Dios, chkak'ijilaj ri Dios jas ri cäkaj chuwäch, nim chkila' wi, chujmach'al chwäch.

²⁹ Rumal rech chi ri ka Dios are je ta ne jun k'ak' ri ronojel cuporoj canok.