Hebreos 1 - Quiché Bible

Ri Dios xujuch'abej rumal ri u c'ojol

¹ Ri Dios q'ui mul xebuch'abej can ri e ka mam ojer, q'ui qui ch'abexic xubano cumal ri k'axal tak tzij.

² Pa we q'uisbal tak k'ij ri' xujuch'abej rumal ri C'ojolaxel. Ri xucojo chi are' quechben conojel ri jastak, rumal c'u ri are' xebantaj ronojel ri uwächulew xukuje' ronojel ri c'olic.

³ Rumal ri are' cäjuluw ri u juluwem ri Dios. Are u wächbal ri kas u ca'yebal ri Dios. Ri are' ruc'am ronojel ri jastak rumal ri tzij re ri u cuinem. Aretak xujujosk'ij pa ri ka mac, xt'uyi' pa ri u wiquiak'ab ri Dios ri nim u k'ij chicaj.

Ri u c'ojol ri Dios are' nim na u k'ij chquiwäch ri tako'nib aj caj

⁴ Sibalaj xnimarisax na u k'ij chquiwäch ri tako'nib aj caj. Jeri' chi xrechbej jun bi'aj sibalaj utz na chquiwäch ri e are'.

⁵ Mawi jumul xubij ta ri Dios che jun tako'nib aj caj: “At ri' ri nu C'ojol, in xatinwalc'ualaj camic;” mawi xubij ta che jun tako'n aj caj: “In quinux na jun Tataxel che, ri are' c'ut cux na jun C'ojolaxel chwe.”

⁶ Xukuje', aretak xucoj ri u nabeal cho ri uwächulew, xubij: “Chi conojel ri e u tako'nib ri Dios ri e aj caj, chk'ijilax cumal.”

⁷ Cubij c'u ri Dios chquij ri e tako'nib aj caj: “Cubano chi ri e u tako'n aj caj quebux je ta ne quiakik', xukuje' chi ri e pataninel rech quebux je ta ne rak' k'ak'.”

⁸ Che c'u ri C'ojolaxel cubij wi: “Ri a tem re ajawibal, oh Dios, amak'el chbe k'ij sak man q'uisel taj. Bara' re suq'uil ri u bara' ri awajawinic.

⁹ Alok'ok'em ri suq'uil, awetzelam c'u u wäch ri etzelal. Rumal wa' ri Dios, ri a Dios, sibalaj xuya' na quicotemal chawe at chquiwäch ri awachil, je ta ne xuya' aseit pawi'.”

¹⁰ Xukuje' cubij ri Dios: “Ri at, Wajaw pa ri u tiquiritajic xaban ri uwächulew, xukuje' ri caj are u chac ri a k'ab.

¹¹ E are wa' cäsach na qui wäch, ri at c'ut cätc'oji' na. Conojel quek'elob na je jas jun atz'iak.

¹² Quebabot na je ta ne jun c'ul, quejal na je jas jun atz'iak. Ri at c'ut xak at je wi, ri a junab man e q'uisel taj.”

¹³ Mawi c'u jumul xubij ta ri Dios che jun tako'n aj caj: “Chatt'uyul pa ri nu wiquiak'ab, c'ä quebenya' na ri a c'ulel che qui tac'alibal ri e awakan.”

¹⁴ Conojel c'ut ri tako'nib aj caj, e uxlabal ri e c'o pa ri patanijic cho ri Dios e takom ulok che qui patanixic ri winak ri caquechbej ri colotajic.