Gálatas 6 - Quiché Bible

Chito'la' tak iwib chijujunal

¹ Wachalalib, we c'o jun quiriko chi c'o pa jun mac, ix ri utz ri i c'aslemal aj Uxlabaxel, chito' ri je u banom wa' ruc' u ch'uch'ujil iwanima' rech cätzelej pa suq'uil. Chawila' awib, mattakchi'x ne at che mac xukuje'.

² Chito'la' iwib chuxe' tak ri e iweka'n, jeri' quibano jas ri cubij ri u pixab ri Crist.

³ We c'o jun cuchomaj chi c'o u banic, we man c'o ta c'u u banic, xak cusub rib.

⁴ Chquijujunal rajawaxic chunic'oj ri u c'aslemal; c'äte c'u ri' cuna' rib chi cäquicotic, mujunamataj c'u rib cuc' jule' chic.

⁵ Chquijujunal c'ut cäcuc'aj na bic ri kas queka'n.

⁶ Ri jun ri cätijox che ri u tzij ri Dios, rajawaxic cuya' re ri cätijonic re ri e jastak re ri e utz.

⁷ Misub iwib, ri Dios man cuya' taj quetz'bex u wäch. Jas ri u tico'n ri winak, are je u wächinic cuyac na.

⁸ Ri jun cutic ri cäraj ri u rayibal aj winak re mac, cuyac na che ri rayibal re mac ri cämical. Are c'u ri jun ri cutic ri cäraj ri Uxlabaxel, cuyac na che ri Uxlabaxel ri junalic c'aslemal.

⁹ Mäq'uistaj ba ka c'u'x che u banic ri utzil. Cäpe c'u na ri k'ij aretak cäkayac na ri wächinic, we man cujtukaric.

¹⁰ Jeri', joropa' mul ri cujcuin che u banic utzil, chkabana' ba' chque conojel, kas c'u are na chque ri kachalal pa ri cojonic.

Ri Pawl quebupixbej ri cojonelab xukuje' cuya' rutzil qui wäch

¹¹ Chiwilampe' sibalaj nimak tak tz'ib nu tz'ibam bic chiwe ruc' ri nu k'ab.

¹² Ri cäquicoj chuk'ab chiwe che u kopixic ri u wi' ri u tz'umal ri ix achijab wi che iwetal, xuwi cäcaj utz quebil wi cumal ri winak, rech man cäquirik ta c'ax rumal rech ri u ripibal ri Crist.

¹³ Mawi ne ri qui cojom ri u kopixic ri u wi' ri qui tz'umal ri e achijab wi che quetal, mawi cäquinimaj ronojel ri pixab. Are c'u cäcaj chi cäcoj ri etal re kopinic che ri i cuerp, rech cäquinimarisaj c'u quib.

¹⁴ Ri in c'ut man quinwaj taj quinnimarisaj wib, xane' xak xuwi rumal ri u cämical ri Kajaw Jesucrist cho ri ripibal. Rumal c'u ri u cämical cho ri ripibal, cäminak chi ri uwächulew chwe in, xukuje' ri in in cäminak chi che ri uwächulew.

¹⁵ Ri winak ri e jun ruc' ri Crist Jesus, man c'o ta u banic we kopim ri u wi' ri u tz'umal ri e achijab wi che quetal, o man kopim taj. Ri c'o u banic are ri c'ac' winakirisam.

¹⁶ Conojel ri cäquibano jas we takanic ri', xukuje' conojel ri e re ri kas u tinimit ri Dios are ri Dios cuya' jamaril chquixo'l xukuje' quel u c'u'x chque.

¹⁷ Chuq'uisbalil c'ut, wachalal, c'o chi jun mäyo'w latz' chwe. C'o che ri nu cuerp ri retal tak ri c'ax ri nu rikom rumal rech ri Ajawaxel Jesus.

¹⁸ Wachalalib, ri u tok'ob ri Kajaw Jesucrist chc'ol ta pa ri iwanima'. Je chbanok.