Gálatas 3 - Quiché Bible

Ri pixab o ri cojonic

¹ ¡Ay, ri ix aj Galas, xa' man quiwaj taj quixch'obonic! ¿Jachin xixsubuwic, rech man quixniman ta che ri kastzij? Xkatzijoj chiwe, xkac'ut chiwäch chi ri Jesucrist xrip cho ri ripibal.

² Xak xuwi quinwaj quinta' chiwe: ¿La xic'am ri Uxlabaxel rumal ri u nimaxic ri pixab, o rumal rech chi xicoj ri tzijol ri xito?

³ ¿La xa' man quiwaj taj quixch'obonic? i chaplem ulok rumal ri Uxlabaxel. Camic c'ut, ¿la quiq'uis lo ruc' ri i chuk'ab aj winak?

⁴ ¿La xak ta c'u lok' i rikom sibalaj c'ax? Man ya'tal taj chi xak ta lok'.

⁵ Ri Dios ri u yo'm ri Ruxlabal chiwe, xukuje' cuban mayibal chixo'l, ¿jasche cuban we jastak ri'? Man cuban ta lo rumal rech chi i nimam ri pixab, xane' rumal rech chi xicoj ri tzijol ri xito.

⁶ Are ri Abraham xcojon che ri Dios, rumal c'u ri u cojonic xk'alajisax rumal ri Dios chi suc'.

⁷ Chich'obo' ba' chi ri quecojonic, are ri' kas e rija'lil ri Abraham.

⁸ Ri Tz'ibatalic cubij c'u ulok chi ri Dios cuk'alajisaj chi e suc' ri man aj judeyib taj rumal ri cojonic. Xutzijoj ulok ri utzalaj tak tzijol che ri Abraham aretak xubij: “Conojel ri nimak tak tinimit quetewichitaj na rumal awech.”

⁹ Jeri' chi ri quecojonic, quetewichi'xic junam ruc' ri Abraham, ri xcojonic.

¹⁰ Conojel ri qui jiquibam qui c'u'x chrij ri pixab, e c'o chuxe' c'okonic. Tz'ibatal c'ut: “C'okotajinak ronojel jachin ri man cäjeki' ta pa conojel ri jastak ri e tz'ibatal pa ri wuj re ri pixab, che qui banic.”

¹¹ Quel c'u chi sak chi man c'o ta jun cäk'alajisaxic chi suc' chuwäch ri Dios rumal ri pixab. Tz'ibatal c'ut: “Ri suc'alaj winak cäc'asi' na rumal ri cojonic.”

¹² Are c'u ri pixab man c'o ta re che ri cojonic, rumal rech chi cubij: “Ri quebanow we jastak ri', quec'asi' na cumal.”

¹³ Are ri Crist xujcoloben chuxe' ri u c'okonic ri pixab, xux c'u c'okotajinak che ka q'uexwäch. Tz'ibatal c'ut: “C'okotajinak ronojel ri cätzayabax cho jun che'.”

¹⁴ Je xuban wa' rech cäpe ri u tewichibal ri Abraham paquiwi' ri man aj judeyib taj rumal ri Crist Jesus, xukuje' rech rumal ri cojonic, cäkac'am ri Uxlabaxel ri u bim ulok ri Dios chi cuya' na.

Ri pixab xukuje' ri chi'm

¹⁵ Wachalal, quinbij na jun jasach ri cäquiban ri winak, are jun c'ambal no'j chiwe: We jun winak cubij jas ri cuban na ruc' jun chic, cutz'ibaj cho jun wuj, aretak u yo'm chi ri u bi' chuxe', man c'o ta jun cubij chi ma ta kastzij, mawi cuya' u wi'.

¹⁶ Ri Dios xubij ri chi'm che ri Abraham xukuje' chque ri rija'l. Ri Tz'ibatalic man cubij taj: “Chque ri e awija'lil”, je ta ne chquij q'ui, xane' cubij che jun: “Che ri awija'lil”. Are' ri Crist.

¹⁷ Quinbij c'u wa': Ri Dios xuya' che ri Abraham jun c'ulwächinic, xuc'ut chuwäch chi kastzij cuban na jas ri u bim. Rumal wa, oc'owinak chi quiejeb sient ruc' juwinak lajuj (430) junab, aretak xya' ri pixab che ri Moises, ri pixab man cuya' taj cusach u wäch ri chi'm.

¹⁸ We ta cäc'am ri echbal ri cuya' ri Dios rumal ri u nimaxic ri pixab, ma ta cäc'am ri' rumal ri chi'm. Are c'u ri xubij ri Dios pa ri u chi'm chi cuya' na che ri Abraham, xak xusipaj che.

¹⁹ ¿Jas c'u cupatanij ri pixab? Xya'taj che u c'utic jas ri mac cäquiban ri winak, c'ä xpe na we Rija'l ri', ri u bim wi ri u chi'm ri Dios che. Ri pixab yo'm cumal ri tako'nib re ri caj pa u k'ab jun ch'awenel, are ri Moises.

²⁰ Jun ch'awenel man xa ta re jun, are c'u ri Dios xa jun.

Ri u patan ri pixab

²¹ ¿La cubij lo wa' chi ri pixab quebuc'ulelaj ri e u chi'nic ri Dios? Man je taj. We ta xya' jun pixab ri cäcuin che u ya'ic c'aslemal, cäban ta suc' ri' chke rumal ri u nimaxic ri pixab.

²² Ri Tz'ibatalic cuc'utu chi conojel e tz'apital rumal ri mac. Jeri' ri chi'm cäya' chque ri cojonelab rumal ri cojonic che ri Jesucrist.

²³ Aretak c'ä majok cäpe ri cojonic, uj tz'apital rumal ri u pixab ri Moises, je ta ne uj c'o pa che', c'ä xk'alajisax na ri cojonic.

²⁴ Jeri' ri pixab xujuchajij, je jas jun winak cuchajij jun ac'al, che ka c'amic bic ruc' ri Crist, rech cäk'alajisaxic chi uj suc' rumal ri cojonic.

²⁵ Are c'u ri camic ri ulinak chic ri cojonic, man uj c'o ta chic chuxe' ri u takanic ri chajil kech.

²⁶ Iwonojel c'ut ix ralc'ual ri Dios rumal ri cojonic che ri Crist Jesus.

²⁷ Iwonojel c'ut ix junatajinak pa ri Crist, i cojom c'ut ri Crist che iwatz'iak.

²⁸ Man c'o ta c'u aj judeyib, mawi man aj judeyib taj; man c'o ta lok'om pataninel, mawi tzokopitalic; mawi achi, mawi ixok; iwonojel xa' ix jun pa Crist Jesus.

²⁹ We ix rech ri Crist, kas ix rija'lil ri Abraham ri', xukuje' echbenelab jas ri u bim ri Dios pa ri u chi'm ulok che ri Abraham.