Gálatas 2 - Quiché Bible

Ri Pawl cutzijoj jas xubano xc'ulax cumal ri niq'uiaj takomxenlab chic

¹ E oc'owinak chi cajlajuj junab, xinbe chi jumul pa Jerusalen wachil ri Bernabe, xukuje' xinc'am bic ri Tit.

² Xinbec rumal rech chi ri Dios xuc'ut chnuwäch chi rajawaxic jeri' quinbano. Xebench'abej ri quechomaxic chi e c'amal tak be xa' pa qui tuquiel wi, xink'alajisaj ri tzij re colobal ib chquiwäch ri quintzijoj chquixo'l ri man aj judeyib taj. Jewa' xinbano rech man xak ta lok' ri chac ri nu banom xukuje' ri quinban na.

³ Mawi ri Tit ri c'o wuc', pune' are aj grieg, man xcoj ta c'u chuk'ab che chi cäkopix ri u tz'umal ri u wi' ri achi wi che retal.

⁴ Jujun tak subunelab tak achalaxelab quinimom quib chkaxo'l chic'uyal, che u nic'oxic ri ka tzokopixic ri c'o kuc' rumal ri Crist Jesus are ta c'u cäcaj chi cujux ta chi u lok'om pataninelab ri pixab.

⁵ Mawi c'u jun jok'otaj xkaya' ta kib pa qui k'ab, rech cäjeki' ri kastzij re ri tzij re colobal ib iwuc'.

⁶ Man xequiya' ta c'u c'ac' tak tijonic chwe ri etamatal qui wäch chi e c'amal tak be (ri in man cajwataj ta c'u chwe ri e qui banic ulok, ri Dios man are ta cuya' qui k'ij tak ri e wächbalil.)

⁷ Man xquibij ta c'u jun c'ac' takanic chwe, xane' xquilo chi kastzij yo'm pa nu k'ab ri u tzijoxic ri tzij re colobal ib chque ri man aj judeyib taj, je jas ri Lu' yo'm pa u k'ab chi cutzijoj ri utzalaj tak tzij re colobal ib chque ri aj judeyib.

⁸ Are c'u ri Dios ri xuban che ri Lu' chi xoc che takom chque ri aj judeyib, are' xukuje' xbanow chwe in chi xinoc che takom chque ri man aj judeyib taj.

⁹ Ri Santiag, ri Lu' xukuje' ri Xuan, are ri xechomaxic chi nimak qui banic pa ri comon cojonelab, aretak xquich'ob ri tok'ob ri yo'm chwe, xquiya' ri qui k'ab chwe in ruc' ri Bernabe, che u c'utic chi xa' junam ri canima' kuc'. Utz c'u xquil wi chi ri uj cujbe cuc' ri man aj judeyib taj, ri e are' quebe cuc' ri aj judeyib.

¹⁰ Xak xuwi xujquibochi'j chi quenataj ri mebayib chke. Are c'u wa' nu cojom nu chuk'ab in che u banic.

Ri Pawl cutzijoj jas xubij che ri Lu' pa Antioquiy

¹¹ Aretak c'u xopan ri Lu' pa Antioquiy, xinc'ulelaj chupalaj, takal c'u u c'okoxic.

¹² Aretak majok quebopan jujun ri takom ulok rumal ri Santiag, ri Lu' cawa' cuc' ri man aj judeyib taj. Aretak c'u xebopan ri, e u takom ri Santiag, xutas rib chquij ri man aj judeyib taj, man xwa' ta chi cuc', rumal rech chi xuxe'j rib chquiwäch ri aj judeyib.

¹³ Xukuje' ne ri niq'uiaj aj judeyib chic xquijunamaj qui wäch ruc' ri Lu', xquiban quieb qui wäch. Jeri' chi xukuje' ri Bernabe xuban re.

¹⁴ Aretak c'u xinwilo chi man suc' taj quebinic jas ri kastzij re ri tzijol re colobal ib, xinbij che ri Lu' chquiwäch conojel: “We ri at, at aj judey, cäban ri cäquiban ri man aj judeyib taj, man je ta c'ut jas ri aj judeyib, ¿jasche cacoj chuk'ab chque ri man aj judeyib taj rech cäquiban que ri qui nak'atisabal ri aj judeyib?”

Ri aj judeyib xukuje' quecolotaj rumal ri cojonic

¹⁵ Ri uj uj aj judeyib uj alam, man uj ta ajmaquib chquixo'l ri man aj judeyib taj.

¹⁶ Keta'm chi man c'o ta jun winak cäk'alajisaxic chi suc' chuwäch ri Dios rumal ri u nimaxic ri pixab; xane' rumal ri qui cojonic che ri Jesucrist. Ri uj xukuje' xujcojon che ri Crist Jesus, rech cäk'alajisaxic chi uj suc' rumal ri cojonic, man rumal ta ri u nimaxic ri pixab. Man c'o ta c'u jun winak cäk'alajisaxic suc' rumal ri u nimaxic ri pixab.

¹⁷ We c'u ri uj, ri cäkatzucuj chi cäk'alajisaxic chi uj suc' chic chuwäch ri Dios rumal ri Crist, cujriktajic chi uj ajmaquib na, ¿la are lo ri Crist cäbanow ajmaquib chke? Man are taj.

¹⁸ We c'u ri xinwulij, quinyac chi na, cäk'alajinic chi c'o ri nu mac.

¹⁹ Ri in c'ut xincäm chuwäch ri pixab. Are ri pixab xbanow chwe chi xincämic, rech quinc'asi' che ri Dios.

²⁰ Junam xinrip ruc' ri Crist cho ri ripibal. Man in ta chic in c'aslic, xane' are ri Crist c'asal pa ri wanima'. Ri nu c'aslemal pa ri nu cuerp camic, quinwoc'owisaj pa ri cojonic che ri u C'ojol ri Dios, ri xinulok'ok'ej xukuje' xuya' ri u c'aslemal rumal wech.

²¹ Man quinwetzelaj ta u wäch ri u tok'ob ri Dios; we ta c'u cacuyutaj ri u mac jun rumal ri u nimaxic ri pixab, xak ba lok' ri' xcäm ri Crist.