Gálatas 1 - Quiché Bible

Ri Pawl cuya' rutzil wächaj

¹ In, Pawl, in jun takom, man cumal ta winak, mawi xa' in takom rumal jun winak, xane' rumal ri Jesucrist xukuje' rumal ri Dios Tataxel, ri xc'astajisan ri Jesus chquixo'l ri cäminakib.

² In xukuje' conojel ri kachalal ri e c'o wuc' cäkatz'ibaj we wuj ri' chque tak ri comon cojonelab ri e c'o pa Galas.

³ Tok'ob xukuje' jamaril chc'ol ta iwuc' rumal ri Dios ka Tat xukuje' rumal ri Ajawaxel Jesucrist;

⁴ ri are' xuya' ri u c'aslemal rumal rech ri ka mac, che kesaxic pa ri etzelal re we uwächulew ri', jas ri u rayibal ri Dios ka Tat.

⁵ ¡Che c'u chyok wi ri juluwem amak'el chbe k'ij sak! Je chbanok.

Man c'o ta chi jun tzijol re colobal ib

⁶ Quinmayij chi sibalaj chanim xiya' can ri Dios, ri xixsiq'uin rumal ri u tok'ob ri Crist, xiterenej c'u jun tzijol chic.

⁷ Kastzij man c'o ta jun tzijol chic re colobal ib. E c'o c'u jujun ri quixquisacho, are cäcaj cäquiq'uex ri utzalaj tak u tzij ri Crist.

⁸ Pune' ta uj o jun tako'n aj caj cätzijon na jun tzijol re colobal ib chic chiwe, ri man je taj jas ri ka tzijom canok, chk'aj chuxe c'okonic.

⁹ Jas ri ka bim canok, xukuje' camic quinbij chi jumul: We c'o jun cutzijoj jun tzijol chic re colobal ib chiwe, ri man je taj jas ri i c'amom, chk'aj chuxe c'okonic.

¹⁰ Ri in man quintzucuj ta ri utz wilic cumal ri winak, xane' are ri utz wilic rumal ri Dios. ¡We ta c'ä are quinban ri cakaj chquiwäch ri winak, ma ta in u lok'om pataninel chi ri' ri Crist!

Xubij ri Pawl jas xubano xoc che takom

¹¹ Quinya' retamaxic chiwe, wachalal, chi ri tzij re colobal ib ri nu tzijom, man are' ta qui chomanic ri winak.

¹² Man xinc'am ta ri utzalaj tak tzij che jun winak, mawi xintijox rumal jachin jun, xane' are ri Jesucrist xk'alajisan chnuwäch.

¹³ I tom chi c'ut jas ri xinban ojer aretak junam nu wäch cuc' ri aj judeyib. Sibalaj xinban c'ax che ri u comon cojonelab ri Dios, are ta ximwaj xinsach u wäch.

¹⁴ Pa ri qui cojonic ri aj judeyib, sibalaj utz na xinban in chquiwäch q'ui nu winakil ri xa' junam qui junab wuc'. Sibalaj xinoc na il chque ri qui nak'atisabal can ri e nu mam.

¹⁵ Are c'u ri Dios xinucha' ulok aretak c'ä majok quinalaxic, xinusiq'uij rumal ri u tok'ob. Aretak xkaj chuwäch,

¹⁶ xuk'alajisaj ri u C'ojol chnuwäch, rech quintzijoj chquixo'l ri man aj judeyib taj. Aretak xc'ulmataj wa' man xinta' ta nu no'j che jun winak.

¹⁷ Mawi xinpaki' pa Jerusalen cuc' ri nabe xeboc che takom chnuwäch in. Xane' xinbe pa Arab, c'äte ri' xintzelej ulok pa Damasc.

¹⁸ E oc'owinak chi oxib junab, xinpaki' pa Jerusalen, che retamaxic u wäch ri Lu'. Olajuj k'ij xinc'oji' ruc'.

¹⁹ Man c'o ta chi jun xinwil u wäch chque ri takomxenlab, xane' xuwi ri Santiag ri rachalal ri Ajawaxel.

²⁰ Ri quintz'ibaj bic chiwe, ri Dios quilowic chi kastzij ri quinbij.

²¹ Te c'u ri' xinbe pa tak ri ulew re Sir xukuje' re Silisiy.

²² Man etamatal ta c'u ne nu wäch cumal ri comon cojonelab re ri Crist ri e c'o pa Judey.

²³ Xak xuwi qui tom u bixic: “Ri jun ri xuban c'ax chke nabe canok, camic cutzijoj chi ri cojonic ri xraj xusach u wäch.”

²⁴ Xquinimarisaj c'u u k'ij ri Dios rumal wech.