Filipenses 2 - Quiché Bible

Ri Crist man xunimarisaj ta rib pune' sibalaj nim u k'ij

¹ We ri Crist cuya' i chuk'ab, we ri lok'ok'ebal u c'u'x cucu'bisaj i c'u'x, we c'o u comonixic ri Uxlabaxel iwuc', we c'o jun ja'laj c'uxaj iwuc' xukuje' we quel i c'u'x chque niq'uiaj chic,

² chitz'akatisaj ba' ri nu quicotemal: xa' junam chixchomanok, chilok'ok'ela' iwib, xa jun iwanima', xa' jun i chomanic.

³ C'o jas mibano ri xa' ta che u nimarisaxic i k'ij, o rech quixux ta nimak i banic, xane' chi mach'arisaj iwib chich'obo' chi ri niq'uiaj chic e are' nimak na qui k'ij chiwäch ix.

⁴ C'o jun mutzucuj xuwi ri kas utz che, xane' xukuje' ri utz na chque ri jule' chic.

⁵ Chc'ol ta ba' iwuc' we chomanic ri' ri xc'oji' ruc' ri Crist Jesus.

⁶ Ri pune' junam u wächbal ruc' ri Dios man xuna' ta rib chi junam ta ruc' ri Dios ri xucoj ta pa u tzij.

⁷ Xuya' c'u can ri u c'olbal ri nim u k'ij ruc' ri Dios, are' xuc'am ri u wächbal jun lok'om pataninel, xalaxic jacha' winak.

⁸ Aretak xuna' rib chi je u banic jas jun winak, xumach' rib, xniman c'ä pa ri cämical, jun cämic c'ut re ripibal.

⁹ Rumal c'u ri' ri Dios sibalaj xunimarisaj na u k'ij chquiwäch conojel, xuya' jun u bi' ri c'o na paquiwi' conojel ri bi'aj,

¹⁰ rech pa u bi' ri Jesus caquimej wi na ri qui ch'ec ri e c'o pa ri caj ri e c'o cho ri uwächulew xukuje' ri e c'o chuxe' uwächulew.

¹¹ Rech conojel cäquich'obo xukuje' cäquibij chi ri Jesucrist are Ajawaxel, jeri' cänimarisax u k'ij ri Dios Tataxel.

Ri ajcristib e jacha' chäj cho ri uwächulew

¹² Je c'u ri', lok'alaj tak wachalal, jas ri i nimanic amak'el aretak in c'o iwuc' nabe, camic xukuje' sibalaj chixniman na pune' man in c'o ta chi iwuc'. Chicojo' i chuk'ab chi utz ri i c'aslemal ix colotajinak chi c'u ne', nim chi wila' wi ri Dios, china' iwib chuwäch.

¹³ Are c'u ri Dios cayo'w pa ri iwanima' ri u rayixic u banic ri cakaj chuwäch.

¹⁴ Pa ronojel ri quibano, xak mixch'ach'atic, mixch'ojinic.

¹⁵ Rech jeri' man c'o ta etzelal cäriktaj chiwij, ix ralc'ual ri Dios, man c'o ta mac pa ri i c'aslemal, ix je ta ne chäj quixjuluw chquixo'l ri itzel tak winak ri e c'o cho ri uwächulew camic, ri man e suc' taj,

¹⁶ pa ri u k'alajisaxic ri tzij re c'aslemal chquiwäch. Jeri' quinquicot na iwumal pa ri k'ij aretak cäpe ri Crist, weta'm chi man xak ta lok' xinc'am wanim pa ri binem, man xak ta lok' xintij nu chuk'ab pa ri nu chac.

¹⁷ Pune' cäpil na ri kas nu c'aslemal che u tz'akatil ri sipanic ri quiya' ix che ri Dios rumal ri i cojonic, in quinequicotok, ix c'u joch'ob quixquicot wuc'.

¹⁸ Jeri' chixquicotok, xukuje' chixquicot ba' wuc' in.

Ri Timotey xukuje' ri Epaprodit

¹⁹ We are u rayibal ri Ajawaxel Jesus, pa quieb oxib k'ij quinwaj quintak bic ri Timotey iwuc', rech quinto jas ri i banom, quinquicot c'u na.

²⁰ Man c'o ta chi c'u jun ri junam ta u chomanic wuc' in, ri kas coc il chiwe.

²¹ Conojel c'ut cäquitzucuj ri xa' quech ri e are', man are ta c'u ri rech ri Crist Jesus cäquitzucuj.

²² Iweta'm chic chi ri Timotey utzalaj chac u banom, cächacun wuc' in che u tzijoxic ri tzij jas jun c'ojolaxel cuto' ri u tat.

²³ Quinwaj c'ut chi are' quintak bic iwuc' chanim, aretak quinwetamaj jas cuban ri jastak chnuwäch in.

²⁴ Cu'l nu c'u'x chrij ri Ajawaxel, chi pa quieb oxib k'ij xukuje' ri in quinbe na iwuc'.

²⁵ Quinchomaj chi rajawaxic xukuje' quintak na bic ri kachalal Epaprodit iwuc', are wäch ajchac, je ta ne wäch ajch'o'j, ri xitak ulok che nu to'ic aretak c'o rajawaxic chwe.

²⁶ Ri are' sibalaj cäraj cäril i wäch iwonojel. Sibalaj c'u xbisonic rumal rech chi xito chi u rikom yabil.

²⁷ Kastzij xurik yabil, xa' jubik' xraj man xcämic. Are c'u ri Dios xel u c'u'x che, man xuwi ta che ri are', xane' xukuje' chwe in, rech man quinrik ta nimalaj bis chuwäch ri bis ri nu rikom.

²⁸ Rumal ri' sibalaj quinwaj quintak bic ri Epaprodit iwuc', rech quixquicotic aretak quiwil chi jumul u wäch, rech ri in man kas ta quinbison chic.

²⁹ Chic'ulaj ba' pa ri Ajawaxel ruc' nimalaj quicotemal. Nim chebiwila wi ri je qui banic jas ri are'.

³⁰ Rumal c'u rech ri u chac ri Crist, xa' jubik' xraj man xcämic. Man xoc ta c'u il che ri u c'aslemal, xa' rumal ri u banic tok'ob chwe. Xubano jachique ri man xixcuin ta ix che u banic.