Filipenses 1 - Quiché Bible

Ri Pawl cuya' rutzil qui wäch

¹ In Pawl xukuje' ri Timotey, uj u lok'om tak pataninelab ri Jesucrist, cäkatz'ibaj bic we wuj ri' chque conojel ri cojonelab pa Crist Jesus ri e c'o chila' pa Pilips, xukuje' chque ri cojonelab ri quesolin conojel ri ajcristib xukuje' chque ri cojonelab ri quepataninic.

² Are ri Dios ka Tat xukuje' ri Ajawaxel Jesucrist cuban tok'ob chiwe xukuje' cuya' jamaril chixo'l.

Ri Pawl cuban ch'awem ruc' Dios paquiwi' ri cojonelab

³ Amak'el aretak quixnataj chwe, quinmaltioxin che ri nu Dios.

⁴ Amak'el aretak quinban ch'awem ruc' quicotemal quinbochi'j ri Dios piwi' iwonojel,

⁵ rumal rech chi junam ix chacuninak wuc' che u tzijoxic ri utzalaj tak tzij, kas pa ri nabe k'ij c'ä camic.

⁶ Cu'l nu c'u'x chi ri Dios, ri xuchaplej ri utzalaj chac pa ri i c'aslemal, cutz'akatisaj na c'ä pa ri k'ij aretak cätzelej na ulok ri Jesucrist.

⁷ Suc' ri nu chomanic chiwe iwonojel, rumal rech chi ix c'o pa wanima'. Aretak in c'o pa che', aretak quintzijoj chque ri winak jasche quincojon che ri tzij re colobal ib xukuje' quink'alajisaj chquiwäch chi are' ri kastzij, ix wachil pa ri u tok'ob ri Dios.

⁸ Ri Dios reta'm, chi sibalaj quixinwaj iwonojel ruc' ri lok'ok'ebal u c'u'x ri Jesucrist.

⁹ Quinban ch'awem ruc' Dios piwi' rech sibalaj caq'uiyir na ri i lok'ok'ebal c'u'x, xukuje' ri i no'jinic xukuje' ri i ch'obonic pa ronojel.

¹⁰ Jeri' quixcuin che u ch'obic jas ri kas utz na u banic, rech man xa' ta quieb iwanima' xukuje' ma ta c'o k'atbal cäriktaj chiwij aretak cäpe ri Crist.

¹¹ Ix nojinak chque tak wächinic re suq'uilal, ri e rumal ri Jesucrist che u juluwem xukuje' che u ya'ic u k'ij ri Dios.

Ri c'aslemal chwe in are ri Crist

¹² Wachalal, quinwaj quiwetamaj chi ri c'ax ri nu rikom, rumal wa' sibalaj xtzijox ri tzij re colobal ib.

¹³ Jeri' conojel ri ajch'ojab ri e c'o pa ri rachoch ri ajawinel, cuc' ri niq'uiaj chic, queta'm chi in c'o pa che' rumal rech ri Crist.

¹⁴ E q'ui chque ri kachalal, aretak xquito chi in c'o pa che', sibalaj xquichajij anima' che u tzijoxic ri u tzij ri Dios man ruc' ta xe'n ib.

¹⁵ Jujun cäquitzijoj ri Crist rumal quiäk rayinic xukuje' nimarisabal ib, jujun chi c'ut xukuje' rumal utzalaj rayinic.

¹⁶ Ri jujun cäquitzijoj ri Crist ruc' lok'ok'ebal c'u'x. Queta'm c'ut chi in c'o waral che u to'ic u wi' ri u tzijoxic chi kastzij ri tzij re colobal ib.

¹⁷ Ri niq'uiaj chic caquitzijoj ri Crist xa' rumal u banic c'ax, man ruc' ta u ch'ajch'ojil ri canima'. Xane' are cäcaj chi sibalaj quinrik na c'ax waral pa che'.

¹⁸ ¿Jas lo we in che ronojel ri cäquiban ri winak? Ruc' ronojel ri cäquibano, we che esbal ib, we ruc' kastzij, are cätzijox ri Crist. Quicotemal c'ut cuc'am ulok chwe in, quinquicot c'u na.

¹⁹ Weta'm chi ronojel wa' utz quel na chwe in, rumal ri i ch'awem ruc' Dios panuwi' xukuje' ri Uxlabaxel re ri Jesucrist ri quinuto'o.

²⁰ Je c'u quel na jas ri quinwaj. Cu'l nu c'u'x chi man quel ta nu q'uixbal, xane' quintzijon na camic jas ri amak'el nu banom, man quinxe'j ta wib. Jeri' cänimarisax na u k'ij ri Crist rumal ri quinban pa ri nu cuerp, we quinc'asi'c o we quincämic.

²¹ Ri c'aslemal chwe in are ri Crist. We c'u quincämic, xa' ch'äcanic ri' chwe in.

²² We c'u quinc'asi' na pa ri nu cuerp, utz ri' rumal rech chi quinchacun na pa ri u chac ri Ajawaxel. Man weta'm taj jachique ri utz na, we utz quincämic, o are utz quinc'asi' na.

²³ Man quinrik taj jachique we quieb ri' quincha'o. Quinwaj quincämic, quinel cho we uwächulew rech quinec'ol ruc' ri Crist. Are wa' sibalaj utz na.

²⁴ Are c'u rajawaxic chiwe ix, chi quinc'asi' na waral pa ri nu cuerp.

²⁵ Cu'l nu c'u'x chrij wa', weta'm chi quinc'asi' na, quinc'oji' na iwuc' iwonojel, rech quixcowiric xukuje' quixquicot na pa ri i cojonic.

²⁶ Jeri' sibalaj quixquicot na pa ri u bi' ri Crist Jesus rumal ri nu c'olem jumul chic iwuc'.

²⁷ Xak xuwi chibana' pa ri i c'aslemal jas ri takal che ri tzij re colobal ib ri u bim ri Crist. Jeri' we quinbe che iwilic o man quinbe taj, quinta' i tzijol chi co ix tac'alic, xa' jun iwanima', xa' jun i chomanic, junam quixchacun che u tzijoxic ri cojonic re ri tzij re colobal ib.

²⁸ Man c'o ta quixe'j wi iwib chquiwäch ri cäquiban qui c'ulel chiwe. Are c'utbal wa' chi ri e are' cäsach na qui wäch, are c'u ri ix quixcolotaj na. Are wa' rumal ri Dios.

²⁹ Rumal c'u rech ri Crist, man xuwi ta ya'tal chiwe chi quixcojon che, xane' xukuje' chi quirik c'ax rumal rech.

³⁰ Ri ix xukuje' ri in, uj c'o pa ri kas junam tijow chuk'ab ri iwilom chi in c'o wi, xukuje' ri i tom chi in c'o wi.