Filemón 1 - Quiché Bible

Ri Pawl cuya' rutzil u wäch ri Pilemon

¹ In Pawl, in c'o pa che' rumal rech ri Crist Jesus, junam ruc' ri kachalal Timotey quintz'ibaj we wuj ri' chawe, lok'alaj Pilemon, at kach ajchac,

² xukuje' che ri lok'alaj kachalal chuchu' Apia, che ri Arquip ri kachil pa ri ch'o'j, xukuje' chque ri e rech ri comon cojonelab ri cäquimulij quib cho awachoch.

³ Are ta ri Dios ka Tat xukuje' ri Ajaw Jesucrist cuban tok'ob chiwe xukuje' cuya' jamaril chiwe.

Ri lok'ok'ebal u c'u'x xukuje' ri u cojonic ri Pilemon

⁴ Quinmaltioxin che ri nu Dios, aretak catnataj chwe amak'el pa ri nu ch'awem ruc' Dios.

⁵ Nu tom a tzijol chi calok'ok'ej xukuje' c'o a cojonic che ri Ajaw Jesus. Xukuje' nu tom a tzijol chi quebalok'ok'ej conojel ri tastalic tak winak xukuje' cak'alajisaj ri a cojonic chque.

⁶ Quintz'onoj c'u che ri Dios chi ri at, ri a c'amom awech ri ka cojonic, chatcuin che utzalaj qui ch'obic conojel tak ri tewichibal ri e ka rikom rumal ri Crist Jesus.

⁷ Cu'l ka c'u'x xukuje' cujquicotic rumal ri lok'ok'ebal a c'u'x, rumal rech chi a yo'm uxlanem che ri canima' ri cojonelab, wachalal.

Ri Pawl cutz'onoj tok'ob puwi' ri lok'om pataninel Onesimo

⁸ Rumal ri', pune' man quinxe'j ta wib catintak che u banic jas ri rajawaxic cabano rumal rech chi in takom re ri Crist,

⁹ xak c'u quitz'onoj tok'ob chawe, rumal rech chi catinlok'ok'ej. In wa' in, Pawl, in nim winak chic, camic in c'o pa che' rumal rech ri Crist Jesus,

¹⁰ quinta' jun tok'ob puwi' ri nu c'ojol Onesimo, ri xux je ta ne nu c'ojol waral pa che'.

¹¹ Ri are' man c'o ta u patan chawe nabe. Camic c'ut c'o chi u patan chawe, xukuje' chwe in.

¹² Quintak bic awuc'. Chac'ulaj ba', je ta ne ri kas are' ri wanima'.

¹³ Man quinwaj taj quintzokopij bic, quinwaj ta ne chi cäcanaj can wuc', rech quinupatanij che a q'uexwäch aretak in c'o pa che' rumal rech ri utzalaj tak tzij.

¹⁴ Man c'o ta jas quinwaj quinbano ri ma ta xinta' na ri a no'j, rech ri tok'ob ri caban na chwe man xa' ta at ch'ijom che u banic, xane' caban na ruc' ronojel awanima'.

¹⁵ Cäraj ne rumal rech wa' ri Onesimo xutas rib chawij quieb oxib k'ij, rech cäc'oji' awuc' amak'el chbe k'ij sak,

¹⁶ cäc'oji' na awuc' man jacha' ta chic jun lok'om pataninel, xane' c'o na chuwäch jun lok'om pataninel, jun lok'alaj awachalal. Ri are' lok' chnuwäch in, sibalaj lok' c'u na chawäch at, man xuwi ta jas jun winak, xane' xukuje' jas jun awachalal pa ri Ajawaxel.

¹⁷ Je c'u ri', we cachomaj chi in awachalal, chac'ulaj ri Onesimo je ta ne ri in.

¹⁸ We c'o c'u jun c'ax u banom chawe, o c'o u c'as awuc', chatok'ij chwe in.

¹⁹ In, Pawl quintz'ibaj ruc' ri nu k'ab: in quintojow na, ¡cuya' ta c'u ne ri' quinbij chawe chi a c'as awib pa nu k'ab!

²⁰ Je, wachalal, chabana' jun tok'ob chwe pa ri Ajawaxel. Chaya' uxlanem che ri wanima' pa ri Crist.

²¹ Quinjiquiba' nu c'u'x chawij, chi canimaj ri nu tzij. Rumal ri' xintz'ibam bic awuc'. Weta'm c'ut chi coc'ow u wi' ri caban na chuwäch ri quintz'onoj chawe.

²² Chasuc'umaj c'u apan ri wokxanibal. Cu'l c'u nu c'u'x chi rumal ri i ch'awem ruc' Dios, ri Dios cuya' na chiwe chi quinopan iwuc'.

Chuq'uisbalil ri Pawl cuya' rutzil u wäch ri Pilemon

²³ Ri Epapras cuya' rutzil a wäch, are wachil pa che' rumal rech ri Crist Jesus.

²⁴ Xukuje' ri Marcux, ri Aristarc, ri Dems xukuje' ri Lucax, ri e wäch tak ajchaquib, cäquiya' rutzil a wäch.

²⁵ Ri u tok'ob ri Ajaw Jesucrist chc'ol ta ruc' ri iwanima'.