Elem 6 - Quiché Bible

¹ Xubij c'ut ri Ajawaxel che ri Moises: “Cawil c'u na ri quinban che ri ajawinel, xak xuwi c'ut rumal ri chuk'ab cuya' na chiwe chi quixel bic pa ri rulew; c'o chi c'u na jubik', kas are' cäbin na chiwe chi quixel bic.”

Ri Dios cutzijobej chi jumul ri Moises

² Xtzijon chi jumul ri Dios ruc' ri Moises, xubij che: “IN RI' RI AJAWAXEL.

³ Xinc'ut wib chuwäch ri Abraham, ri Isaac, ri Jacob, ruc' ri bi'aj: Dios ri c'o ronojel u cuinem, man xink'alajisaj ta c'u ri kas nu bi' chquiwäch: RI AJAWAXEL.

⁴ Xinban xukuje' jun c'ulwächinic cuc', xinya' c'u nu tzij chi quinya' ri ulew re Canaan chque, ri ulew ri xcokxanij wi na quib quieb oxib junab.

⁵ Camic c'ut chi wetamam chi cätajin cäquirik c'ax ri aj israelib, chi e cojom pa c'axalaj tak chac cumal ri aj ejiptib, xnataj c'ut ri nu c'ulwächinic chwe.

⁶ Rumal ri' jät jabij chque ri aj israelib chi ri in, ri Ajawaxel, quebenwesaj na chuxe' ri u takanic ri ajawinel xukuje' pa ri c'axalaj tak chac ri e cojom che qui banic cumal ri aj ejiptib. Quinc'ut na ri nu cuinem, quebentor na bic cumal nimak tak banoj aj suq'uilal.

⁷ Quixinc'am na ix jacha' che nu tinimit, are c'u ri in quinux na i Dios. Jeri' quiwetamaj na chi in ri' ri Ajawaxel ri i Dios, ri cätajin quixresaj chuxe' ri c'axalaj tak chac ri ix takom che qui banic cumal ri aj ejiptib.

⁸ Quixinc'am na bic pa ri ulew ri xinbij chi quinya' che ri Abraham, ri Isaac xukuje' ri Jacob, quinya' c'u na chiwe che iwechbal. In ri' ri Ajawaxel.”

⁹ Ri Moises xuya' u bixic wa' chque ri aj israelib, ri e are' c'ut man xquicoj taj ri xbix chque rumal ri c'axalaj tak chac ri e cojom wi.

¹⁰ Xubij c'u ri Ajawaxel che ri Moises:

¹¹ “Jät, jabij che ri ajawinel chi chuya' be chque ri aj israelib chi quebel bic pa Ejipt.”

¹² Ri Moises xubij che ri Ajawaxel: “Mawi ne ri aj israelib cäquinimaj ri quinbij chque, ¿la are ta c'u lo quinunimaj ri ajawinel, xak c'u quinmemetic?”

¹³ Are c'u ri Ajawaxel xutak ri Moises xukuje' ri Aaron rech cäquibij chque ri aj israelib xukuje' che ri ajawinel chi yo'm takanic chque ri rajawaxic u tz'akatisaxic che quesaxic bic ri aj israelib pa Ejipt.

Ri e qui bi' ri e u mam ri Aaron xukuje' ri Moises

¹⁴ E are tak wa' ri e c'amal tak qui be ri alaxic, ri e rech ri qui tat. Ri e u c'ojol ri Ruben (ri u nabeal ri Israel) e are' wa': ri Hanoc, ri Palu, ri Hezron, ri Carmi. E are wa' ri nimak qui k'ij ri e rech ri Ruben.

¹⁵ Ri e u c'ojol ri Simeon e are wa': ri Jemuel, ri Jamin, ri Ohad, ri Jaquin, ri Zohar xukuje' ri Saul, ri ral jun aj cananey. E are wa' ri nimak qui k'ij ri e rech ri Simeon.

¹⁶ Ri Levi xc'asi' jun sient ruc' juwinak wuklajuj (137) junab, e are wa' ri qui bi' ri e u c'ojol, cächapletaj ruc' ri nabeal queq'uis ruc' ri ch'i'p, ri Jerson, ri Coat, ri Merar.

¹⁷ Ri e u c'ojol ri Jerson pa ri u cholajil ri nimak qui k'ij, e are ri Libni xukuje' ri Simeiy.

¹⁸ Ri Coat xc'asi' jun sient ruc' juwinak oxlajuj (133) junab, ri e u c'ojol e are ri Amram, ri Izar, ri Hebron, ri Uziel.

¹⁹ Ri e u c'ojol ri Merar e are ri Mali xukuje' ri Musi. E are wa' ri nimak qui k'ij ri e rech ri Levi cächapletaj ruc' ri nabeal queq'uis ruc' ri ch'i'p.

²⁰ Ri Amram xc'uli' ruc' ri Jocabed rana'b ri u tat, ri Jocabed xralaj ri Aaron xukuje' ri Moises. Ri Amram xc'asi' jun sient ruc' juwinak wuklajuj (137) junab.

²¹ Ri e u c'ojol ri Izar are ri Core, ri Nepeg xukuje' ri Zicr.

²² Ri e u c'ojol ri Uziel are ri Misael, ri Elzapan xukuje' ri Sitri.

²³ Ri Aaron xc'uli' ruc' ri Elisabet u mia'l ri Aminadab, rana'b ri Naason, ri Elisabet xralaj ri Nadab, ri Abiu, ri Eleazar xukuje' ri Itamar.

²⁴ Ri e u c'ojol ri Core e are ri Asir, ri Elcan xukuje' ri Abiasap. E are wa' ri nimak qui k'ij ri e quech ri aj coretib.

²⁵ Ri Eleazar jun chque ri e u c'ojol ri Aaron, xc'uli' ruc' jun chque ri u mia'l ri Putiel, ri xralaj ri Pinees. E are' tak wa' ri e c'amal tak qui be ri e aj levitib, pa ri qui cholajil ri nimak qui k'ij.

²⁶ Kas e are' wa' ri Aaron xukuje' ri Moises ri xubij wi ri Ajawaxel chi quequesaj bic pa Ejipt ri aj israelib, quicholajim quib e jacha' juk'at ajch'ojab.

²⁷ E are' wa' ri Moises xukuje' ri Aaron ri xebin che ri paraon ri ajawinel re Ejipt, chi quequesaj bic ri aj israelib pa Ejipt.

Ri Dios cusiq'uij ri Moises rachilam ri Aaron

²⁸ Pa tak ri k'ij aretak ri Ajawaxel xtzijon ruc' ri Moises pa Ejipt,

²⁹ xubij che: “In ri' ri Ajawaxel. Chabij ronojel ri quinbij chawe che ri paraon ri ajawinel re Ejipt.”

³⁰ Ri Moises xubij che ri Ajawaxel: “Ajawaxel, eta'm ya' la chi xak cämemat quinch'awic, ¿la quinunimaj ta c'u lo ri ajawinel?”