Elem 5 - Quiché Bible

Ri Moises rachilam ri Aaron quech'aw ruc' ri paraon

¹ Oc'owinak chi c'u wa', ri Moises rachilam ri Aaron xebe che u bixic che ri ajawinel ri paraon xquibij c'u che: “Jewa' u bim ri Ajawaxel ri u Dios ri Israel: ‘Chatzokopij bic ri nu tinimit pa ri chaki'j uwo sak, rech cubana' jun nimak'ij chila' che u ya'ic nu k'ij.’ ”

² Xubij c'u ri ajawinel che ri Moises: “¿Jachin ri' ri Ajawaxel rech quinnimaj ri cubij, quebentzokopij ta c'u bic ri aj israelib? Man weta'm ta u wäch ri Ajawaxel, mawi quebentzokopij ta bic ri aj israelib.”

³ Ri Moises ri Aaron, xquibij che ri ajawinel: “Ri qui Dios ri aj hebreyib petinak che ka rikic; rumal ri' cujbe na pa ri chaki'j uwo sak, oxib k'ij be cäkaban na, quekaya' c'u tabal tok'ob chuwäch ri Ajawaxel ri ka Dios, mebutak c'u ne ulok ch'o'j o yabil pakawi' che ka cämisaxic.”

⁴ Ri ajawinel re Ejipt je xubij wa' chque: “Moises xukuje' ri at Aaron, ¿jasche quiya' latz' chque ri winak che u banic ri qui chac? Chquitakej na u banic ri qui chac.”

⁵ Xubij c'u ri ajawinel che ri Moises xukuje' che ri Aaron: “Camic ri e q'uiyirinak chic ri aj israelib pa Ejipt, ¿la quebek'il ta c'u che u banic ri qui chac?”

⁶ Pa ri k'ij ri' ri ajawinel xuya' takanic chque ri takanelab xukuje' chque ri quesolin ri chac, xubij chque:

⁷ “Miya' chic pajo chque ri aj israelib che qui banic ri xan, jas ri takem ulok u banic; cheboj ri e are' che u molic ri pajo.

⁸ Chibij c'u chque chi c'o mäquesaj che ri rajilabal ri xan ri quequijach ronojel k'ij. Mawi jun xan cäquesaj che. Xa c'u e jujun tak sak'orib rumal ri' cäquirak qui chi', cäquibij: ‘¡Jo' che u ya'ic tabal tok'ob chuwäch ri ka Dios!’

⁹ Chibana' chque we winak ri' chi sibalaj chquicojo' qui chuk'ab che u banic ri qui chac; chebiya' sibalaj chac chquiwäch, rech man are ta cäbe qui c'u'x cuc' ri banoj tak tzij ri cäbix chque.”

¹⁰ Ri takanelab xukuje' ri quesolin ri chac, xebe che u bixic chque ri aj israelib, “ri ajawinel u yo'm takanic chi man cäya' ta chic pajo chiwe.

¹¹ Ix quixbe na che u molic apawije' ta ne ri quirika' wi ulok. Man c'o ta c'u quiwesaj che ri rajilabal ri xan ri bim chiwe chi quijacho.”

¹² Ri aj israelib xquijabuj quib pa ronojel ri Ejipt, che u molic k'ayes rech cäquicoj che u q'uexwäch pajo.

¹³ Ronojel k'ij ri e u takanelab ri ajawinel cäquicoj qui chuk'ab chque ri solil tak qui chac ri aj israelib rech xa junam cajilabal ri xan cäquijacho jacha' ri cäquijach nabe aretak cäya' pajo chque,

¹⁴ xukuje' ri takanelab quequich'ay ri quesolin ri qui chac ri aj israelib, quecha' c'u chque: “¿Jasche mawi ri iwir mawi ri camic xitz'akatisaj ri cajilabal ri xan jas ri quiban can nabe?”

¹⁵ Ri e solil tak qui chac ri aj israelib xequich'a' che ri ajawinel, xquibij che: “¿Jasche cäban la c'ax chque ri pataninelab la?

¹⁶ Man cäya' ta chi la pajo chke cacoj c'u chuk'ab chke chi quekaban ri xan, xak c'u u wi' chic cujch'ay cumal ri takanelab la. ¡Ri c'o qui mac e are ri winakil la!”

¹⁷ Xubij c'u ri ajawinel chque: “¡Ri ix man jas ta i banic xane' ix sak'orib! Rumal ri' quitzijola' chixo'l, quibij: ‘Jo' che u ya'ic tabal tok'ob chuwäch ri Ajawaxel.’

¹⁸ Jix ba' pa ri chac. Pune' ta ne man cäya' i pajo, rajawaxic c'ut junam cajilabal ri xan quijacho,” xcha' ri ajawinel chque.

¹⁹ Ri solil tak qui chac ri aj israelib man cäquirik ta chic jas cäquibano, aretak xbix chque chi man c'o ta cäquesaj che ri cajilabal ri xan ri quequijach ronojel k'ij.

²⁰ Aretak xebel ulok ri solinelab chuwäch ri ajawinel, xquirik quib ruc' ri Moises rachil ri Aaron ri e eyeninak,

²¹ xquibij c'u chque: “Chrila' ri Ajawaxel ri i banom chke, xukuje' chuc'äjisaj i wäch. Ix ri ix ajchak'mac chi ri ajawinel e rachil ri e u takanelab itzel cujquilo. Kas ix ix yowinak ri ch'ich' re ch'o'j pa u k'ab che ka cämisaxic.”

Ri Moises catzijon ruc' ri Dios

²² Xubij c'ut ri Moises che ri Ajawaxel pa ch'awem: “Ajawaxel, ¿jasche cäban la c'ax che we tinimit ri'? ¿Jasche in takom la ulok?

²³ Kas aretak xinpe che u tzijobexic ri ajawinel pa ri bi' la', u nimatajisam u banic c'ax che ri tinimit la, are c'u ri lal man c'o ta jas banom la che u to'ic.”