Elem 39 - Quiché Bible

Caban ri catz'iak ri e cojol tabal tok'ob

¹ Quem azul, quem morato', quiäk quem xcoj che qui banic ri atz'iak re ri patanijic pa ri k'ijilabal. Xukuje' je xcoj che u banic ri ratz'iak ri Aaron ri nim u banic, jacha' ri takanic ri xuya' ri Ajawaxel che ri Moises.

² K'an puak, quem azul, quem morato', quiäk quem, tumim lino xcoj che u banic ri atz'iak nim u k'ij.

³ Xequiban liq'uilak tak k'an puak ruc' bajibal, xequikopij c'ut xquiban bätz' chque rech quetz'ot xo'l tak ri quem azul, ri quem morato', ri quiäk quem xukuje' ri pa ri lino.

⁴ Xecoj quieb ximibal puwi' ri u teleb ri atz'iak ri nim u k'ij ri cäquirik wi quib ri quieb qui tza'm.

⁵ Ri pas ri cächapow ri atz'iak ri nim u k'ij, xa junam qui banic banom: re k'an puak, re quem azul, quem morato', quiäk quem xukuje' tumim lino, jacha' ri takanic ri xuya' ri Ajawaxel che ri Moises.

⁶ Ri abaj re tak cornalin xecoj, chupam k'an puak, xetzoc' ri qui bi' ri e u c'ojol ri Israel chuwäch, jacha' jun t'ikbal.

⁷ Ri Bezaleel xebucoj paquiwi' ri ximibal ri c'o puwi' ri u teleb ri atz'iak ri nim u k'ij, che qui nataxic ri e u c'ojol ri Israel, jacha' ri takanic ri xuya' ri Ajawaxel che ri Moises.

⁸ Ri cäya' cho c'uxaj xukuje' coc'alaj u t'isic xbanic jacha' ri atz'iak i nim u k'ij: re k'an puak, re quem azul, quem morato', quiäk quem xukuje' tumim lino.

⁹ Pim, cajtzalaj, jun k'abaj quetan ri jujun tak u xcut.

¹⁰ Xenac' cajcholaj je'lalaj tak abaj chuwäch: pa ri nabe cholaj xbe jun rubi, jun crisolit, jun esmerald;

¹¹ pa ri ucab xbe jun granat, jun zapir, jun jad;

¹² pa ri urox cholaj xbe jun jasint, jun agat, jun amatist;

¹³ are c'u pa ri ucaj cholaj xbe jun topas, jun cornalin, jun jasp. Conojel tak ri abaj xecoj chupam k'an puak

¹⁴ e cablajuj c'ut ri abaj, che qui q'uexwäch ri cablajuj qui bi' ri e u c'ojol ri Israel; tzoc'om c'ut ri qui bi' ri cablajuj amak' paquiwi' ri abaj je jas ri cäban che ri t'ikbal.

¹⁵ Puwi' ri caya' cho c'uxaj xecoj jujun alaj tak pach'um k'an puak re utzalaj k'an puak.

¹⁶ Xeban quieb retz'balil re k'an puak xukuje' quieb xiquinaj re k'an puak ri xecoj chque ri quieb u chi' ajsic ri caya' cho c'uxaj,

¹⁷ e are c'u ri alaj tak pach'um k'an puak xecanaj paquiwi' ri quieb xiquinaj ri e c'o che ri caya' cho c'uxaj.

¹⁸ Xech'ap ri qui tza'm ri quieb alaj tak pach'um k'an puak chupam ri quieb ch'epebal, utz qui ch'epic xquiban chquiwäch ri ximibal ri c'o puwi' tak u teleb ri atz'iak ri nim u k'ij.

¹⁹ Xukuje' xeban chi quieb xiquinaj re k'an puak ri xecoj che ri quieb u tza'm ri caya' cho c'uxaj iquim, che ri quieb u chi' ri cäcanaj chupam chunakaj ri atz'iak ri nim u k'ij.

²⁰ Xeban quieb xiquinaj chic re k'an puak ri xenac' chuwäch ri ximibal ri c'o puwi' ri u teleb ri atz'iak ri nim u k'ij, chuxe' c'u xecanaj wi, chunakaj ri u t'isel, ajsic jubik' che ri pas ri cächapow ri atz'iak ri nim u k'ij.

²¹ Xexim tak ri xiquinaj re ri caya' cho c'uxaj ruc' ri xiquinaj re ri atz'iak ri nim u k'ij ruc' jun ximibal azul, rech cäcanaj ri caya' cho c'uxaj puwi' ri pas ri cächapow ri atz'iak ri nim u k'ij, mätastaj c'u che, jacha' ri takanic ri xuya' ri Ajawaxel che ri Moises.

²² Ronojel ri atz'iak ri cacanaj chupam ri atz'iak ri nim u k'ij, quem azul xbanbex rech.

²³ Xbus ri u chi' ri u kul ri c'o pa u niq'uiajil, jacha' ri cäban che jun atz'iak re tz'um, rech man cäjixjob taj.

²⁴ Xecoj crabaj re quem azul, quem morato', quiäk quem xukuje' tumim lino che retz'balil ri u chi' ri atz'iak.

²⁵ Xukuje' xeban tak tzlintzlin re utzalaj k'an puak, xexol cuc' tak ri crabaj, xecoj tak chquixo'l che ronojel ri u chi'.

²⁶ Jun tzlintzlin rachilam jun crabaj, jun chi tzlintzlin rachilam jun chi crabaj jewa' xban che ronojel ri u chi' ri atz'iak rech ri patanijic, jacha' ri takanic ri xuya' ri Ajawaxel che ri Moises.

²⁷ Ri u pam atz'iak ri re lino ri cucoj ri Aaron xukuje' ri caquicoj ri e u c'ojol, xeban rumal jun ajquem.

²⁸ Xukuje' ri pisbal jolomaj, rachilam ri retz'balil xukuje' tak ri säcaw ri e re tumim lino;

²⁹ ri pas re tumim lino, quem azul, quem morato', quiäk quem, utzalaj u tz'otic xbanic jacha' ri takanic ri xuya' ri Ajawaxel che ri Moises.

³⁰ Xukuje' xeban liq'uilak re utzalaj k'an puak ri cätasowic jacha' che cojol tabal tok'ob, xetzoc' tak we tzij ri' chuwäch, jacha' ri cäban che ri t'ikbal: “Tastal che u patanixic ri Ajawaxel”.

³¹ Xcoj jun ximibal re azul che u ximic ri liq'uilic k'an puak chuwäch ri pisbal jolomaj, jacha' ri takanic ri xuya' ri Ajawaxel che ri Moises.

Xtz'akat u banic ri k'ijilabal

³² Xtz'akat c'u u banic ri k'ijilabal, ri Lic'om Rachoch Dios re rikoj ib ruc' ri Dios. Ri aj israelib je u banic ronojel xquibano jacha' ri takanic ri xuya' ri Ajawaxel che ri Moises,

³³ xquijach c'u ri k'ijilabal pa u k'ab ri Moises, ri Lic'om Rachoch Dios re rikoj ib, conojel ri jastak ri quebajwataj pa ri k'ijilabal: conojel ri ch'epebal, ri tz'alam tak, ri balul tak, ri akan tak xukuje' tak ri tac'alibal,

³⁴ ri ch'ukubal re quiäk tak qui tz'umal ama'ib tak chij, re utzalaj tak tz'um, xukuje' ri ch'ukubal ri cäch'ukuw ri caxa,

³⁵ ri caxa re ri c'ulwächinic ri e u balul, ri tz'apibal.

³⁶ Ri mexa e rachilam ri e u chaconisan, ri caxlanwa ri cäya' chuwäch ri Dios,

³⁷ ri tzuc'ulibal re utzalaj k'an puak rachilam tak ri e u yabal k'ak', xukuje' tak ri e u chaconisan; ri aseit ri cuya' sakil,

³⁸ ri porobal re k'an puak, ri aseit ri cäcoj che qui tasic ri jastak, ri c'oc'alaj k'ol, ri tasbal ri cäcoj chuchi' ri Lic'om Rachoch Dios re rikoj ib,

³⁹ ri porobal re k'an ch'ich' rachilam ri quemom k'an ch'ich', ri e u balul xukuje' conojel ri e u chaconisan, ri tzima rachilam ri u tiq'uilibal,

⁴⁰ ri tasbal ri cärababax chuwäch ri uwo ja, ri e rakanil xukuje' tak ri qui tac'alibal, ri tasbal ri cäcoj chuchi' ri oquibal pa ri uwo ja, ri e tanibal xukuje' tak ri ch'ic re ri uwo ja, conojel ri chaconisan che ri quepatanij chupam ri k'ijilabal ri Lic'om Rachoch Dios re rikoj ib,

⁴¹ ri quemom tak atz'iak ri quebajwataj che ri patanijic chupam ri k'ijilabal, ri atz'iak ri nim u banic ri quebucoj ri Aaron ri cojoj tabal tok'ob xukuje' tak ri atz'iak ri quequicoj ri e u c'ojol pa ri qui chac re cojoj tabal tok'ob.

⁴² Ri aj israelib je u banic ronojel ri chac xquibano, jacha' ri takanic ri xuya' ri Ajawaxel che ri Moises,

⁴³ aretak xril ri Moises chi je u banic wa' qui banom, xebutewichi'j.