Elem 38 - Quiché Bible

Cäban ri porobal re k'an ch'ich'

¹ Q'uisis xucoj ri Bezaleel che u banic ri porobal ri cäporox wi ri tabal tok'ob ri cächajirisaxic. Quiejeb u xcut xubano, quieb bara' ruc' quieb k'abaj ruc' niq'uiaj k'abaj quetan ri jujun u xcut, jun bara' ruc' quieb k'abaj ri rak'anibal.

² Che ri quiejeb u xquina xebuban quiejeb ruc'a', ri cuc'am quib ruc' ri porobal, xucoj k'an ch'ich' chquij.

³ Conojel ri e u chaconisan ri porobal e re k'an ch'ich' xebubano ri c'olbal tak chaj, ri e paq'uebal, ri e nimak tak lak, ri tz'imaj ti'j xukuje' ri e c'olbal tak rachak k'ak'.

⁴ Xukuje' xuban jun quemom k'an ch'ich' ri xucoj chuxe' ri u chi' ri porobal ri cäporox wi ri tabal tok'ob ri cächajirisaxic, ri xopan pa u niq'uiajil ri rak'anibal.

⁵ Xukuje' xebuban quiejeb xiquinaj chque ri quiejeb u xquina ri quemom k'an ch'ich' ri quejut wi ri e u balulil.

⁶ Xebuban c'u u ri e u balulil ri porobal re che' re q'uisis xebubano, k'an ch'ich' xuchubej quij,

⁷ xebujut c'ut chquipam tak ri xiquinaj ri e c'o pa ri quieb u xcut ri porobal, rech cuya' cätelex bic. Ri porobal wocowic u banic xubano re che'.

Cäban ri tzima re k'an ch'ich'

⁸ Ri Bezaleel are xebucoj ri qui ilbal quib ri ixokib ri cajwataj chuchi' ri oquibal chupam ri Lic'om Rachoch Dios re rikoj ib che u banic ri tzima re k'an ch'ich', xuban xukuje' ri u tiq'uilibal re k'an ch'ich'.

Cäban ri uwo ja re ri k'ijilabal

⁹ Ri Bezaleel xuban ri uwo ja. Ri jun u xcut ri uwo ja pa ri u mox, xruc'aj cawinak oxlajuj (53) bara' tasbal re tumim lino.

¹⁰ Xerachilaj ri juwinak (20) rakan xukuje' ri juwinak (20) u tac'alibal ri e re k'an ch'ich', ri e u ch'epebal xukuje' tak ri xiquinaj e re sak puak.

¹¹ Ri jun u xcut chic ri uwo ja pa ri riquiak'ab xruc'aj jun tasbal re cawinak oxlajuj (53) bara' u rabic, xerachilaj ri juwinak (20) akan xukuje' ri juwinak (20) u tac'alibal, ri e re k'an ch'ich', ri e u ch'epebal xukuje' tak ri xiquinaj e re sak puak.

¹² Pa ri u xcut pa ri u kajebal k'ij, xruc'aj jun tasbal re juwinak wakib (26) bara' ruc' niq'uiaj, xerachilaj lajuj akan xukuje' lajuj tac'alibal. Ri ch'epebal chque tak ri akan xukuje' tak ri xiquinaj e re sak puak.

¹³ Ri jun u xcut chic ri uwo ja pa ri elebal k'ij xukuje' xruc'aj jun tasbal juwinak wakib (26) bara' ruc' niq'uiaj.

¹⁴ Che ri jun u xcut ri oquibal, xecoj wajxakib (8) bara' ruc' jun k'abaj tasbal, rachil oxib akan xukuje' oxib tac'alibal;

¹⁵ che c'u ri jun xcutaj chic, xecoj wajxakib (8) bara' ruc' jun k'abaj tasbal, rachil oxib akan xukuje' oxib tac'alibal.

¹⁶ Conojel ri tasbal ri xsutibex rij ri uwo ja, e re tumim lino.

¹⁷ Ri qui tac'alibal ri akan e re k'an ch'ich', are c'u ri e qui ch'epebal xukuje' ri qui xiquin ri c'o chque e re sak puak, xcoj sak puak paquiwi' ri akan. Conojel ri akan re ri uwo ja c'o jujun qui xiquin re sak puak.

¹⁸ Ri tasbal ri xcoj chuchi' ri oquibal cho ri uwo ja, utzalaj u tz'otic xbanic, chuwäch quem azul, quem morato', quiäk quem, xukuje' tumim lino. Julajuj (11) bara' ruc' quieb k'abaj ruc' niq'uiaj k'abaj u rabic, quieb bara' ruc' quieb k'abaj ruc' niq'uiaj k'abaj rak'anibal, junam cuc' ri tasbal re ri uwo ja.

¹⁹ E c'o quiejeb rakan xukuje' quiejeb qui tac'alibal re k'an ch'ich'; ri e u ch'apabal xukuje' tak ri e u xiquin, e re sak puak, xcoj sak puak paquiwi' ri akan.

²⁰ Conojel ri e u ch'ic ri k'ijilabal xukuje' ri re ri uwo ja, ri sutininak rij, conojel e re k'an ch'ich'.

Ri ch'ich' ri xecoj che ri k'ijilabal

²¹ Rumal ri takanic ri xuya' ri Moises che ri Itamar, ri u c'ojol ri Aaron ri cojol tabal tok'ob, ri aj levitib xcajilaj ri u q'uial ri ch'ich' ri xecoj che u banic ri k'ijilabal re ri c'ulwächinic.

²² Ri u tat ri Bezaleel are' ri Uri, ri u mam ri Bezaleel are' ri Hur ri aj Juda, xuban ronojel ri xubij ri Ajawaxel che ri Moises chi cäbanic.

²³ Xto' rumal ri Aholiab (ri u tat ri Aholiab are' ri Ahisamac ri aj Dan), ri ch'ayal ch'ich', ajquem xukuje' tz'otonel chuwäch quem azul, quem morato', quiäk quem xukuje' coc'alaj lino.

²⁴ Ronojel ri k'an puak ri xcoj che u banic ri xajwataj che ri k'ijilabal, are xcoj ri k'an puak ri xya' che sipanic chuwäch ri Ajawaxel, juwinak jun (21) quintal ruc' jun arob pajom pa ri pajbal ri cäcoj pa ri k'ijilabal.

²⁵ Ri sak puak ri xmulixic aretak xebajilax ri aj israelib, oxc'al oxlajuj (73) quintal chi ronojel. Pajom pa ri pajbal ri cäcoj pa ri k'ijilabal.

²⁶ Conojel ri winak ri tz'ibam qui bi' ri tz'akatinak chic jutak winak (20) qui junab, e wakib sient oxib mil job sient ruc' cawinak lajuj (603,550) chquijujunal wa' xquiya' pa niq'uiaj che ri niq'uiaj onz sak puak qui cuchuj, pajom pa ri pajbal ri cäcoj chupam ri k'ijilabal.

²⁷ Oxc'al cablajuj (72) quintal ruc' quieb arob sak puak xecoj che qui banic ri tac'alibal che ri k'ijilabal, xukuje' ri e u tac'alibal ri ch'ukubal. Ronojel we sak puak ri' xcoj che qui banic jun sient tac'alibal, oxib arob xcoj chque ri jujun tac'alibal.

²⁸ Ri sak puak ri xquiya' conojel ri aj israelib, are xucoj ri Bezaleel che qui banic tak ri ch'epebal chquiwäch tak ri akan xukuje' ri xuch'ukubej qui wi' xukuje' tak ri xiquinaj ri xunac' chque.

²⁹ Ri k'an ch'ich' ri xya' che sipanic chuwäch ri Ajawaxel, cawinak julajuj (51) quintal xurik rib ruc' quieb arob.

³⁰ Ruc' we k'an ch'ich' ri' xeban tak ri e u tac'alibal ri oquibal chupam ri Lic'om Rachoch Dios re rikoj ib, ri porobal re k'an ch'ich' xukuje' ri quemom k'an ch'ich', xukuje' conojel ri e u chaconisan ri porobal,

³¹ jacha' xukuje' ri tac'alibal, xukuje' tak ri e u ch'ic ri uwo ja re ri k'ijilabal, xukuje' ri e u tac'alibal ri oquibal re ri uwo ja.