Elem 37 - Quiché Bible

Cäban ri cäxa re ri c'ulwächinic

¹ Ri Bezaleel xoc chi che u banic ri caxa, che' re q'uisis xucoj che, jun bara' ruc' jun k'abaj quetan ri u rabic, oxib k'abaj u wäch, xukuje' oxib k'abaj rak'anibal.

² Xucoj utzalaj k'an puak chrij xukuje' chupam, xucoj jun retz'balil re k'an puak chuchi'.

³ Xukuje' xebuban quiejeb u xiquin re k'an puak ri xebucoj che ri quiejeb rakan, quieb che ri juperaj quieb che ri juperaj chic.

⁴ Xukuje' xebuban quieb balul re q'uisis, ri xucoj k'an puak chquij,

⁵ xebujut chupam tak ri e u xiquinaj ri c'o pa tak u xcut ri caxa, che u telexic bic.

⁶ Xukuje' xuban jun tz'apibal re utzalaj k'an puak ri quetan job k'abaj u rabic, oxib k'abaj u wäch,

⁷ xebuban quieb wächbal re k'an puak ri aj cajalaj tak tobanelab ri e c'o qui xic' ruc' bajibal, puwi' ri quieb u tza'm ri tz'apibal.

⁸ Ri tz'apibal xukuje' ri quieb wächbal ri aj cajalaj tak tobanelab ri e c'o qui xic', xa jun xcuc'aj wi quib; ri jun c'o che ri jun u tza'm, ri jun chic c'o chi che ri jun chi u tza'm,

⁹ xuc'ulaj rib qui wäch, benak c'u ri qui palaj che u ca'yexic ri tz'apibal, qui lic'om ri qui xic' puwi' jacha' muj che to'bal ib.

Cäban ri mexa ri cäya' wi ri caxlanwa chuwäch ri Dios

¹⁰ Ri Bezaleel xukuje' xuban jun mexa re q'uisis ri quetan jun bara' u rabic, niq'uiaj bara' u wäch, oxib k'abaj rak'anibal.

¹¹ Xucoj utzalaj k'an puak chrij xukuje' xucoj jun retz'balil re k'an puak chuchi';

¹² xuban jun retz'balil ri u chi' ri oxib u wi' k'abaj u wäch, xukuje' xucoj jun retz'balil chic re k'an puak che ri u chi'.

¹³ Xebuban quiejeb u xiquin re k'an puak ri xebucoj che ri quiejeb u xquina jawije' c'o wi ri quiejeb rakan,

¹⁴ ri xiquinaj xecanaj chuchi', rech quejut ri balul chupam, jeri' cuya' cätelex bic ri mexa.

¹⁵ Re q'uisis ri balul rech ri mexa xebubano, xucoj k'an puak chquij.

¹⁶ Xukuje' e re utzalaj k'an puak ri e u chaconisan ri rajawaxic ri quec'oji' puwi' ri mexa xebuban ri queya' puwi' ri e u platoyil, ri e u paq'uebal, ri e u xaru', xukuje' ri e u lakil che ri u wa'l uva ri cäya' che sipanic.

Cäban ri tzuc'ulibal re k'an puak

¹⁷ Ri Bezaleel xoc chi che u banic ri tzuc'ulibal, re utzalaj k'an puak xubano, bajibal xuch'ayibej rech. Ri u tiq'uilibal, ri rakan, ri e u lakil, ri e u mansanil, ri e u cotz'ijal, xa jun cuc'axic quib;

¹⁸ e c'o wakib u k'ab ri xebel pa tak u xcut, oxib che ri jun u xcut oxib che ri jun u xcut chic.

¹⁹ Chquijujunal ri wakib u k'ab ri quebel pa tak u xcut, e c'o ox ox qui lakil jacha' ri almendr, e c'o u cotz'ijal xukuje' u mansanil,

²⁰ ri rakan xukuje' e c'o quiejeb u lakil junam ruc' ri almendr, e c'o u cotz'ijal xukuje' u mansanil.

²¹ Chquijujunal ri ox ox u k'ab ri tzuc'ulibal ri quebel pa tak u xcut, e c'o jujun qui cotz'ijal chquixe'.

²² Ri e u cotz'ijal xukuje' tak ri e u k'ab ri tzuc'ulibal, xa jun ruc'axic quib, e re k'an puak ri ch'ayom ruc' bajibal.

²³ Xukuje' ri wukub yabal k'ak' e re utzalaj k'an puak xebubano, ri e u chapbal xukuje' ri e alaj tak u platoyil.

²⁴ Oxib arob utzalaj k'an puak xajwataj che u banic ri tzuc'ulibal xukuje' ri e u chaconisan.

Cäban ri porobal ri cäporox wi ri c'oc' k'ol

²⁵ Ri Bezaleel xuban ri porobal ri cäporox wi ri c'oc' k'ol, che' re q'uisis xucoj che. Cajtzalaj, ruc' niq'uiaj bara' u rabic, niq'uiaj bara' u wäch, jun bara' rak'anibal. Ri e ruc'a' xa jun cuc'axic quib ruc' ri porobal ri cäporox wi ri c'oc' k'ol.

²⁶ Xucoj utzalaj k'an puak puwi' xukuje' pa tak u xcut xukuje' che tak ri ruc'a', xuban jun retz'balil chuchi' re k'an puak.

²⁷ Xebucoj jujun xiquinaj re k'an puak chuxe' ri retz'balil, quieb che ri quieb u tza'm che ri jun u xcut, quieb chic che ri quieb u tza'm chic che ri jun u xcut chic, chupam c'ut quejut wi ri telebal re rech cuya' cätelex bic ri porobal.

²⁸ Re q'uisis ri e u balul ri porobal xebubano, xucoj k'an puak chquij.

Cäsuc'umax ri aseit ri cäcoj che tastajic xukuje' che c'oc'alaj k'ol

²⁹ Ri Bezaleel xukuje' xusuc'umaj ri tastalicalaj aseit ri cäcoj che tasic, xukuje' ri c'oc'alaj k'ol, jacha' ri u banic ri cäquiban ri e banal tak c'oc'al.