Elem 33 - Quiché Bible

Ri ajawaxel cuya' takanic chi cäquitakej ri qui be

¹ Ri Ajawaxel xubij che ri Moises: “Jät, chatel bic waral, chebac'ama' bic ri winak ri xebawesaj ulok pa Ejipt. Jix pa ri ulew ri xinbij chi quinya' che ri Abraham, ri Isaac, ri Jacob, xukuje' chque ri qui' tak qui mam.

² Quintak na bic ri nu tako'n aj caj rech cuc'am a be, quebenwesaj c'u na bic ri aj cananeyib, ri aj amoreyib, ri aj hititib, ri aj perezeyib, ri aj hebeyib, ri aj jebuseyib.

³ Jix pa ri ulew jawije' ri cabelel wi leche xukuje' juyubal räx cab jacha' ri ja'. Man quinbe ta c'u chixo'l, mäc'ulmataj ne chi quinsach i wäch pa ri be, ri ix c'ut ix winak ri sibalaj ix tac.”

⁴ Aretak ri aj israelib xquita' we xibibalalaj tak tzij ri', sibalaj xebisonic, man c'o ta chi jun xucoj ri wikbal rib,

⁵ u bim chi c'u ri Ajawaxel che ri Moises: “Chabij chque ri aj israelib: ‘Ix, ix winak ri sibalaj ix tac. Pune' ta xa jubik' quinc'oji' chixo'l, quinq'uis u sachisaxic i wäch ri'. Chebiwesaj ba' conojel ri wikbal tak iwib kas camic, quinwil c'u na jas ri quinban na chiwe.’ ”

⁶ Je c'u ri' kas aretak e c'o pa ri juyub Horeb, ri aj israelib xquik'il tak quib che qui cojic ri wikbal tak quib.

Ri Lic'om Rachoch re rikoj ib ruc' ri Dios

⁷ Ri Moises xuc'am ri lic'om ja, naj xuya' u wi che ri c'olbal ri c'o wi nabe, xucoj c'u Lic'om Rachoch Dios re rikoj ib, che u bi'. Aretak c'u c'o jun craj cuta' u no'j che ri Ajawaxel, cäbe c'ä pa ri Lic'om Rachoch Dios ri naj c'o wi che ri c'olbal ri e c'o wi ri aj israelib.

⁸ Aretak cäbe ri Moises pa ri Lic'om, conojel ri winak quewalijic quetaq'ui' apan chuchi' ri qui cäbal ri lic'om, queca'y apan che ri Moises c'ä coc na chupam ri Lic'om.

⁹ Xuwi c'u coc ri Moises chupam, ri jutac'aj sutz' cäkaj ulok chicaj cuya' rib chuchi' ri Lic'om cätzijon c'u ri Ajawaxel ruc' ri Moises.

¹⁰ Aretak cäquil ri winak chi cäc'oji' ri jutac'aj sutz' chuchi' ri Lic'om, chquijujunal quexuqui' chuchi' ri kas qui cäbal ri lic'om, quek'ijilanic.

¹¹ Ri Dios cätzijon ruc' ri Moises chwinakil, jacha' ri cuban apachique winak ri cätzijon ruc' ri rachil cätzelej c'u ri Moises pa ri c'olbal ri e c'o wi ri aj israelib. Are c'u ri Josue ri u c'ojol ri Nun, ri c'o che to'l rech ri Moises, mawi jubik' quel pa ri Lic'om.

Ri Ajawaxel cuc'ut ri u juluwem chuwäch ri Moises

¹² Ri Moises xubij che ri Ajawaxel: “Chilampe' la, ri lal catz'onoj la chwe chi quinc'am qui be we winak ri', man c'u bim ta la chwe jachin ri cätak la bic wuc'. Bim la chi sibalaj cu'l c'u'x la chwij, xukuje' chi in lok' chwäch la.

¹³ We c'u kastzij chi in lok' chwäch la, quintz'onoj tok'ob che la chi cac'ut la ri be la chnuwäch, rech cäcu'bi nu c'u'x chij la chi amak'el in lok' chwäch la. Mäsach ba' pa jolom la chi e ech la we winak ri'.

¹⁴ Kas In catinwachilaj na, catinwuxlanisaj c'u na,” xcha' ri Ajawaxel.

¹⁵ Are c'u ri Moises xutzelej u bixic che: “We man kas lal cujachilaj ta la bic, mujesaj la bic waral.

¹⁶ We c'u ri lal, man cujachilaj ta la bic, ¿jas ta c'u ri cäban che retamaxic chi ri tinimit la xukuje' ri in uj lok' chwäch la? Xuwi c'u we lal c'o kuc', ri tinimit la xukuje' ri in, cujk'alajinic chi man uj ta junam cuc' conojel ri niq'uiaj tinimit chic ri e c'o cho ri uwächulew.”

¹⁷ Xubij ri Ajawaxel che ri Moises: “Ri a bim chwe, xukuje' quinbana' wa', rumal rech chi nu jiquibam nu c'u'x chawij, at lok' chnuwäch, a ch'äcom c'ut ri nu tok'ob,” xujiquiba' u bixic ri Ajawaxel che.

¹⁸ “¡Ya' la chwe chi quiwil ri juluwem la!” xcha' ri Moises.

¹⁹ Xutzelej c'u u bixic ri Ajawaxel: “Quinban c'ut chi coc'ow ronojel ri wutzil chawäch, chawäch c'ut at quinya' wi na u k'alajisaxic ri nu bi'. Quel na nu c'u'x che apachin ri quinwaj wi, quintok'obisaj u wäch apachin ri quinwaj wi.

²⁰ Quink'alajisaj c'u chawäch chi man catcuin taj cawil ri nu palaj, rumal rech chi man c'o ta jun winak ri cäcuin ta che rilic ri nu palaj, cutakej ta c'u c'aslem.”

²¹ Xukuje' xubij ri Ajawaxel che ri Moises: “Chawilampe', waral chinunakaj, c'o jun c'olbal. Chattac'al puwi' we cowilaj abaj ri'.

²² Aretak coc'ow ri nu juluwem catincoj chupam ri pec ri c'o xo'l ri cowilaj abaj, catinch'uk c'u na ruc' ri nu k'ab c'ä quinoc'ow na.

²³ Quinwesaj c'ut ri nu k'ab rech cawil ri wij, are c'u ri nu palaj man ya'tal taj chi cawilo.”