Elem 31 - Quiché Bible

Ri nawinelab che u banic ri k'ijilabal

¹ Ri Ajawaxel xtzijon ruc' ri Moises, xubij che:

² “Chawilampe', nu cha'om ri Bezaleel, chquixo'l ri aj judeyib, u c'ojol ri Uri, ri' u mam c'ut ri Hur,

³ nu nojisam c'u che ri ruxlabal ri Dios xukuje' che no'jinic, nawinic, etamanic, che qui banic jastak,

⁴ che qui banic wikbal, che qui chacuxic k'an puak, sak puak, k'an ch'ich',

⁵ che qui tzoq'uic je'lalaj tak abaj, che qui josic che', che qui banic apachique je'lalaj tak chac.

⁶ Nu cojom c'u ri Aholiab che to'l rech, ri u c'ojol ri Ahisamac, ri aj Dan. Conojel ri ajno'jab nu yo'm u wi' ri qui no'jibal rech quecuin che u banic ronojel ri at nu takom che u banic:

⁷ Ri Lic'om Rachoch Dios re rikoj ib, ri caxa re c'ulwächinic, ri ch'ukubal wi'aj ri cäbe puwi' ri caxa, xukuje' conojel ri jastak ri quebajwataj pa ri Lic'om Rachoch Dios.

⁸ Ri mexa xukuje' ri e u chaconisan, ri tzuc'ulibal ri re utzalaj k'an puak xukuje' ri e u chaconisan, ri porobal ri cäporox wi ri c'oc' k'ol,

⁹ ri porobal ri caporox wi ri tabal tok'ob ri cächajirisaxic que querachilaj ri e u chaconisan, ri tzima carachilaj ri u tiq'uilibal,

¹⁰ ri quemom atz'iak, are wa' ri atz'iak ri nim u k'ij ri quebucoj ri Aaron xukuje' ri e u c'ojol aretak cäquiban ri qui chac re cojol tabal tok'ob,

¹¹ ri aseit ri cacoj che qui tewichi'xic ri jastak xukuje' ri c'oc'alaj k'ol ri cajwataj pa ri k'ijilabal. Cäquiban c'u na ronojel ri at nu takom che u banic.”

Ri k'ij re uxlanem

¹² Ri Ajawaxel xtzijon ruc' ri Moises, xubij che:

¹³ “Kas at chattzijon cuc' ri aj israelib, chabij wa' chque: Ri ix, nim chebiwila' wi ri e nu k'ij re uxlanem, jun etal c'u wa' ri jekebam chnuxo'l iwuc' in che tak ri k'ij junab, rech quetamatajic chi in, ri Ajawaxel ri xixincha'o'.

¹⁴ Ri k'ij re uxlanem jun tastalicalaj k'ij wa' chiwe, nim chiwila' wi, jachin c'u ri man nim ta cäril wi we k'ij ri', cäcämisaxic. Apachin ta ne ri cuban jun patanijic pa we k'ij ri', quesax ri u bi' chquixo'l ri u winakil.

¹⁵ Wakib k'ij cuya' cäban chac, are c'u ri uwuk k'ij, k'ij wa' re uxlanem che u ya'ic u k'ij ri Ajawaxel. Apachin c'u ri cächacun pa ri k'ij re uxlanem, cäcämisaxic.

¹⁶ Nim ba' chquila' wi ri aj israelib ri u chajixic ri k'ij re uxlanem, jacha' jun pixab ri junalic pa conojel ri k'ij junab.

¹⁷ Jun etal c'u wa' ri cajeki' chquixo'l, ri aj israelib xukuje' wuc' in.” Pa wakib k'ij c'ut xuban ri Ajawaxel ri caj xukuje' ri ulew, pa ri uwuk k'ij xutanaba' u banic chac, xutakej c'u uxlanem.

Ri alaj ama' wacax re k'an puak

¹⁸ Aretak ri Ajawaxel xutanaba' u tzijobexic ri Moises puwi' ri juyub Sinai, xebujach quieb tz'alam abaj che ri tz'ibatal wi ri pixab rumal ri kas u wi' u k'ab ri Dios.