Elem 30 - Quiché Bible

Ri cäporox wi c'oc' k'ol

¹ “Chabana' xukuje' jun porobal re q'uisis ri cäporox wi ri c'oc' k'ol.

² Cajtzalaj c'ut caban che, niq'uiaj bara' u rabic, niq'uiaj bara' u wäch, jun bara' cärak'anibej, ri e ruc'a' rajawaxic cäcuc'aj quib che ri porobal.

³ Chacojo' utzalaj k'an puak chrij, ri quiejeb u xcut xukuje' tak ri ruc'a', chasutij rij che jun retz'balil re k'an puak.

⁴ Chebacojo' jujun tak u xiquin re k'an puak chuxe' ri retz'balil, quieb che ri jun u xcut quieb che ri jun u xcut chic, ri quejut wi ri balul che u telexic bic.

⁵ Re q'uisis ri balul ri quebabano, cacoj k'an puak chquij.

⁶ Chaya' ri porobal ri cäporox wi ri c'oc' k'ol chuwäch ri ch'ukubal ri c'o chunakaj ri caxa ri c'o wi ri c'ulwächinic, chuwäch ri tz'apibal ri cäch'ukuwic, ri quinrik wi na wib awuc'.

⁷ Ri Aaron cuporoj na c'oc'alaj k'ol puwi' we porobal ri' ronojel ak'abil, aretak quebusuc'umaj ri yabal k'ak',

⁸ xukuje' aretak quebe tzij ri yabal k'ak' benak tak k'ij, cuporoj ri c'oc' k'ol. Nak'atisabal wa' ri cätakex u banic chuwäch ri Ajawaxel amak'el.

⁹ Maporoj jun c'oc' k'ol chic puwi' we porobal ri', mawi tabal tok'ob ri cächajirisaxic, mawi sipanic re c'äj, mawi jubik' majamij u wa'l uva puwi'.

¹⁰ We porobal ri' xa jumul jachom che ri Ajawaxel, ri Aaron xa jumul pa ri jun junab cuya' ri quic' re ri tabal tok'ob re sachbal mac paquiwi' ri ruc'a' ri porobal. Xa jumul pa ri jun junab, cäya' ri tabal tok'ob re sachbal mac puwi' we porobal ri'.”

Ri cätorobex rech ri c'aslemal

¹¹ Ri Ajawaxel xtzijon ruc' ri Moises, xubij che:

¹² “Aretak quebawajilaj ri aj israelib, chquijujunal rajawaxic cäquiya' ri torobal quech che ri Ajawaxel che torobal rech ri qui c'aslemal, rech aretak e ajilam chic man c'o ta jun yabil re cämical cäpe paquiwi'.

¹³ Ronojel ri tz'ibam u bi' cuya' na che ri Ajawaxel jacha' che cuchuj che ri Ajawaxel pa niq'uiaj che ri niq'uiaj onz sak puak, ri pa niq'uiaj che ri niq'uiaj onz je jas ri pajbal ri cäcoj chupam ri k'ijilabal.

¹⁴ Conojel ri eboquinak pa ajilabal ri oc'owinak chi jutak juwinak (20) qui junab, rajawaxic cäquiya' we torobal ri chech ri Ajawaxel,

¹⁵ chquijujunal aretak cäquiya' ri torobal quech che ri Ajawaxel che u toric ri qui c'aslemal, mawi ri k'inom cuya' u wi' ri pa niq'uiaj che ri niq'uiaj onz sak puak, mawi ri meba' ma ta cutz'akatisaj ri pa niq'uiaj che ri niq'uiaj onz sak puak.

¹⁶ Camulij ri puak ri cäquiya' ri aj israelib che u toric ri qui c'aslemal, cajach pa ri Lic'om Rachoch Dios re rikoj ib rech cajwataj chila'. Are c'u cäbanow wa' chi quenataj ri aj israelib che ri Ajawaxel, chi xquiya' ri torobal rech ri qui c'aslemal.”

Ri tzima re k'an ch'ich'

¹⁷ Ri Ajawaxel xtzijon ruc' ri Moises, xubij che:

¹⁸ “Chabana' jun tzima re k'an ch'ich', xukuje' ri u tiq'uilibal re k'an ch'ich' cabano, cajwataj c'u wa' che ch'ajbal ib; chaya' chuxo'l ri Lic'om Rachoch Dios re rikoj ib ruc' ri porobal canojisaj c'u che ja'.

¹⁹ Chila' c'ut cäquesaj wi qui ja' ri Aaron e rachilam ri e u c'ojol che u ch'ajic qui k'ab xukuje' cakan,

²⁰ quequich'aj c'ut ri cakan qui k'ab aretak queboc pa ri Lic'om Rachoch Dios re rikoj ib xukuje' aretak quenakajin che ri porobal che u jachic ri sipanic ri cäporox chuwäch ri Ajawaxel, we je caquiban wa' man quecäm taj.

²¹ Rech man quecäm taj, rajawaxic cäquich'aj ri qui k'ab xukuje' ri cakan. Jun pixab wa' ri man cäq'uextaj taj re chbe k'ij sak che ri Aaron, xukuje' chque ri e rija'lil.”

Ri aseit ri cäcoj che qui tasic ri jastak

²² Ri Ajawaxel xtzijon ruc' ri Moises, xubij che:

²³ “Chacha' ri c'oc' k'ol ri sibalaj c'oc' na: chacha' oxlajuj (13) libra utzalaj mir, wakib libra ruc' wajxakib onz cane'l, wakib libra ruc' wajxakib onz c'oc'alaj aj;

²⁴ oxlajuj (13) libra ri c'oc'alaj u ra'b ri casia, pajom pa ri pajbal ri c'o pa ri u Lic'om Rachoch Dios, oxib litro ruc' niq'uiaj aseit re aseitun.

²⁵ Chacojo' ronojel wa' che u banic ri aseit ri cäcoj che qui tasic ri jastak, junam u suc'umaxic cabano jas ri cuban jun banal c'oc'alaj cunabal. Are aseit wa' ri cäcoj che qui tewichi'xic ri jastak,

²⁶ cäjamij c'u puwi' ri Lic'om Rachoch Dios re rikoj ib, xukuje' puwi' ri caxa re ri c'ulwächinic,

²⁷ ri mexa rachilam conojel ri jastak ri quebajwataj che, ri tzuc'ulibal rachilam conojel ri jastak ri quebajwataj che, xukuje' puwi' ri porobal ri cäporox wi ri c'oc' k'ol,

²⁸ ri porobal que tak ri tabal tok'ob ri cächajirisaxic querachilaj conojel ri e u chaconisan, xukuje' ri tzima rachilam ri u tiq'uilibal.

²⁹ Je chabana' wa' che qui tasic quebux c'u na jastak ri sibalaj e tastalic apachique jasach ri quenakowic, cacanaj tastalic.

³⁰ Xukuje' chajamij we aseit ri' puwi' ri Aaron xukuje' pa qui wi' ri e u c'ojol, che qui tasic e jacha' che nu cojol tabal tok'ob,

³¹ chabij wa' chque ri aj israelib: ‘Chbe k'ij sak, are waseit wa' ri tastalic re tastajic.

³² Mijamij puwi' apachique winak, mawi misuc'umaj chi jun aseit ri junam ta ruc' wa'. Jun tastalicalaj aseit wa' chibana' c'u che chi jun jasach tastalic.

³³ We c'o jachin cusuc'umaj jun aseit ri junam ruc' wa' o cujamij puwi' apachique winak, quesax ri u bi' chquixo'l ri u winakil.’ ”

Ri c'oc' k'ol

³⁴ Ri Ajawaxel xubij che ri Moises: “Junam qui pajbalil we c'oc'al ri' chac'ama': k'ol, c'oc'alaj ixq'uiak, xukuje' galbano, ri cäc'oc'atic,

³⁵ chebacojo' we jastak ri' che u suc'umaxic jun utzalaj c'oc' k'ol ri tastalic, utz u yujaxic cabano jacha' ri cuban jun banal c'oc'al.

³⁶ Sibalaj coc' u que'xic niq'uiaj chabana', chaya' chuwäch ri caxa re ri c'ulwächinic, chupam ri Lic'om Rachoch Dios re rikoj ib o ri xinrik wi na wib awuc'. We c'oc' k'ol ri' are wa' ri sibalaj tastal na,

³⁷ misuc'umaj chi jun c'oc' k'ol ri junam ta u banic ruc' ri a suc'umam ri xak ta ix quixcojowic. Rech c'u ri Ajawaxel wa', chawe c'u at are jun jasach ri sibalaj tastalic.

³⁸ Apachin ta ne ri cusuc'umaj jun c'oc' k'ol chic ri junam ta ruc' wa', ri xak ta are' cäcojowic, quesax ri u bi' chquixo'l ri u winakil.”