Elem 29 - Quiché Bible

Qui tastajic ri e cojol tabal tak tok'ob

¹ “Che qui tasic e jacha' che nu cojol tabal tak tok'ob, are wa' ri rajawaxic caban chque: chacha' jun alaj ama' wacax xukuje' quieb ama'ib tak chij ri man c'o ta qui yab;

² chebabana' caxlanwa xukuje' caxlanwa re coc'alaj c'äj ri man cäya' ta ch'am ruc' yok'om aseit ruc', xukuje' wotz'otz' ri man cäya' ta ch'am cuc' ri e chicom che aseit,

³ chebaya' pa jun alaj chicäch, chebac'ama' bic pa ri k'ijilabal junam ruc' ri alaj ama' wacax xukuje' ri quieb ama'ib tak chij;

⁴ chac'ama' c'u bic ri Aaron e rachilam ri e u c'ojol chuchi' ri Lic'om Rachoch Dios re rikoj ib, cabij chque chi quebatinic;

⁵ chebac'ama' ri atz'iak que ri cojol tabal tok'ob, chacojo' ri u pam atz'iak chrij ri Aaron, ri kas atz'iak, ri atz'iak ri nim u k'ij xukuje' ri cäya' cho c'uxaj. Utz u ximic ri pas chabana' ri cächapow ri atz'iak ri nim u k'ij;

⁶ chacojo' ri pisbal jolomaj, cacoj c'u ri liq'uilic k'an puak chuwäch ri pisbal jolomaj ri cäc'utuwic chi cojol tabal tok'ob.

⁷ Chatasa' c'ut ri Aaron jacha' che cojol tabal tok'ob, chac'ama' ri aseit re tastajic, chak'ija' pa u jolom.

⁸ Chabij chque ri e u c'ojol chi quekeb awuc', chebacojo' ri u pam tak atz'iak chquij.

⁹ Utz u cojic ri u pas ri Aaron cabano xukuje' ri qui pas ri e u c'ojol, utz caban che u cojic ri pisbal jolomaj chqui jolom. Je caban wa' che u ya'ic ri takanic pa qui k'ab, xukuje' ri qui chac re cojol tabal tok'ob cäcanaj c'u can che jun pixab re chbe k'ij sak.

¹⁰ Chac'ama' c'u bic ri alaj ama' wacax chuwäch ri Lic'om Rachoch Dios re rikoj ib, rech ri Aaron xukuje' ri e u c'ojol cäquiya' ri qui k'ab puwi' ri u jolom ri awaj,

¹¹ chatok'o ri u kul chila' chuwäch ri Ajawaxel, chuwäch ri Lic'om Rachoch Dios re rikoj ib.

¹² Chac'ama' jubik' che ri u quiq'uel ri alaj ama' wacax ruc' ri u wi' a k'ab, chabila' chque ri ruc'a' ri porobal, ri quic' ri cäto'tajic chajamij pa rakan ri porobal.

¹³ Chque ri ixco'l, ri seseb, ri quieb u quinak' chawesaj ronojel ri xepo ri c'o chque, chaporoj puwi' ri porobal;

¹⁴ are c'u ri u ti'jal, ri alaj ama' wacax, ri u tz'umal, ri u mes, chaporoj chrij ri kajebal, tojbal c'u macaj wa'.

¹⁵ Chac'ama' jun chque ri quieb ama'ib tak chij, are c'u ri Aaron xukuje' ri e u c'ojol chquiya' ri qui k'ab puwi' ri u jolom.

¹⁶ Chatok'o ri u kul, chachicoj ri u quiq'uel puwi' xukuje' pa tak u xcut ri porobal;

¹⁷ chatasila', chebach'aja' ri rixco'l xukuje' ri rakan, chebaya' ruc' ri ch'akatak xukuje' ri u jolom.

¹⁸ Chachi'j c'u ri ama' chij puwi' ri porobal, jacha' tabal tok'ob ri cächajirisaxic che u ya'ic u k'ij ri Ajawaxel, jacha' sipanic porom ri cäc'oc'atic.

¹⁹ Chac'ama' chi c'u ri jun ama' chij chic, are' c'u ri Aaron xukuje' ri e u c'ojol, chequiya' ri qui k'ab puwi' ri u jolom.

²⁰ Chatok'o ri u kul ri ama' chij, chac'ama' jubik' che ri u quiq'uel chabila' chuxe' u xiquin ri Aaron, xukuje' chuxe' qui xiquin ri e u c'ojol re ri quiquiak'ab, puwi' ri nim u wi' qui k'ab re ri quiquiak'ab xukuje' puwi' ri nim u wi' cakan re ri qui wiquiak'ab. Are c'u ri quic' ri cäto'tajic chachicoj puwi' ri porobal xukuje' pa tak u xcut ri porobal.

²¹ Chac'ama' jubik' che ri quic' xukuje' che ri aseit ri cäk'ij pa u jolom ri cojol tabal tok'ob ri c'o puwi' ri porobal, chachicoj chrij ri Aaron xukuje' chrij ri ratz'iak, chquij ri e u c'ojol xukuje' chquij ri catz'iak. Ruc' ri u banic wa' ri Aaron e rachilam ri e u c'ojol, quetastajic xukuje' ri catz'iak.

²² Chac'ama' chi c'ut ri xepo ri c'o che ri u je' ri ama' chij xukuje' ri c'o che ri ixco'l xukuje' ri c'o che ri seseb, chebac'ama' c'u xukuje' ri quieb u quinak' xukuje' ri xepo ri e ch'ukuwinak, xukuje' ri xepo ri c'o che ri ra' re riquiak'ab, jun c'u ama' chij wa' ri quetasow ri e cojol tabal tok'ob.

²³ Che ri caxlanwa ri man yo'm ta ch'am ruc' ri c'o pa ri alaj chicäch chuwäch ri Ajawaxel, chac'ama' jun caxlanwa quetequic, jun caxlanwa ri yok'om aseit ruc', xukuje' jun wotz'otz';

²⁴ ronojel wa' quebaya' pa u k'ab ri Aaron xukuje' pa qui k'ab ri e u c'ojol, chabana' c'ut ri banoj rech ri tac'abam ib chuwäch ri Ajawaxel.

²⁵ Chebac'ama' c'ut pa qui k'ab, chaporoj puwi' ri porobal cärachilaj ri tabal tok'ob ri cächajirisaxic ri cäc'oc'at chuwäch ri Ajawaxel. Sipanic wa' ri porom che u ya'ic u k'ij ri Ajawaxel.

²⁶ Che ri u tasic ri Aaron, chac'ama' xukuje' ri uwo u c'u'x ri ama' chij chibana' c'ut ri banoj re ri roc'owisaxic chuwäch ri Ajawaxel. Chawe c'u at ya'tal wi wa'.

²⁷ Chatasa' ri uwo c'uxaj ri oc'owisam ri yo'm che sipanic ri nim u banic jas ri nak'atisabal xukuje' ri ra' ri ama' chij, ri cächi'x che cuchuj, u tz'akatil c'ut ri chij re ri tastajic ri cätas can che ri Aaron xukuje' chque ri e u c'ojol.

²⁸ Rech c'ut ri Aaron wa' xukuje' ri e u c'ojol. Jun pixab wa' re chbe k'ij sak chque ri aj israelib: we sipanic ri' are jun cuchuj ri cäquiya' ri aj israelib jacha' tabal tok'ob re utzirisan ib ruc' ri Ajawaxel.

²⁹ Ri tastalicalaj tak ratz'iak ri Aaron cäquechbej can ri e u wi' tak u mam aretak quetas che cojol tabal tok'ob xukuje' aretak cäya' takanic pa qui k'ab che cojol tabal tok'ob.

³⁰ Are c'u ri cojol tabal tok'ob ri rija'lil ri Aaron ri cacanaj chupam ri u c'olbal ri coc c'u chupam ri Lic'om Rachoch Dios re rikoj ib rech capatanij chupam ri k'ijilabal, quebucoj na we atz'iak ri' wukub k'ij.

³¹ Cuc'am c'u na ri chij re ri tasow ib cutzac c'ut ri u ti'jal pa jun tastalic c'olbal.

³² Ri Aaron e rachilam ri e rachalaxic cäquitij ri u ti'jal ri ama' chij xukuje' ri caxlanwa ri c'o pa ri alaj chicäch, chuchi' ri Lic'om Rachoch Dios re rikoj ib.

³³ Cäquitij c'u quech we jastak ri' ri xbanbex ri cuyubal qui mac, aretak xetastajic, xquic'am c'u takanic e jacha' e cojol tak tabal tok'ob. C'o c'u jun apachique winak mutij rech we jastak ri', e tastajinak c'ut.

³⁴ We c'o cäto'taj can che ri ti'j, ri caxlanwa che ri ucab k'ij ri xbanbex ri tastajic, cäporox pa k'ak' ri to'tajinak canok, c'o c'u mätijowic, tastal c'ut.

³⁵ Chabana' ronojel wa' ruc' ri Aaron xukuje' cuc' ri e u c'ojol, je jas ronojel ri xinbij chawe. Wukub k'ij chabeytajisax ri u ya'ic ri takanic pa qui k'ab,

³⁶ chachi'j ronojel k'ij jun alaj ama' wacax che tabal tok'ob che qui rikic ri sachbal tak macaj; cajosk'ij ri porobal aretak cachi'j jun tabal tok'ob re sachbal macaj, chajamij aseit puwi' ri porobal che u tastajic.

³⁷ Wukub k'ij chabeytajisaj qui ya'ic tabal tak tok'ob re sachbal mac puwi' ri porobal, jewa' caban che u jachic che ri Dios, cux c'u na jun porobal ri sibalaj tastalic: ronojel jasach ri cäkeb ruc' ri porobal cätastajic.”

Ri sipanic ri cächi'x k'ij chi chk'ij

³⁸ “K'ij chi k'ij mel a k'ij rajawaxic quebachi'j quieb alaj ama'ib tak chij re jujun qui junab puwi' ri porobal.

³⁹ Jun chque caya' ak'abil, ri jun chic benak k'ijil.

⁴⁰ Ruc' ri nabe alaj ama' chij, cachi'j quiejeb libra ruc' quiejeb onz coc'alaj c'äj ri cäyok' jun litro aseit re aseitun ruc', xukuje' jun litro u wal uva ri cajamixic.

⁴¹ Je caban che ri jun alaj ama' chij chic benak k'ij xukuje' ri sipanic re c'äj, re u wal uva, sipanic wa' ri cäporoxic ri cäc'oc'at chuwäch ri Ajawaxel.

⁴² We sipanic tak ri' ri queporox che u ya'ic nu k'ij e are' tak wa' ri cätakex qui poroxic cumal ri tataxelab xukuje' cumal ri alc'ualaxelab amak'el chnuwäch, chuchi' ri oquibal chupam ri Lic'om Rachoch Dios re rikoj ib, chila' c'ut ri quinrik wi na wib awuc' che a tzijobexic.

⁴³ Chila' quinrik wi na wib cuc' ri aj israelib, catastaj ri c'olbal rumal ri nu c'olem.

⁴⁴ Quintas na ri Lic'om Rachoch Dios re rikoj ib, xukuje' ri porobal, xukuje' quitas na ri Aaron e rachil ri e u c'ojol e jacha' che e cojol tabal tok'ob ri e wech.

⁴⁵ Quinjeki' chquixo'l ri aj israelib, quinoc c'u che qui Dios.

⁴⁶ Jeri' cäquich'ob na chi in ri' ri Ajawaxel ri qui Dios, ri xebesan ulok pa Ejipt, rech quinc'oji' chquixo'l. In ri' ri Ajawaxel ri qui Dios.”