Elem 27 - Quiché Bible

Ri porobal re k'an ch'ich'

¹ “Chabana' jun porobal cajtzalaj, re che' re q'uisis cabano ri quetan cacab bara' ruc' oxib k'abaj ri jujun u xcut, jun bara' ruc' niq'uiaj cärak'anibej.

² Chabana' quiejeb ruc'a' pa ri quiejeb u xquina, ri xa jun cuc'axic quib ruc' ri porobal, cach'uk rij ri porobal ruc' k'an ch'ich'.

³ Conojel ri jastak ri quebajwataj che ri porobal rajawaxic e re k'an ch'ich': ri c'olbal tak chaj, ri e jocobal tak chaj, ri e u lak, ri ch'ipibal tak ti'j xukuje' ri c'olbal tak rachak k'ak'.

⁴ Chabana' jun quemom k'an ch'ich', chebacojo' quiejeb u xiquin re k'an ch'ich' che ri quiejeb u tza'm.

⁵ C'äte' c'u ri' cacojo ri quemom k'an ch'ich' chuxe' ri u chi' ri porobal chcanaj c'u pa u niq'uiajil ri rak'anibal ri porobal.

⁶ Chebabana' balul re q'uisis che telebal ri porobal, cach'uk c'u quij ruc' k'an ch'ich'.

⁷ Ri telebal rajawaxic quejut pa tak ri u xiquin, cäcanaj c'u pa ri quieb u xcut ri porobal, rech cuya' cätelexic.

⁸ Ri porobal ri cabano re che', wocowic u banic, junam ruc' ri xc'utun chawäch pa ri juyub.”

Ri uwo ja rech ri k'ijilabal

⁹ “Chasuc'umaj jun uwo ja che ri k'ijilabal. Che ri jun u xcut pa ri u mox k'ab ri uwo ja rajawaxic quecoj tasbal re tumim lino che, cärababax u cojic jun tasbal re cawinak oxlajuj (53) bara' ruc' jun k'abaj u rabic.

¹⁰ Ri juwinak (20) rakanil xukuje' ri juwinak (20) u tac'alibal e re k'an ch'ich', ri e u ch'epebal xukuje' ri e u xiquin e re sak puak.

¹¹ Junam caban che ri jun u xcut chic pa ri riquiak'ab ri elebal k'ij, carababex jun tasbal re cawinak oxlajuj (53) bara' ruc' jun k'abaj u rabic, quebacoj juwinak (20) rakan querachilaj ri juwinak (20) u tac'alibal re k'an ch'ich'; ri e u ch'epebal xukuje' tak ri e u xiquin e re sak puak.

¹² Che ri u xcut ri uwo ja ri cäca'y pa u kajebal k'ij, carababa' jun tasbal re juwinak wakib (26) bara' ruc' jun k'abaj, querachilaj lajuj akan cuc' lajuj tac'alibal.

¹³ Pa ri xcutaj che ri elebal k'ij carababa' jun tasbal re juwinak wakib (26) bara' ruc' jun k'abaj.

¹⁴ Pa ri jun u xcut ri oquibal cacoj wukub (7) bara' ruc' jun k'abaj ruc' niq'uiaj tasbal, ruc' oxib akan xukuje' oxib tac'alibal.

¹⁵ Pa ri jun u xcut chic ri oquibal xukuje' cacoj wukub (7) bara' ruc' jun k'abaj ruc' niq'uiaj tasbal, ruc' oxib akan xukuje' oxib tac'alibal.

¹⁶ Che ri kas oquibal pa ri uwo ja, cacoj jun tasbal re lajuj (10) bara' ruc' jun k'abaj ruc' niq'uiaj u rabic, re quem azul, quem morato', quiäk quem xukuje' tumim lino, u chac utzalaj t'isomanel, quebacoj quiejeb akan ruc' quiejeb tac'alibal.

¹⁷ Conojel ri akan ri e sutininak rij ri uwo ja, quebaban qui ch'epebal e re sak puak, xukuje' xiquinaj re sak puak xukuje' tak tac'alibal e re k'an ch'ich'.

¹⁸ Ri uwo ja cawinak oxlajuj (53) bara' ruc' jun k'abaj quetan ri u rabic, juwinak wakib (26) bara' ruc' quieb k'abaj ruc' niq'uiaj k'abaj quetan ri u wäch pa ri quieb u xcut, quieb bara' ruc' quieb k'abaj ruc' niq'uiaj k'abaj cärak'anibej. Ri Tasbal e re tumim lino are c'u ri qui tac'alibal e re k'an ch'ich'.

¹⁹ Conojel ri jastak ri quebajwataj pa ri Rachoch Dios, e re k'an ch'ich' quebanic, xukuje' tak ri e u ch'ic.”

Ri aseit ri cäjwataj chque ri yabal k'ak'

²⁰ “Chaya' takanic chque ri aj israelib chi cäquic'am ulok aseit re aseitun ri c'äte u pitz'ic, rech man quechup taj ri yabal k'ak' rech quenicow amak'el.

²¹ Ri Aaron e rachilam ri e u c'ojol e are' quesuc'uman ri yabal k'ak' rech quenicow jun ak'ab chuwäch ri Ajawaxel chupam ri Lic'om Rachoch Dios re rikoj ib, chrij ri ch'ukubal ri c'o chunakaj ri caxa re ri c'ulwächinic. Jun pixab wa' ri cäcanaj chque ri aj israelib xukuje' chque ri e quija'lil.”