Elem 25 - Quiché Bible

Ri jastak ri xesipax che u banic ri Lic'om Rachoch Dios

¹ Ri Ajawaxel xtzijon ruc' ri Moises, xubij che:

² “Chabij chque conojel ri aj israelib chi chiquimolo jun sipanic chwe. Rajawaxic caquimol chquixo'l ri conojel ri winak ri c'o qui rayinic che u ya'ic ruc' c'u ronojel canima',

³ chabij chque chi chquic'ama' ulok: k'an puak, sak puak, k'an ch'ich',

⁴ quem azul, quem morato, quiäk quem, coc'alaj lino, quismal q'uisic',

⁵ qui tz'umal ama'ib tak chij ri k'oom ruc' quiäk, ch'uch'ujalaj tak tz'um, che' re q'uisis,

⁶ aseit queya' chquipam tak ri yabal k'ak', c'oc' k'ol ri cayuj ruc' ri aseit re tastajic xukuje' ri cayuj ruc' ri k'ol rech cac'oc'atic,

⁷ abaj re tak cornalin xukuje' niq'uiaj abaj chic ri sibalaj e je'l na ri quenac' che ri atz'iak ri nim u k'ij xukuje' ri cäya' choc'uxaj ri cucoj ri qui nimal cojol tabal tok'ob.

⁸ Chibana' c'u jun k'ijilabal chwe rech quinc'oji' chquixo'l.

⁹ Are' c'u we c'olbal ri' ri quinc'oji' wi na, xukuje' conojel ri jastak ri quecoj chupam, rajawaxic junam qui banic cabano jacha' ri quinc'ut na chawäch.”

Ri cäxa ri c'olbal re ri c'ulwächinic

¹⁰ “Chabana' jun caxa re q'uisis, ri quetan job k'abaj u rabic, oxib k'abaj u wäch xukuje' oxib k'abaj cärak'anibej.

¹¹ Chacojo' utzalaj k'an puak chupam xukuje' chrij, chasutij ri u chi' che jun retz'balil re k'an puak,

¹² chabana' quiejeb u xiquin re k'an puak, chebacojo' che ri quiejeb rakan, quieb che ri juperaj, quieb che ri juperaj chic.

¹³ Chabana' xukuje' quieb balul re q'uisis, chach'uku' quij ruc' k'an puak,

¹⁴ chebajutu' pa tak ri u xiquin ri c'o pa tak u xcut ri caxa, rech cuya' cätelexic,

¹⁵ mebawesaj chic, chebaya' can chupam tak ri u xiquin ri caxa ri e c'o pa tak u xcut,

¹⁶ chaya' c'u chupam ri caxa ri pixab ri quenya' chawe.

¹⁷ Chabana' jun tz'apibal re utzalaj k'an puak, ri quetan job k'abaj u rabic, oxib k'abaj u wäch,

¹⁸ cärachilaj quieb wächbal re k'an puak ri aj cajalaj tobanelab ri c'o qui xic', ri ch'ayom ruc' bajibal pa ri quieb u tza'm.

¹⁹ Ri tz'apibal xukuje' ri quieb wächbal ri aj cajalaj tak tobanelab ri e c'o qui xic', xa jun cuc'axic quib; ri jun wächbal cäc'oji' che ri jun u tza'm, ri jun chic che ri jun chic u tza'm,

²⁰ cuc'ulaj rib qui wäch, are c'u ri qui palaj are caquica'yej ri tz'apibal, cäliq'ue ri qui xic' puwi' ri tz'apibal e jacha' jun mu'j.

²¹ Chaya' ri tz'apibal puwi' ri caxa, chaya' c'u ri pixab chupam ri caxa ri quenya' chawe.

²² Chila' quinrik wi wib awuc', kas puwi' ri tz'apibal chquixo'l ri quieb wächbal ri aj cajalaj tak tobanelab ri e c'o qui xic' ri e c'o puwi' ri caxa re ri c'ulwächinic, chila' quinya' wi na conojel ri nu takanic chawe ri caya' na chque ri aj israelib.”

Ri mexa ri cäya' wi ri wa chuwäch ri Dios

²³ “Chabana' jun mexa re q'uisis, ri quetan quiejeb k'abaj u rabic, quieb k'abaj u wäch, oxib k'abaj cärak'anibej.

²⁴ Chach'uku' rij ruc' utzalaj k'an puak, chasutij ri u chi' che jun retz'balil re k'an puak.

²⁵ Oxib u wi' k'abaj u wäch ri u chi' cabano, casutij c'u ri u chi' che jun retz'balil re k'an puak;

²⁶ chabana' quiejeb u xiquin re k'an puak, chebacojo' che ri quiejeb u tza'm, paquiwi' tak ri rakan,

²⁷ rech quecanaj kas chuchi' ri mexa, jeri' cuya' quejut ri che' chquipam, che telebal rech.

²⁸ E re q'uisis ri telebal rech ri mexa cabano, cach'uk c'u quij ruc' k'an puak,

²⁹ xukuje' chebabana' ri e u platoyil, ri e nimak tak u pac'bal, ri e u xaru', xukuje' tak kumubal ri quejamix wi ri sipanic quech ja'.

³⁰ Amak'el quebacoj ri caxlanwa puwi' ri mexa chnuwäch ri caxlanwa ri cätas chwe.”

Ri tzuc'ulibal re k'an puak

³¹ “Xukuje' caban jun tzuc'ulibal re utzalaj k'an puak, ch'ayom ruc' bajibal. Ri u tiq'uilibal, ri rakan, ri e u lakil, ri e u mansanil, ri e u cotz'ijal, xa jun ruc'axic rib,

³² pa ri quieb u xcut quebel wakib u k'ab, oxib pa ri jun u xcut, oxib pa ri jun u xcut chic.

³³ Chquijujunal ri wakib u k'ab ri quebel che ri rakan ri tzuc'ulibal quebacoj ox ox u lakil ri junam ruc' ri u cotz'ijal ri almendr, querachilaj ri u mansanil, ri u cotz'ijal,

³⁴ ri rakan xukuje' quebacoj quiejeb u lakil junam ruc' ri u cotz'ijal ri almendr, rachilam ri u mansanil, ri u cotz'ijal.

³⁵ Chquijujunal ri oxc'ulaj u k'ab ri quebel che ri tzuc'ulibal cacoj jun cotz'i'j paquiwi'.

³⁶ Ri e u mansanil xukuje' ri e u k'ab xa jun ruc'axic quib ruc' ri tzuc'ulibal, re utzalaj k'an puak cabano, ch'ayom ruc' bajibal.

³⁷ Chebacojo' wukub yabal k'ak' che, ri cäquiya' sakil chquiwäch aretak quetzijic,

³⁸ ri chupbal ri cajwataj che ri yabal k'ak' xukuje' ri alaj tak u lak, e re utzalaj k'an puak quebabano.

³⁹ Oxib arob utzalaj k'an puak cacoj che ri tzuc'ulibal xukuje' conojel ri e u chaconisan,

⁴⁰ chatoc il che u banic, je jas ri xec'utun chawäch puwi' ri juyub.”