Elem 24 - Quiché Bible

Xjiquibax ri c'ulwächinic

¹ Ri Ajawaxel xubij che ri Moises: “Chatpakal ulok pa ri c'olbal ri in c'o wi, chawachilaj ulok ri Aaron, ri Nadab, ri Abiu xukuje' oxc'al lajuj (70) nimak tak tatayib re Israel, naj c'u jubik' checanaj wi canok chexucul chila'.

² Xuwi ri at ya'tal chawe chi catnakajin chwe; ri niq'uiaj chic menakajin chwe, mawi mepaki ulok ri winak awuc'.”

³ Xbe c'u ri Moises xubij che ri tinimit conojel ri tzij ri xubij ri Ajawaxel, xukuje' ri u takom u banic conojel c'ut xa pa jun ch'abal xquitzelebej u bixic: “Quebekanimaj na conojel ri tzij ri u bim ri Ajawaxel chke.”

⁴ Ri Moises xutz'ibaj ronojel ri tzij ri xubij ri Ajawaxel che, sibalaj c'u ak'ab xwalij chucab k'ij, xuyac jun porobal chuxe' ri juyub, xebucoj cablajuj (12) tastalic tak abaj, jun che u q'uexwäch jujun ramak' re Israel.

⁵ Xebusiq'uij jujun alabom chquixo'l ri aj israelib, xebutak che qui pilic jujun wacax che qui poroxic che tabal tok'ob ri quechajirisaxic xukuje' che tabal tak tok'ob quech utzirisan ib.

⁶ Ri Moises xuc'am pa niq'uiaj che ri quic', xuya' pa jujun nimak tak lak ri niq'uiaj chic xuchicoj puwi' ri porobal.

⁷ Xuc'am ri u wujil ri pixab, xusiq'uij chquiwäch ri winak, “xquibij c'u ri winak: Cäkaban na ronojel ri u takanic ri Ajawaxel.”

⁸ Xuc'am ri Moises ri quic' xuchicoj paquiwi' ri winak, xubij: “Are quic' wa' ri cajiquiban ri c'ulwächinic ri u banom ri Ajawaxel iwuc', puwi' ri qui tac'alibal conojel tak we tzij ri'.”

⁹ Xpaki' c'u ri Moises puwi' ri juyub rachilam ri Aaron, ri Nadab, ri Abiu xukuje' ri e oxc'al lajuj (70) nimak tak tatayib re Israel.

¹⁰ Chila' c'ut xquil wi ri u Dios ri Israel: ri tac'al wi je ta ne ri abaj zapir, ri sibalaj cäjuluwic junam u ca'yebal ruc' ri caj aretak man c'o ta sutz' c'o chuwäch.

¹¹ Man c'u xuban ta c'ax ri Dios chque we aj israelib ri' ri nimak qui k'ij, ri xquil u wäch ri Dios, xewa'ic xukuje' xebuq'uianic.

Ri Moises cäpaki' puwi' ri juyub Sinai

¹² Ri Ajawaxel xubij che ri Moises: Chatpakal ulok puwi' ri juyub, jawije' ri in c'o wi, chinaweyej chila', quebenjach c'u bic chawe jujun tz'alam tak abaj ri e nu tz'ibam wi ri pixab xukuje' tak ri takomal ri cajwataj che qui tijoxic ri aj israelib.

¹³ Xwalij c'u ri Moises xpaki' puwi' ri u juyub ri Dios, rachilam ri Josue ri to'l rech.

¹⁴ Xubij c'u chque ri e nimak tak tatayib: “Chujiweyej can waral, c'ä cujtzelej na ulok. Cäcanaj can ri Aaron rachil ri Hur iwuc', we c'u c'o jun cäriktaj pa jun c'ax chubij che ri Aaron rachilam ri Hur.”

¹⁵ Xuwi xbitaj wa' rumal ri Moises xpaki' puwi' ri juyub, xmuktaj c'u ri juyub rumal jun sutz'.

¹⁶ Xkaj ri u juluwem ri Dios puwi' ri juyub Sinai, wakib k'ij xch'ukutaj rumal ri sutz'. Chuwuk k'ij c'ut, ri Ajawaxel xusiq'uij ulok ri Moises pa ri sutz'.

¹⁷ Ri u juluwem ri Ajawaxel xc'utun chquiwäch ri aj israelib jacha' jun k'ak' ri bik'onel, puwi' ri juyub ri naj elinak chicaj.

¹⁸ Ri Moises xoc pa ri sutz' xpaki' puwi' ri juyub, xbeytaj c'u cawinak (40) k'ij cawinak (40) chak'ab chila'.