Elem 23 - Quiché Bible

Pixab che u banic suq'uilal

¹ “Mebaya' tak k'alajisanic ri xa e banoj tak tzij, mawi majunaj a tzij ruc' ri banal etzelal rech catux k'alajisanel che u to'ic u wi' ri man suq'uil taj.

² Maban awech ri etzelal ri cäquiban ri tinimit winak. Macoj awib cuc' ri tinimit winak cho ri k'atal tzij, che u banic jun etzelal,

³ mawi matok'obisaj u wäch ri meba' we c'o u mac.

⁴ We cärik ri u wacax o ri u bur ri a c'ulel ri u sachom canok, chac'ama' bic jaya' can che.

⁵ Chato' ri cäretzelaj a wäch; we cawilo chi ri u bur ri u banom u c'ulel chawe kajinak chuxe' ri reka'n, xak matca'y can che; chato' che u quiric ri reka'n ri ximatal chrij ri u bur.

⁶ Majech'obisaj ri suq'uilal ri ya'tal che ri meba' aretak cak'at tzij puwi',

⁷ chanajtajisaj awib chquique ri tzujunic ri xa e banoj tak tzij, mawi mak'at tzij chi cäcämisax ri winak ri man c'o ta jubik' u mac, man quink'alajisaj ta c'ut chi ma ta c'o u mac ri c'o u mac.

⁸ Mac'am u pa k'abaj, ri u pa k'abaj cubano chi ri k'atal tak tzij cäquiban ri man suc' taj cubano chi cäc'äjisax qui wäch ri man c'o ta jubik' qui mac.

⁹ Maban c'ax che ri rokxanim rib awuc', xa c'u xiwokxanij na iwib ix pa Ejipt, i no'm chic ri c'ax re ri okxanim ib pa jun ulew chic.”

Ri uxlanem man c'o ta esbal ib che u banic

¹⁰ “Wakib junab catic u wäch ri awulew, cayac c'u na ri u wäch,

¹¹ pa ri uwuk junab matic u wäch: chawuxlanisaj, chaya' chque ri mebayib ri e awinakil chi cäquitij ri u wächinic ri awulew, are c'u ri cäto'taj canok chquitija' ri awaj ri e c'o pa tak ri juyub. Xukuje' je chabana' wa' chque ri uva, xukuje' chque ri e a aseitun.

¹² Ronojel ri rajawaxic u banic awumal, chabana' can pa ri wakib k'ij, pa ri uwuk k'ij c'ut rajawaxic catuxlanic, rech cuxlan ri a wacax, ri a bur, rech cuc'ac'arisaj ri u chuk'ab ri lok'om a pataninel xukuje' ri man a winakil taj.

¹³ Chibana' ronojel ri nu bim chiwe, mawi c'u jumul mätatajic chi quel ulok pa i chi' ri qui bi' ri jule' tak diosib chic.”

Oxib nimak tak nimak'ij

¹⁴ “Oxib nimak'ij chabana' pa ri jun junab che u ya'ic nu k'ij.

¹⁵ Chawoc'owisaj ri nimak'ij re ri caxlanwa ri man cäya' ta ch'am ruc', je chabana' jacha' ri takanic ri nu yo'm chawe, pa we nimak'ij ri' wukub k'ij catij caxlanwa ri man cäya' ta ch'am ruc'. Cäban we nimak'ij ri' pa ri ic' Abib are c'u ic' wa' ri xatel ulok pa Ejipt. Man c'o ta c'u jun ri cuya' copan che wilic ri ma ta c'o jas ruc'am ulok.

¹⁶ Chabana' xukuje' ri nimak'ij rech ri qui molic ri nabe tak u wächinic ri xatic pa ri ulew, xukuje' ri nimak'ij rech ri u yaquic ri u wäch ri ulew rech ri u q'uisbal ri junab, aretak caq'uis qui mulixic conojel ri qui wäch ri a tico'n.

¹⁷ Conojel ri winak rajawaxic quebopan chuwäch ri Ajawaxel oxmul pa ri jun junab.

¹⁸ Aretak quebaya' ri awaj re tabal tak tok'ob chnuwäch mebachi'j junam cuc' ri qui quiq'uel xukuje' ri caxlanwa ri yo'm ch'am ruc', caya' matas can ri u xepoyil che ri ucab k'ij.

¹⁹ E are' ri nabe tak u wächinic ri awulew ri e je'l na, chebac'ama' bic pa ri rachoch ri Ajawaxel. Mebatzac alaj tak q'uisic' chupam ri u tu' ri u nan.”

Ri tako'n ri xutak ulok ri Ajawaxel

²⁰ “Chawilampe', quintak bic ri nu tako'n aj caj rech cänabej chawäch, rech catuchajij pa ri be, catuc'am bic pa ri c'olbal ri nu suc'umam chawe.

²¹ Matnajtin che; chanimaj maban awib chi ma ta mawaj ch'abexic che, are' c'o c'u che nu q'uexwäch, we quixmacunic man qui xucuy taj.

²² We c'u kastzij catniman che, caban ronojel ri nu takom u banic, quinux qui c'ulel ri qui banom qui c'ulel chawe, quink'atij qui wäch ri quek'atin a wäch.

²³ Ri nu tako'n aj caj canabej na chawäch, catuc'am bic pa ri culew ri aj amoreyib, ri aj hititib, ri aj perezeyib, ri aj cananeyib, ri aj hebeyib, ri aj jebuseyib, ri quebenbok na c'ä chquixe'.

²⁴ Matakej u banic awech ri caquiban we tinimit ri'. Matxuqui chquiwäch tak ri e qui diosib, mawi mebak'ijilaj; xane' chasacha' qui wäch ri qui diosib xukuje' tak ri tastalic tak abaj.

²⁵ Chak'ijilaj ri Ajawaxel ri a Dios, cutewichi'j c'u na ri a wa, xukuje' ri awuq'uia'. Ri in quinwesaj ronojel u wäch yabil chawij,

²⁶ quinbano chi man catcäm ta chanim xane' c'ä cätz'akat na ri k'ijol. Man c'o ta jun ixok ri' pa ri awulew ri cuc'ulmaj ta tzakanic o ma ta alc'ualanel.

²⁷ Quinbano chi ri nimalaj xe'n ib ri quic'am ulok cänabej chawäch pa nimak tak ri tinimit ri catoc'ow wi, quebanimaj c'u ri a c'ulel chawäch.

²⁸ Quinbano chi quebanimaj bic ri aj hebeyib, ri aj hititib, xukuje' ri aj cananeyib cumal ri sita'l.

²⁹ Man quebenwesaj ta bic chawäch pa jun junab rech man cäjuyubar ta ri ulew, mawi quepok' ri juyubal tak awaj ri cäquiban ta c'ax chawe.

³⁰ Pa jutak bik'al quebenwesaj bic chawäch, c'ä queq'uiyir na ri awalc'ual ri queboc che rechbexic ri ulew.

³¹ Ri e a c'ulbat cächapletaj ulok chuchi' ri Quiäk Plo, quetakal c'ä chuchi' ri qui plo ri aj pilisteyib, cächapletaj ulok chuchi' ri chaki'j uwo sak quetakal c'ä chuchi' ri nima' Euprats. In e nu jachom we winak ri' pa a k'ab ri e c'o pa tak we ulew ri' quebaq'uiak c'u na bic chawäch.

³² Muc'ulaj rib a tzij cuc' mawi cuc' ri e qui diosib,

³³ mawi maya' chque chi quecanaj ta canok chupam ri awulew, rech man catquitakchi'j ta che u banic mac chnuwäch. Mebak'ijilaj ne ri qui diosib, are c'u u sachisaxic a wäch wa.”