Elem 22 - Quiché Bible

Pixab che qui tojic eläk'anic

¹ “We c'o jachin cäreläk'aj jun wacax o jun chij, cupil c'ut o cuc'ayij; job wacax cutojbej rech ri wacax, quiejeb chij cutojbej rech ri chij.

² We cäriktaj jun eläk'om cätajin cuban ri eläk' chak'ab, we c'u cäsoquic, cäcäm c'ut, ri u cämical man cächomax taj chi are jun cämisanic.

³ We c'u ne sak chic aretak xcämisaxic, ri u cämical cächomaxic chi are jun cämisanic. Are c'u ri queläk'ic cutoj na ri rajil ri reläk'am we man c'o ta cuma' wi ri cutojbej rech, cäc'ayix ri are' che u tojic ri rajil ri reläk'am.

⁴ We c'u c'ä c'asal ri awaj cäriktaj ruc' ri eläk'om, cucamulij u tojic we wacax, we bur, we chij.

⁵ We c'o jun winak quebuyuk'uj ri rawaj pa jun juyub o pa jun ulew ri ticom wi uva, queboc c'u ri rawaj chupam ri u juyub jun winak chic, cutoj u q'uexel ri xquitij ri awaj ruc' ri utzalaj u wächinic ri rulew, o ri uva ri u ticom.

⁶ We c'o jun winak cunuc' u k'ak', cuc'am c'u rib ri k'ak' cuporoj ri q'uix cuporoj c'ut ri trico ri mulinic o ri xa co'l man quek'atok o ronojel ne ri tico'n; ri winak ri' cutoj ri xc'at rumal ri k'ak'.

⁷ We c'o jun winak cärokxanej u rajil ruc' jun winak chic o jun jasach ri pakal rajil, we c'u quebeläk'ax we jastak ri' pa ri rachoch rumal jun eläk'om, we c'u cäriktaj ri eläk'om cucamulij u tojic ri xreläk'aj;

⁸ we c'u man cäriktaj ri eläk'om, cäc'am bic ri ajchak'e ja chuwäch ri k'atal tzij rech quetamaxic we man u tzakom u k'ab chque ri jastak ri okxanim ruc'.

⁹ We c'o jun winak cuban rech che jun wacax, jun bur, o jun chij, o jun atz'iak o apachique jasach ri sachinak, cäpe ta chi c'u jun winak cubij chi rech we jasach ri'; ri xquic'ulmaj we quieb winak ri' cäc'am bic chuwäch ri Dios, jachin c'u ri cäk'alajisaxic chi ajchak'mac, cucamulij u tojic che ri jun chic.

¹⁰ We c'o jachin cärokxanej jun bur, jun wacax, jun chij o apachique awaj ruc' jun winak chic, we c'u ne cäcämic o c'o jas cuc'ulmaj o queläk'ax ruc' ri man c'o ta jun quilowic,

¹¹ ri winak ri' cuban na jun chi'nic ri kas caban na pa u bi' ri Ajawaxel chuwäch ri ajchak'e ri awaj chi man xutzak ta u k'ab che ri okxanim ruc'. Ri ajchak'e ri awaj cuc'am na u k'abal ri xbix che, man c'o ta cutoj na ri jun chic.

¹² We c'u xrilo aretak xeläk'ax bic ri awaj, cutoj na che ri ajchak'e.

¹³ We c'u xch'äkatix ri awaj rumal jun juyubal awaj, rech man c'o ta cutojo', rajawaxic cuc'ut ri u ch'äkapil ri cäminak awaj.

¹⁴ We c'o jun winak cukaj ri rawaj jun räch winak, we c'u cäsoctaj ri awaj o cäcämic, we c'u man c'o apan ri ajchak'e, cutoj na che ri ajchak'e;

¹⁵ we c'u c'o apan ri ajchak'e, man c'o ta cutojo'. We c'u tojom ri kajebal rech ri awaj, xuwi ri kajebal rech cutojo'.”

Pixab chrij ri c'aslemal xukuje' chrij ri cojonic

¹⁶ “We c'o jachin cusub jun ali k'apoj, cäwar c'u ruc', cutoj ri u k'apojil, rajawaxic c'ut cäc'uli' ruc'.

¹⁷ We c'u man craj ri u tat ri ali cuya' ri u mia'l che ri ala, ri ala kas cutoj wi na ri u k'apojil ri ali ri nak'atisam u ya'ic.

¹⁸ Mic'asba' ri ixok ajitz.

¹⁹ Apachin ri cupal ruc' jun awaj, cäcämisaxic.

²⁰ Ri quebuya' tabal tak tok'ob chquiwäch jule' diosib chic ri xuwi ya'tal qui ya'ic chuwäch ri Ajawaxel, cäcämisaxic.

²¹ Maban c'ax che ri rokxanim rib awuc', xa c'u xiwokxanij na iwib ix pa Ejipt.

²² Maban c'ax chque ri malca'nib, mawi chque ri minorib,

²³ we c'u caban c'ax chque, cäquita' c'u ri nu to'banic, quinbe c'u na che qui to'ic

²⁴ ruc' c'u nimalaj woyowal quixincämisaj na ruc' ch'ich' re ch'o'j. Ri e iwixokil quecanaj na che malcanil xukuje' ri i walc'ual quecanaj na can pa minoril.

²⁵ We caya' puak pa jalomal che ri meba' ri awinakil, je maban che jas ri cuban ri ya'l jolomal, mawi matok'ij ral ri a rajil che.

²⁶ We ri winak ri' cuya' ri u k'u' chawe che kajebal rech ri u jalomal ri xuban awuc', chatzelej ri u k'u' che aretak cäkaj ri k'ij,

²⁷ rumal rech chi xuwi u k'u' wa' c'olic ri cuch'ukbej rib cho ri tew. We man catzelej che, ¿jas ri cucojo cäwaric? We c'u cutz'onoj ri nu to'banic, quinbe na che u to'ic, in nak'atal c'ut chi quinban tok'ob.

²⁸ Mayac royowal ri Dios, mawi mac'okoj ri cätakan puwi' ri a tinimit.

²⁹ Mabey awib che qui c'amic ulok ri a sipanic re ronojel ri a tico'n xukuje' re ronojel ri a uva. Ri a c'ojol ri nabeal caya' na chwe,

³⁰ junam caban chque ri nabe tak cal ri a wacax, ri a chij. Cuya' quecanaj na wukub k'ij ruc' qui nan, chupam c'ut ri uwajxak k'ij ri calaxic quebajach na chwe.

³¹ Ri ix rajawaxic chi ix tasom tak wik chwe. Mitij ri qui ti'jal ri awaj ri quech'äkatix can cumal ri juyubal tak awaj pa ri c'ache'laj, chebiq'uiaka' chquiwäch ri tz'i'.”