Elem 21 - Quiché Bible

Pixab chque ri pataninelab lok'om

¹ “Are tak wa' ri pixab ri quebaya' chque ri aj israelib:

² We calok' jun lok'om pataninel a wäch aj hebrey, wakib junab cäpatanij na, pa ri uwuk junab cätzokopitaj bic, man c'o ta cutoj can che ri u tzokopixic bic.

³ We xak u tuquiel xopanic, xak u tuquiel quel bic; we ruc'am rixokil copanic, cuc'am na bic ri rixokil;

⁴ we xya' rixokil rumal ri rajaw, we c'u xec'oji' ral ri ixok we alabom o alitomab, ri ixok e rachilam ri ral quecanaj can ruc' ri rajaw, ri lok'om pataninel xak u tuquiel quel bic.

⁵ We c'u ri lok'om pataninel man craj taj cuya' can ri rajaw, ri rixokil xukuje' ri ralc'ual,

⁶ ri rajaw cuc'am bic chquiwäch ri k'atal tak tzij, cukebisaj chuwäch ri uchi'ja o chuwäch ri apal, cuwor ri u xiquin ruc' jun t'ist'ic ch'ich'. Jeri' kas xa jumul cäcanaj can che lok'om pataninel.

⁷ We c'o jachin jun cuc'ayij ri u mia'l che lok'om pataninel, man je ta u tzokopixic cäbanic jacha' ri qui tzokopixic ri pataninelab achijab.

⁸ We man craj ri rajaw cuc'am che rixokil rumal rech chi man cäkaj ta ri ali chuwäch, cuya' be we c'o jachin calok'owic; pune' retzelam u wäch man cuya' taj cuc'ayij che jun winak ri man u winakil taj.

⁹ We cuc'uluba' ruc' ri u c'ojol, junam chubana' che jacha' ri cäban che jun mialaxel.

¹⁰ We c'u cuc'ama' chi jun rixokil muxuyaj ri cutij ri nabe rixokil, xukuje' ri ratz'iak, mawi ma ta cäwar chi ruc'.

¹¹ We c'u man c'o ta jun chque we oxib jastak ri' quebuya' che, we ixok ri' man c'o ta cäk'atinic, cuya' quel bic man c'o ta tojbal cuya' canok.”

Pixab chque tak ri banoj ri man c'o ta quinabexiquil

¹² “Ri winak ri cuban jun ch'ayanic, we c'u xcäm ri xuch'ayo, cäcämisax ri xbanow ri ch'ayanic.

¹³ We c'u man u chomam ta u banic, xane' are' ri Dios xajawinic chi cäcämic, ri in quinc'ut na jun c'olbal ri cuya' cuto' wi rib.

¹⁴ Che c'ut ri coyowar chrij ri rajil u tz'akat cucämisaj c'ut ruc' ronojel u chuk'ab, catzucux u rikic pune' ta cuc'u' rib chunakaj ri porobal, cak'at tzij puwi' chi cäcämisaxic.

¹⁵ Ri cusoc ri u tat o ri u nan, cac'okox na che cämical.

¹⁶ Ri cäreläk'aj bic jun winak, cuc'ayij c'ut, o we cäriktaj ruc', cac'okox na che cämical.

¹⁷ Ri cuc'okoj ri u tat o ri u nan, cac'okox na che cämical.

¹⁸ We c'o quieb achijab quech'ojinic, we c'u ri jun cusoc ri jun chic ruc' abaj o ruc' t'oc, ri cukasaj pa ch'at man cäcäm ta c'ut,

¹⁹ ri xch'ayanic cäk'alajisaxic chi man c'o ta jubik' u mac we ri xsocotajic cäwalijic cuchaplej binem chrij ch'ämiy, cutoj c'u ri u cunaxic xukuje' tak ri k'ij ri man cächacun taj.

²⁰ We c'o jachin jun cuch'ay ri u lok'om pataninel ruc' che', we achi o ixok, cäcäm c'u pa u k'ab, cäc'äjisax na u wäch.

²¹ We c'u cäc'asi na jun k'ij o quieb k'ij, man cäc'äjisax ta u wäch, aj chak' lok'om pataninel c'ut.

²² We e c'o e quieb achijab quech'ojinic, cäquekle'j c'u apan jun ixok ri yawab winak chic we c'u cuc'ulmaj tzakanic man cäcäm ta c'ut ri ixok, ri ajchak'mac cutoj na ri cutok'ij ri rachajil ri ixok, jas ri cäquik'at ri k'atal tak tzij.

²³ We c'u ri u c'aslemal ri ixok xak quieb cubij puwi', cätokix na c'aslemal che u q'uexwäch c'aslemal,

²⁴ bak'wächaj che u q'uexwäch bak'wächaj, wareyaj che u q'uexwäch wareyaj, k'abaj che u q'uexwäch k'abaj, akanaj che u q'uexwäch akanaj,

²⁵ c'atic che u q'uexwäch c'atic, socotajic che u q'uexwäch socotajic, t'oconic che u q'uexwäch t'oconic.

²⁶ We c'o jachin cuban c'ax che ri u bak'wäch ri lok'om pataninel, we achi o ixok, cäcanaj c'u moy, cutzokopij bic che u q'uexwäch ri c'ax ri xurik ri u bak'wäch.

²⁷ We c'u xresaj jun u ware, xukuje' cutzokopij bic che u q'uexwäch ri u ware.”

Pixab chrij jun c'ax ri cätaklebexic

²⁸ “We c'o jun wacax cutok' jun achi o jun ixok, we c'u cucämisaj, cäcämisax ri wacax ruc' abaj, mätijow ri u ti'jal, are c'u ri ajchak'e ri wacax man cäc'äjisax ta u wäch.

²⁹ We c'u ri wacax nak'atal chic cätok'inic, cucämisaj c'u jachin jun, cäcämisax na ri wacax ruc' abaj xukuje' ri ajchak'e we reta'm chi tok'onel wi ulok ri u wacax xa c'u man oquinak ta il che u chajixic.

³⁰ We c'u cäbix che chi cuya' cutor rib ruc' puak rech man cäcämisax taj, rajawaxic cuya' joropa' ri cätok'ix che, che u q'uexwäch ri u c'aslemal.

³¹ Kas c'u are pixab wa' cäc'ojic we cätok' jun ala o jun ali.

³² We c'u ri wacax cutok' jun lok'om pataninel, achi o ixok, cäcämisax ri wacax ruc' abaj, cätoj c'u ruc' juwinak lajuj (30) rakan sak puak che ri rajaw ri pataninel lok'om, we achi o ixok.

³³ We c'o jachin cutek'eba' can u wi' jun c'ua', o cuc'ot jun c'ua' ri man cuch'uk ta can ri u wi', cätzak ta c'u jun wacax o jun bur chupam,

³⁴ ri ajchak'e ri c'ua' cutoj ri awaj pa u k'ab ri ajchak'e ri awaj, cärechbej c'u can ri cäminak awaj.

³⁵ We ri u wacax jachin jun, cutok'o, o cucämisaj ri u wacax jun winak chic, cäc'ayix ri wacax ri c'aslic, cäban quieb che ri puak ri xc'ayibex re xukuje' cäban quieb che ri cäminak wacax.

³⁶ We c'u etamtalic chi tok'onel wi ulok ri wacax, man c'u oquinak ta il ri ajchak'e che u chajixic, cuya' na jun c'aslic wacax che u q'uexwäch ri wacax ri xcämic, cärechbej c'u can ri cäminak wacax.”