Elem 20 - Quiché Bible

Ri lajuj takomal

¹ Ri Dios xch'awic, xebubij c'ut conojel tak we tzij ri':

² “In ri' ri Ajawaxel ri a Dios, ri xatresaj ulok pa Ejipt, ri at cojom wi che pataninel jacha' ta ne ri lok'om.

³ Mec'oji' jule' tak diosib chic we ta ma ta xak xuwi ri in.

⁴ C'o jun a dios maban chawe mawi u wächbal ri c'o ajsic chupam ri caj mawi u wächbal ri c'o iquim chuwäch ri ulew mawi u wächbal ri c'o chupam ri plo chuxe' ri ulew.

⁵ Mamej awib chquiwäch mawi mebaya' k'ijilanic chque, rumal rech chi in ri' ri Ajawaxel ri a Dios, Dios achixomanel ri cuc'äjisaj qui wäch ri etzelal ri caquiban ri tataxelab, pa ri qui wi' ri calc'ual, ri qui' tak qui mam xukuje' xiquin tak qui mam ri caquetzelaj nu wäch;

⁶ quebenlok'ok'ej pa jun mil ija'lil ri quinquilok'ok'ej xukuje' quequitz'akatisaj qui banic ri e nu takomal.

⁷ Itzel u cojic ri u bi' ri Ajawaxel ri a Dios mabano, ri are' c'ut man cuya' ta c'u can ri winak chi xak ta jeri' chi ma ta cuc'äjisaj u wäch ri itzel u cojic ri u bi' cubano.

⁸ Chanataj ri k'ij re uxlanem chawe, che u tasic che ri Ajawaxel.

⁹ Chatchacun wakib k'ij ronojel c'ut ri rajawaxic u banic a wumal chabana' pa tak we k'ij ri',

¹⁰ are c'u ri uwuk k'ij re uxlanem ri tasom che ri Ajawaxel ri a Dios. C'o jun chac maban chupam we k'ij ri', mawi ri a c'ojol mawi ri a mia'l, mawi ri a pataninel lok'om, achi o ixok, mawi tak ri e awawaj, mawi ri man a winakil taj ri jekel chupam ri a wachoch.

¹¹ Rumal rech chi wakib k'ij xucoj ri Ajawaxel che u banic ri caj, ri ulew, ri plo xukuje' ronojel ri c'o chquipam, xoc c'u che uxlanem chupam ri uwuk k'ij. Rumal ri' ri Ajawaxel xutewichi'j ri k'ij re uxlanem xuk'alajisaj c'ut chi tastalic k'ij.

¹² Nim chawila' wi ri a tat xukuje' ri a nan, rech naj catc'asi' cho ri ulew ri cuya' ri Ajawaxel ri a Dios chawe.

¹³ Mat cämisanic.

¹⁴ Mat kaj pa mac ruc' jun winak chic.

¹⁵ Mat eläk'anic.

¹⁶ Mebabij banoj tak tzij che u banic c'ax che ri awajil a tz'akat.

¹⁷ Maquiäk rayij ri rachoch ri awajil a tz'akat: maquiäk rayij ri rixokil, mawi ri u pataninel lok'om, achi o ixok, mawi ri u wacax, mawi ri u bur, mawi jun jasach ri rech.”

Ri aj israelib cäquina' quib chuwäch ri Dios

¹⁸ Conojel ri aj israelib kas xquinabej ri cakulja, xukuje' ri caypa', ri cok'ibal trompet xukuje' ri juyub ri mukutal pa ri sib; xebirbobic, naj xequiya' wi quib.

¹⁹ Xquibij che ri Moises: “At chujach'abej, cujniman c'u na; mujch'abex c'u rumal ri Dios, mujcäm ne konojel.”

²⁰ Ri Moises xubij chque: “Mixe'j iwib. Ri Dios petinak che i c'ambejexic rech amak'el quina' iwib chuwäch rech man quixmacun taj.”

²¹ Ri winak naj e canajinak wi canok, chupam c'ut ri jok'otaj ri' xkeb ri Moises ruc' ri k'ekumalaj sutz' ri c'o wi ri Dios.

Pixab che u banic ri porobal

²² Ri Ajawaxel xubij che ri Moises: “Je' chabij wa' chque ri aj israelib: ‘Ri ix iwilom chi in ch'awinak ulok kas pa ri caj iwuc'.

²³ Mebiban diosib re sak puak o re k'an puak rech quebik'ijilaj jacha' ri quiban chwe in.

²⁴ Chibana' jun porobal re ulew chwe, chebichi'j c'ut chwe puwi', ri e iwawaj quech ri e i tzobaj xukuje' tak wacax jacha' che tabal tok'ob ri cächajirisaxic xukuje' tabal tak tok'ob re utzirisan tak ib. Quinpe' c'u na quixintewichi'j c'u na chquipam ri jujun tak c'olbal ri quinwaj wi chi cänatax ri nu bi'.

²⁵ We c'u re abaj ri porobal quiban chwe mebicoj tzoc'om abaj, aretak c'u qui tzoc' ri abaj ruc' ch'ich' qui ban che chi man takal ta chi che chi coc ta che porobal.

²⁶ Xukuje' micoj ak'anibal che i pakalibal puwi' ri porobal ri quiya' wi nu k'ij, rech man quic'ut taj ri u ch'analiquil ri i cuerp.’ ”