Elem 16 - Quiché Bible

Ri Dios cuya' ri jaswa' (ri u bi' mana pa hebrey)

¹ Xebel bic conojel ri aj israelib pa Elim, xebopan pa ri chaki'j uwo sak re Sin ri c'o chuxo'l ri Elim ruc' ri Sinai. Pa ri u niq'uiajiribal ri ucab ic' che ri quelic ulok pa Ejipt.

² Chila' c'ut pa ri chaki'j uwo sak xquichaplej wi u bixic c'axalaj tak tzij chrij ri Moises xukuje' chrij ri Aaron.

³ Je c'u xquibij wa' chque: “¡C'o ta banom wi chi xuban ta ri Ajawaxel chi xujcäm ta pa Ejipt! Chila' xujt'uyi wi chquinakaj ri jujun tak t'uy ti'j, cuj wa' c'ut c'ä cujnoj na, ri ix c'ut xujic'am ulok pa we chaki'j uwo sak ri' che ka cämisaxic konojel rumal wi'jal.”

⁴ Ri Ajawaxel xubij che ri Moises; “Quinbana' na chi cäjabin ulok qui wa chicaj. Conojel c'u ri winak quebel na bic che u molic ulok ri cäquitij che ri jun k'ij. Quinwaj quinwilo jachin cäniman che ri nu takanic, xukuje' jachin ri man cäniman taj.

⁵ Pa ri uwak k'ij aretak caquisuc'umaj ri caquic'am bic cho ja, rajawaxic caquimol bic ri caquitij re quieb k'ij.”

⁶ Ri Moises rachilam ri Aaron xquibij chque ri aj israelib: “Benak k'ij quiwetamaj na chi are ri Ajawaxel xixesan ulok pa Ejipt,

⁷ ak'ab quiwil na ri u juluwem ri Ajawaxel, u tom c'ut chi c'ax quixch'aw chrij. ¿Jas ta ri ka banic uj chi c'ax quixch'aw chkij?”

⁸ Xubij chi c'u ri Moises chque ri aj israelib: “Ri Ajawaxel benak k'ij cuya' na i ti', ak'ab cuya' na i wa ri tz'ebetalic, u tom c'ut chi c'ax quixch'aw chrij. ¿Jas ta ri ka banic uj? Man chkij ta c'u uj c'ax xixch'aw wi xane' chrij ri Ajawaxel.”

⁹ Ri Moises xubij che ri Aaron: “Chabij chque conojel ri aj israelib chi chekeb chuwäch ri Ajawaxel, u tom c'ut chi c'ax quech'awic.”

¹⁰ Aretak cätajin cätzijon ri Aaron cuc' ri aj israelib, conojel xeca'y apan pa ri chaki'j uwo sak, xc'utun c'u ri u juluwem ri Ajawaxel chquiwäch pa jun sutz'.

¹¹ Ri Ajawaxel xutzijobej ri Moises, xubij c'u che:

¹² “Nu tom chi c'ax quech'aw ri aj israelib. Chatch'aw cuc' chabij chque: ‘Benak k'ij quitij ti'j, ak'ab quitij wa c'ä quixnoj na. Jeri' quiwetamaj na chi in ri' ri Ajawaxel.’ ”

¹³ Pa ri u benabal k'ij ri' xepe sakco'r, ri xquinojisaj u wäch ri ulew re ri kajebal, pa ri u sakaric c'o jun räxk'ab pa tak u xcut ri kajebal.

¹⁴ Aretak xtzaj ri räxk'ab, xcanaj can jun jasach jacha' ri sakbach cho ri ulew pa ri chaki'j uwo sak.

¹⁵ Aretak ri aj israelib xquilo, rumal c'u rech chi man queta'm ta u wäch, xquibij chquibil tak quib: “¿Jas wa'?” Ri Moises xubij chque: “Are wa' ri wa ri cuya' ri Ajawaxel chiwe che tzukbal iwib.

¹⁶ Are wa' ri takanic ri u yo'm ri Ajawaxel: ‘Chijujunal chimolo ri cajwataj che, che u tijic, xukuje' chebiwajilaj joropa' ri e c'o pa ri iwachoch, craj ne cacab tzima (2 litro) ri cäquitij jujun winak.’ ”

¹⁷ Je xquiban ri aj israelib. E c'o jujun q'ui xquimolo; jujun man q'ui taj,

¹⁸ jas ri pajbal ri xya' u bixic; man c'o ta c'u xto'taj can ruc' ri sibalaj q'ui xumolo, mawi c'o xeraj na che ri xa jubik' xumolo. Chquijujunal qui mulin ri cajwataj chque che u tijic.

¹⁹ Xubij c'u ri Moises chque: “C'o jun c'o mutas can che re ri ucab k'ij.”

²⁰ E c'o c'u jujun ri man xquinimaj taj ri xubij ri Moises, xquitas can jutak bik' che re ri ucab k'ij, are c'u ri xquic'olo xenoj che xjut, sibalaj xchuwiric. Xoyowar c'u ri Moises chquij.

²¹ Chquijujunal c'ut pa tak ak'abil cäquimulij ri cäquitij che ri jun k'ij, ri jaswa' ri cäcanaj cho ri ulew cäja'r rumal ri u chuk'ab ri k'ij.

²² Pa ri uwak k'ij c'ut xquimol cajcaj tzima (2 litro) ri jaswa' chquijujunal, ri nimak qui banic chquixo'l ri aj israelib xequibij che ri Moises,

²³ xubij c'u ri Moises chque: “Are wa' ri takanic ri u yo'm ri Ajawaxel. Chwek are k'ij re uxlanem, jun uxlanem ri tastalic che u k'ijilaxic ri Ajawaxel. Chitzaca' camic ri rajawaxic u tzaquic, ri rajawaxic u rokowisaxic chi rokowisaj, ronojel c'u ri cäto'taj canok chic'olo' che re chwek.”

²⁴ Xquic'ol c'u can che ri ucab k'ij ri xto'taj canok jacha' ri u bim ri Moises, man xchuwir ta c'ut mawi xnoj chque xjut.

²⁵ Xubij c'u ri Moises chque: “Ri i c'olom are chitija' camic, camic c'ut ri k'ij re uxlanem ri tastalic che u ya'ic u k'ij ri Ajawaxel; pa we k'ij ri' man c'o ta jaswa' quirik cho ri ulew pa ri juyub.

²⁶ Wakib k'ij cuya' quimol ri jaswa', pa ri uwuk k'ij man c'o ta jas c'olic are c'u k'ij wa' re uxlanem.”

²⁷ E c'o c'u jujun ri xebel bic pa ri uwuk k'ij che u molic jubik', man c'o ta c'u xequirika'.

²⁸ Xubij c'ut ri Ajawaxel che ri Moises: “Ri ix, ¿c'ä jampa' lo quitakej na ri man quinimaxic taj ri e nu takomal xukuje' ri e nu tijonic?

²⁹ Choc ba pa i jolom chi ri in, ri Ajawaxel, nu yo'm c'u jun k'ij chiwe re uxlanem, rumal ri' pa ri uwak k'ij quinya' i wa re quieb k'ij. Chijujunal chixcanaj cho tak iwachoch pa ri uwuk k'ij, man quixel ta c'u bic chupam.”

³⁰ Xebuxlan c'u ri winak pa ri uwuk k'ij.

³¹ Ri aj israelib xquicoj “jaswa'” che u bi' ri cäquimolo. Sak jacha' ri u wäch culanto, qui' jacha' ri wotz'otz' ri yo'm ta juyubal räx cab puwi'.

³² Xubij c'u ri Moises chque: “Are wa' ri takanic ri u yo'm ri Ajawaxel. ‘Chinojisaj jun pajbal re quieb tzima (2 litro) che jaswa', chic'olo' che u c'utic chquiwäch ri e u wi' tak i mam, rech caquetamaj u wäch ri wa ri xintzukbej iwe pa ri chaki'j uwo sak aretak xixinwesaj ulok pa Ejipt.’ ”

³³ Xubij c'u ri Moises che ri Aaron: “Chac'ama' jun t'uy, chaya' jun gomer (quieb litro) jaswa' chupam. Chaya' chuwäch ri Ajawaxel, rech cäc'ol can chque ri e u wi' tak i mam ri quepe na.”

³⁴ Ri Aaron je xubano jas ri takanic ri xuya' ri Ajawaxel che ri Moises, ri Aaron xuya' ri t'uy chuwäch ri caxa ri c'o wi ri c'ulwächinic rech cac'ol chupam.

³⁵ Ri aj israelib cawinak (40) junab xquitij ri jaswa' c'ä xebopan na pa ri u c'ulbatil ri ulew Canaan.

³⁶ Lajuj epa xak junam ruc' jun gomer.