Elem 15 - Quiché Bible

Ri u bix ri Moises

¹ Ri Moises xukuje' ri aj israelib xquibixoj we bix ri' che u ya'ic u k'ij ri Ajawaxel: Quinbixon che u ya'ic u k'ij ri Ajawaxel, ri xuban jun mayibalalaj ch'äcanic aretak xebujik'isaj ri quiej pa ri plo cachilam ri ajquiejab.

² “Ri nu bix quinya' che ri Ajawaxel, are nu chuk'ab xukuje' nu colotajic. Ri are' are nu Dios, ya'tal u k'ijilaxic wumal; are u Dios ri nu tat, ya'tal u ya'ic u k'ij wumal.

³ Ri Ajawaxel are jun nimalaj ch'ojinel, Ajawaxel ¡are u bi' wa'!

⁴ Ri Ajawaxel xebujik'isaj pa ri plo ri carwaj xukuje' ri rajch'ojab ri ajawinel; ri e rach k'atal tak tzij ri nimak qui k'ij xejik' chupam ri Quiäk Plo.

⁵ Xebik'taj rumal ri ja', e je ta ne abaj, xech'uk rumal ri cholaj plo.

⁶ Oh, Ajawaxel, ri icak'ab la ri sibalaj nim u chuk'ab, are xsachow qui wäch ri ka c'ulel.

⁷ Ruc' ri nimalaj chuk'ab la xebe xak'alej la ri xquiyac quib che c'ulelaxic la; xnicow ri oyowal la, xechajir c'ut jacha' ri pajo.

⁸ Co xxut'uj la ri plo, xupac c'u rib; ri qui wäch ri ja' xquimulij quib jacha' jun tapia; ri najalaj u xe' ri plo xcowiric.

⁹ Ri c'ulel xubij: ‘Quebenwokataj c'ä quebenrika' na, quinjach ri quintokij chque c'ä quinquicot na. Quinjusij ri ch'ich' re ch'o'j, are c'u ri nu k'ab cäsachow qui wäch.’

¹⁰ Xxut'uj c'u la ri plo, xebik'taj rumal; xekaj chuxe' ri u choil ri ja' jacha' räxmamaj ch'ich'.

¹¹ Oh, Ajawaxel, man c'o ta jun dios ri cacuintaj cujunamaj ta rib uc' la. Man c'o ta chi jun ri sibalaj ta tastalic na mawi nim u bantajic jacha' ta ri lal. Quebe ban la mayibalalaj tak jastak xukuje' xibibal. Ya'tal che la chi cak'ijilax la.

¹² Xc'ut ri cuinem la xebubik' ri ulew.

¹³ Ruc' ri lok'ok'ebal c'u'x la cätajin cäc'am la u be we tinimit ri' ri xcol la; ruc' ri cuinem la cac'am la bic pa ri tastalicalaj achoch la.

¹⁴ Ri nimak tak tinimit quebirbob na aretak cäquetamaj, ri aj pilisteyib cäquibak'atij na quib rumal k'oxom,

¹⁵ ri e qui nimal ri ajch'ojab aj Edom cäpe na canima', ri e c'amal tak qui be ri e aj Moab quebirbob na rumal xe'n ib, quetuktub na conojel ri aj cananeyib.

¹⁶ Oh, Ajawaxel, chquina' quib, chkaj xe'n ib paquiwi'. Checanaj canok jacha' ri abaj rumal ri u chuk'ab ri k'ab la, c'ä coc'ow na ri tinimit la.

¹⁷ Oh, Ajawaxel, chc'ama' la bic pa ri tastalicalaj juyub la, pa ri c'olbal ri xcha' la che ka jekelibal, pa ri achoch la ri co xtiq'uiba' la ruc' ri k'ab la.

¹⁸ ¡Ri Ajawaxel are' cätakan chbe k'ij sak!”

Ri u bix ri Mariy, ri cänab ri Moises ri Aaron

¹⁹ Aretak ri u carwaj ri ajawinel xukuje' ri rajquiejab xeboc pa ri plo, ri Ajawaxel xubano chi xpe ri ja' paquiwi'; are c'u ri aj israelib xeboc'ow pa ri plo jas pa chaki'j ulew.

²⁰ Are c'u ri Mariy, ri k'axal tzij, rana'b ri Aaron, xuc'am jun tzojtzoj, conojel ri ixokib xeteri bic chrij quexojowic quetzojtzotic,

²¹ ri are' cätajin cubixoj chque: “Chixbixon che u ya'ic u k'ij ri Ajawaxel, ri xuban jun mayibalalaj ch'äcanic aretak xebujik'isaj ri quiej pa ri plo cachilam ri ajquiejab.”

Ri c'aalaj ja'

²² Ri Moises xeresaj bic ri aj israelib chuchi' ri Quiäk Plo, xquitakej ri qui be xebe pa ri chaki'j uwo sak re Xur, oxib k'ij c'ut xebin pa ri chaki'j uwo sak man c'o ta ja' xquiriko.

²³ Aretak xebopan pa Mar, man xecuin taj xquitij ri ja' ri c'o chila' rumal ri u c'ayil. Rumal ri' xcoj Mar che u bi' we c'olbal ri'.

²⁴ Ri winak c'ax xech'aw chrij ri Moises, xquibij: “¿Jawije' ta quekama' wi ka ja'?”

²⁵ Ri Moises xuta' ri u to'banic ri Ajawaxel, ri are' xuc'ut jun che' chuwäch. Xuq'uiak c'u ri Moises ri che' pa ri ja', xel c'u ri u c'ayil. Chila' c'ut xec'ambejex wi rumal ri Ajawaxel, xuya' c'u jun pixab chque xukuje' jun suc'umabal ri qui c'aslemal.

²⁶ Xubij chque: “In ri' ri Ajawaxel ri i Dios, we kas quitatabej ri quinbij chiwe, we quiban ri suq'uil chnuwäch, quinimaj ri nu takomal, quebitz'akatisaj tak ri nu pixab, mawi jun chque ri yabil ri xintak paquiwi' ri aj ejiptib quintak ta piwi' ix, in c'ut ri Ajawaxel, ri quixincunaj.”

²⁷ Xebopan c'u pa Elim ri c'o wi cablajuj (12) bulbux ja', xukuje' oxc'al lajuj (70) tut, chila' c'u xekaj wi chuchi' ri ja'.