Elem 14 - Quiché Bible

Ri aj israelib quek'ax chupam ri Quiäk Plo

¹ Ri Ajawaxel xtzijon ruc' ri Moises, xubij che:

² “Chabij chque ri aj israelib chi chquiq'uexa' ri qui be ri quitakem rech quebekaj chuwäch ri Pi-hahirot, chuxo'l ri Migdol ruc' ri plo, chusuq'uil ri Baal-zepon. Chekaj chila', chuchi' ri plo.

³ Ri ajawinel cuchomaj na chi ri aj israelib man cäquich'ob taj jawije' ri quebe wi. E sachinak c'u pa ri chaki'j uwo sak.

⁴ Quinban na co che ri ranima' ri ajawinel quixuterenej c'ut, quinc'ut c'u ri nu cuinem puwi' ri are xukuje' paquiwi' conojel ri rajch'ojab. Cäquetamaj na ri aj ejiptib chi in ri' ri Ajawaxel.” Je c'u xquiban ri aj israelib.

⁵ Xya' c'u u bixic che ri ajawinel pa Ejipt chi xebanimaj bic ri aj israelib, chanim xuq'uex ri u chomanic ri ajawinel chquij ri aj israelib xukuje' je xquiban ri e rach k'atal tak tzij, xquibij: “¿Jasche xujch'äctajic chi xekatzokopij bic ri aj israelib rech man quechacun ta chic chke?”

⁶ Ri ajawinel xtakan che u suc'umaxic ri u carwaj re ch'o'j, xebumulij bic ri rajch'ojab.

⁷ Xebucha' wakib sient (600) utzalaj tak carwaj xukuje' conojel ri carwaj re Ejipt chquijujunal e u c'atal bic cumal jun qui nimal ajch'ojab.

⁸ Ri Ajawaxel xubano chi co xutac'aba' rib ri ajawinel quebuterenej c'ut ri aj israelib, pune' c'u e elinak ulok wa' ruc' nimalaj cuinem.

⁹ Xebel c'u ulok ri aj ejiptib cachil conojel ri cajch'ojab che qui ternexic ri aj israelib, e c'o pa tak carwaj, e quiejeninak chquij tak quiej, xebequirika' chuchi' ri plo, chuxcut ri Pi-hahirot chuwäch ri Baal-zepon jawije' ri e kajinak wi.

¹⁰ Aretak xquil ri aj israelib chi ri ajawinel xukuje' ri aj ejiptib xenakajin ulok chque, sibalaj xquixe'j quib, xquitz'onoj ri u to'banic ri Ajawaxel.

¹¹ Xquibij c'u che ri Moises: “¿La xa ta pu ma ta c'o cujmuk wi pa Ejipt chi xujawesaj ulok rech cujelcäm pa we chaki'j uwo sak ri'? ¿Jasche je xaban wa' chke? ¿Jasche xujawesaj ulok pa Ejipt?

¹² ¿La ma ta are wa' ri xkabij chawe pa Ejipt?: ‘Macoj a chuk'ab chke, chekapatanij na ri aj ejiptib. Are utz chke we ta are xekapatanij na ri aj ejiptib chuwäch ri xa cujelcäm pa we chaki'j uwo sak ri'.’ ”

¹³ Ri Moises xubij chque: “Mixe'j iwib. Muban quieb i c'u'x, chiwila' na jas ri cuban ri Ajawaxel camic che i to'ic, mawi c'u jumul quiwil chic qui wäch ri aj ejiptib ri quebiwil camic.

¹⁴ Mixoc il, ri Ajawaxel are cäch'ojin na che i q'uexwäch.”

¹⁵ Ri Ajawaxel xubij che ri Moises: “¿Jasche catz'onoj ri nu to'banic? Chabij chque ri aj israelib chi cäquitakej ri qui be.

¹⁶ Ri at chayaca' ri a ch'ämiy chicaj, chayuku' ri a k'ab chabana' quieb che ri plo rech queboc'ow ri aj israelib chupam pa chaki'jal.

¹⁷ In quinbana' na chi ri aj ejiptib co caquitac'aba' na quib rech quixquiterenej na; quinc'ut c'u ri nu cuinem puwi' ri ajawinel xukuje' paquiwi' conojel ri rajch'ojab, paquiwi' ri u carwaj xukuje' paquiwi' ri rajquiejab.

¹⁸ Aretak nu c'utum chic ri nu cuinem puwi' ri ajawinel, paquiwi' ri u carwaj xukuje' paquiwi' ri cajquiejab, ri aj ejiptib cäquetamaj na chi in ri' ri Ajawaxel.”

¹⁹ Pa ri jok'otaj ri' ri aj cajalaj u tako'n ri Dios xukuje' ri jutac'aj sutz' ri nabejinak chquiwäch ri aj israelib, xquiq'uex ri qui c'olbal xek'ax chquij.

²⁰ Xcanaj c'ut ri jutac'aj sutz' chquixo'l ri aj ejiptib cuc' ri aj israelib; xux c'u k'eku'm ri sutz' chque ri aj ejiptib, are c'u ri chque ri aj israelib are chäj ri cac'utuw ri qui be. Rumal ri' pa ronojel ri jun ak'ab ri' mawi jubik' xenakajin ri aj ejiptib chque ri aj israelib.

²¹ Ri Moises xuyuk ri u k'ab puwi' ri plo, xuban c'u ri Ajawaxel chi xupac rib ri plo rumal jun nimalaj quiakik' ri xpe pa elebal k'ij ronojel ri jun ak'ab ri'. Xuban c'u quieb che ri plo xux chaki'j ulew.

²² Ri aj israelib xeboc'ow pa chaki'j ulew chupam ri plo, chquixo'l quieb tapia re ja', jun pa qui wiquiak'ab, jun pa qui mox k'ab.

²³ Conojel ri rajquiejab ri ajawinel xukuje' ri e u carwaj xeteri bic chquij ri aj israelib c'ä pa u niq'uiajil ri plo;

²⁴ aretak c'u xpe u sakaric, ri Ajawaxel xebuca'yej ri ajch'ojab aj ejiptib pa ri jutac'aj k'ak' xukuje' pa ri jutac'aj sutz', xebuyojij c'ut;

²⁵ xebujok'opij ri e qui carwaj, man quebin ta chic. Ri aj ejiptib xquibij: “Chujanimaj chquiwäch ri aj israelib, are cätajin cäch'ojin ri Ajawaxel che qui to'ic xukuje' che u banic c'ax chke.”

²⁶ Ri Ajawaxel xubij che ri Moises: “Chayuku' ri a k'ab puwi' ri plo, rech cätzelej ri ja' paquiwi' ri aj ejiptib, paquiwi' ri qui carwaj xukuje' ri cajquiejab.”

²⁷ Ri Moises xuyuk ri u k'ab puwi' ri plo, aretak xsakaric ri ja' xtzelej chic pa ri nabe u c'olbal. Aretak c'ut ri aj ejiptib xcaj xebanimajic, xek'atitaj rumal ri ja', xejik'isax c'u rumal ri Ajawaxel chupam ri plo.

²⁸ Aretak xurik rib ri plo, xebumuk can ri carwaj, ri ajquiejab xukuje' conojel ri ajch'ojab ri xeboc chupam ri plo che cokataxic ri aj israelib. Mawi jun rajch'o'j ri ajawinel xc'asi' ta canok.

²⁹ Are c'u ri aj israelib xeboc'ow pa chaki'j ulew pa ri plo, chquixo'l quieb tapia re ja', jun pa qui wiquiak'ab jun pa qui mox k'ab.

³⁰ Are k'ij wa' aretak ri Ajawaxel xuq'uis qui to'ic ri aj israelib pa qui k'ab ri aj ejiptib, ri aj israelib xequil ri aj ejiptib ri e cäminak chic, quelew chuchi' ri plo.

³¹ Aretak xquil ri aj israelib ri nimalaj u cuinem ri Ajawaxel ri xukasaj paquiwi' ri aj ejiptib, xquixe'j quib chuwäch, xquicu'ba' qui c'u'x chrij xukuje' chrij ri Moises.