Elem 13 - Quiché Bible

Ri qui jächic ri nabeal tak alabom che ri Dios

¹ Ri Ajawaxel xtzijon ruc' ri Moises, xubij c'u che:

² “Chebijacha' conojel ri nabeal tak alabom chwe, rumal rech chi conojel ri alabom ri qui nabeal ri aj israelib e wech xukuje' conojel ri nabe tak cal ri cawaj.”

³ Ri Moises xubij chque ri aj israelib: “Mäsach we k'ij ri' pa i jolom, aretak ruc' nimalaj cuinem xixresaj ulok ri Ajawaxel pa Ejipt ri xixc'oji' wi na jacha' pataninelab lok'om. Mitij caxlanwa ri yo'm ch'am ruc'.

⁴ Ri ix quixel bic pa we k'ij ri' pa ri ic' re Abib,

⁵ chupam c'u we ic' ri' rajawaxic coc'owisax ri nimak'ij re ri Oc'owem, aretak ix u cojom chic ri Ajawaxel pa ri ulew ri cabelel wi ri leche xukuje' juyubal räx cab jacha' ri ja', are wa' ri culew ri aj cananeyib, ri aj hititib, ri aj amoreyib, ri aj hebeyib, ri aj jebuseyib, ri xuchi'j chque ri e i mam chi cuya' chiwe.

⁶ Wukub k'ij quitij caxlanwa ri man caya' ta ch'am ruc', pa ri uwuk k'ij quiban na nimak'ij che u ya'ic u k'ij ri Ajawaxel.

⁷ Pa ronojel ri wukub k'ij quetij na caxlanwa ri man caya' ta ch'am ruc', mawi märiktaj ch'am pa jun tinimit aj Israel o caxlanwa ri yo'm ta ch'am ruc'.

⁸ Pa we k'ij ri' quibij chque ri e iwalc'ual: ‘Quekaban we jastak ri' che u nataxic ri xuban ri Ajawaxel che kesaxic ulok pa Ejipt.

⁹ Je ta ne ri c'o ta jun iwetal che ri i k'ab, o che ri i palaj, rech amak'el cänataj ri u pixab ri Ajawaxel chiwe, are c'u xixesan ulok pa Ejipt ruc' ri nimalaj u cuinem.

¹⁰ Rumal ri' rajawaxic coc'owisax we nimak'ij ri' chujunab pa ri k'ijol ri ch'icom.’

¹¹ Aretak c'u ix u cojom chic ri Ajawaxel pa ri culew ri aj cananeyib, aretak u jachom chic ri culew pa i k'ab, jacha' ri xuchi'j chiwe xukuje' chque ri e i mam,

¹² rajawaxic quebijach che ri Ajawaxel conojel ri e i c'ojol ri e nabeal xukuje' conojel ri nabe tak ama'ib ri quecalaj ri e i wawaj e rech c'u ri Ajawaxel.

¹³ Are c'u ri quiban che ri nabe ral ri ati't bur, quiya' jun alaj ama' chij o jun alaj ama' q'uisic' che u q'uexwäch ri alaj bur; we c'u man quiya' ri alaj ama' chij, qui k'ip na ri u kul ri alaj bur. Xukuje' rajawaxic quiya' jun sipanic jacha' che u toric ri nabeal cojolaxel.

¹⁴ We c'u chwek cäbij cäc'ot na i chi' cumal ri e iwalc'ual: ‘¿Jas quel cubij wa'?’ Quibij na chque: ‘Ri Ajawaxel xujresaj ulok ruc' nimalaj cuinem pa Ejipt ri xujc'oji' wi na jacha' lok'om pataninelab.

¹⁵ Aretak ri ajawinel co xutac'aba' rib man xraj taj xujutzokopij ulok, ri Ajawaxel xebucämisaj conojel ri nabeal tak qui c'ojol ri aj ejiptib chquijujunal xukuje' ri nabe tak cal ri cawaj: rumal ri' quekatas che ri Ajawaxel ri nabe ama'ib tak awaj ri quebalaxic xukuje' cäkaya' jun chij che qui q'uexwäch ri nabeal tak ka c'ojol.

¹⁶ Ruc' ri qui banic we jastak ri' je ta ne ri cäcanaj jun etal che ri i k'ab, o che ri i palaj, we nak'atisabal ri' cunataj chiwe chi ri Ajawaxel xujresaj ulok ruc' nimalaj cuinem pa Ejipt.’ ”

Ri jutac'aj sutz' xukuje' ri jutac'aj k'ak'

¹⁷ Aretak c'u ri ajawinel xutzokopij ulok ri tinimit aj israelib, ri Dios man xuc'am ta bic pa ri be ri coc'ow pa ri culew ri aj pilisteyib, ri xa nakaj, xuchomaj c'u ri Dios chi ri aj israelib man cäcaj taj cäquiban ri ch'o'j pune' rajawaxic, are ta c'u utz na ri' chque chi quetzelej pa Ejipt.

¹⁸ Rumal ri' xuban chque chi cäquicotij na ri qui be pa ri chaki'j uwo sak ri cäbe chusuq'uil ri Quiäk Plo. Aretak xebel ulok ri aj israelib pa Ejipt quek'atatic e jacha' ajch'ojab.

¹⁹ Ri Moises xebuc'am bic ri u bakil ri Jose, u banom c'u can ri Jose chi ri e ralc'ual ri Israel caquich'ij chi je caquibano. U bim c'u can chque: “Kastzij, ri Dios cäpe na che i to'ic; aretak c'u cäc'ulmataj wa', ri ix quiwesaj bic ri nu bakil waral.”

²⁰ Ri aj israelib xebel ulok pa Sucot xebekaj pa Etam, ri cächapletaj wi ri chaki'j uwo sak.

²¹ Ri Ajawaxel xnabej chquiwäch pa k'ij pa jutac'aj sutz' che u c'amic qui be, chak'ab xnabej chquiwäch pa jutac'aj k'ak' che u c'utic ri qui be. Rumal c'u ri' xecuinic xebin chak'ab, xukuje' pa k'ij.

²² Mawi jubik' xutas ta rib ri jutac'aj sutz' chquiwäch pa k'ij, xukuje' mawi jubik' xutas ta rib ri jutac'aj k'ak' chquiwäch chak'ab.