Elem 1 - Quiché Bible

Ri c'ax ri xban chque ri aj israelib pa Ejipt

¹ E are wa' ri qui bi' ri aj israelib ri xebopan junam ruc' ri Jacob pa Ejipt, chquijujunal e cachilam bic ri cachalaxic:

² Ri Ruben, ri Simeon, ri Levi, ri Juda,

³ ri Isacar, ri Zabulon, ri Benjamin,

⁴ ri Dan, ri Neptali, ri Gad, ri Aser.

⁵ Ri e ri' tak u mam ri Jacob e oxc'al lajuj (70) chi conojel. Are' c'u ri Jose c'o chic pa Ejipt.

⁶ Xurika' jun k'ij aretak ri Jose xukuje' ri e rachalal, conojel xecämic;

⁷ are c'u ri aj israelib xepok'ic, sibalaj xeq'uiyiric xec'oji' q'ui calc'ual xc'oji' c'u sibalaj qui chuk'ab. Xnoj ri ulew cumal.

⁸ Q'ui junab e oc'owinak chic xoc chi c'u jun c'ac' ajawinel pa Ejipt ri man xretamaj ta u wäch ri Jose, ri xubij che ri u tinimit:

⁹ “Chiwilampe', ri qui tinimit aj israelib sibalaj e q'uiyirinak chic, e are chi c'o na qui chuk'ab chkawäch uj;

¹⁰ kachomaj ba' jas ri cäkaban chque rech man queq'uiyir taj, rumal rech chi, we ne cäpe ch'o'j, caquicoj c'u quib cuc' ri e ka c'ulel rech quech'ojin kuc' quebel c'u bic chupam we ulew ri'.”

¹¹ Rumal ri' ri aj ejiptib xequicoj takanelab paquiwi' rech quequicoj ri aj israelib che qui banic c'axalaj tak chac. Xetak che qui yaquic ri tinimit Piton xukuje' ri Ramses ri xebucoj ri rajawinel re ri Ejipt, ri paraon, che c'olbal ri cätijic.

¹² Pune' c'u sibalaj cäban c'ax chque ri aj israelib xa sibalaj quepok'ic, jeri' chi ri aj ejiptib sibalaj cäquixe'j quib chquiwäch ri aj israelib.

¹³ Ri aj ejiptib sibalaj xquicoj c'anal paquiwi' ri aj israelib pa ri qui chac.

¹⁴ Sibalaj c'u xban c'ax che ri qui c'aslemal cuc' c'axalaj tak chac. Xetak che u banic xok'ol che u banic xan, xukuje' che qui banic ronojel u wäch chac pa ri juyub. Pa conojel c'u ri chac ri cäquibano cäcoj c'anal paquiwi',

¹⁵ xch'aw c'u ne ri ajawinel re Ejipt ruc' ri Sipr xukuje' ri Pu ri iyomab ri queilow ri ixokib aj hebreyib, xubij c'u chque:

¹⁶ “Aretak quebiwilij ri ixokib aj hebreyib, chinic'oj ri ac'al we ala o ali; we ali chic'asba'; we ala chicämisaj.”

¹⁷ Are c'u ri iyomab xquixe'j quib chuwäch ri Dios, man xquinimaj taj ri u takanic ri ajawinel re Ejipt, xequic'asba' c'u ri alabom.

¹⁸ Ri ajawinel re Ejipt xtakan che qui siq'uixic, xubij c'u chque: “¿Jasche e i c'asbam ri alabom?”

¹⁹ Ri iyomab xquibij che ri ajawinel: “Rumal rech chi ri ixokib aj hebreyib man e junam ta cuc' ri ixokib aj ejiptib. Ri aj hebreyib sibalaj c'o qui chuk'ab, e calam chi apanok ri cal aretak cujopan uj che quilixic.”

²⁰ Cätajin c'u queq'uiyir ri aj israelib xukuje' sibalaj xc'oji' qui chuk'ab.

²¹ Rumal c'u rech chi ri iyomab xquixe'j quib chuwäch ri Dios, ri Dios xutok'obisaj qui wäch xebuq'uiyirisaj ri e xiquin tak qui mam.

²² Ri ajawinel pa rech wi xuya' takanic chque conojel ri aj ejiptib, xubij chque: “Chebiq'uiaka' bic ri calc'ual ri aj israelib pa ri nima' ri quil qui wäch ri e alabom, are c'u ri alitomab chebic'asba'.”