Efesios 6 - Quiché Bible

Ri alc'ualaxelab xukuje' ri tataxelab

¹ Alc'ualaxelab, rumal rech chi ix cojoninak che ri Ajawaxel, chebinimaj ri i tat i nan. Are c'u wa' ri suc'.

² Are wa' nabe takomal ri rachilam jun chi'nic: “Nim chawila' wi ri a tat xukuje' ri a nan,

³ rech utz catelic, naj c'ut catc'asi' na cho ri uwächulew.”

⁴ Ri ix c'ut tataxelab, miyac coyowal ri e iwalc'ual, xane' chebiq'uiyisaj ruc' pixbenic, chebitijoj che ri u tzij ri Ajawaxel.

Ri lok'om pataninelab xukuje' ri ajawib

⁵ Ri ix lok'om pataninelab, chebinimaj ri e iwajaw waral cho ri uwächulew. Nim chebiwila' wi, china' iwib chquiwäch, chebinimaj ruc' ronojel iwanima', je ta ne are ri Crist quipatanij.

⁶ Chixpataninok, man xuwi ta aretak cätajin quixcalawächij rech utz quixil wi. Xane' jacha' chixpataninok chi ix u pataninelab ri Crist, ruc' ronojel iwanima' chibana' jas ri cäraj ri Dios.

⁷ Chixpataninok ruc' ronojel iwanima', je ta ne are quipatanij ri Ajawaxel, man are ta ri winak.

⁸ Iweta'm c'ut we ix lok'om pataninelab, o man ix lok'om pataninelab taj, ri utzil ri quiban chi jujunal qui c'amowaj na che ri Ajawaxel Dios.

⁹ Xukuje' ri ix ajawib, xa' junam chibana' chque ri e i pataninelab. Chiya' can ri u cojic qui xibriquil. Iweta'm chi ri ix cuc' ri e are', xa' junam ix c'o pa u k'ab ri Iwajaw ri c'o chicaj. Ri are' man are ta cäril qui wäch ri winak we nim o man nim ta qui banic.

Ri e aj uxlabalalaj tak u ch'ojibal ri ajcrist

¹⁰ Are c'u ri camic, wachalal tak, chicowirisaj iwib pa ri Ajawaxel Jesus, xukuje' pa ri u cuinem ri u chuk'ab.

¹¹ Chito' iwib ruc' conojel ri ch'ojibal ri cuya' ri Dios chiwe. Jeri' quixcuinic co quixtaq'ui' chuwäch ri itzel, ri cäraj quixusubu ruc' ri itzel tak u no'j.

¹² Man cujch'ojin ta cuc' winak, xane' cuc' itzel tak uxlabal ri e c'o pa ri caj, ri c'o qui takanic xukuje' qui cuinem puwi' we uwächulew ri' re ri k'eku'm, xukuje' quetakan puwi'.

¹³ Rumal c'u ri' chebic'ama' conojel ri chacubal re ch'o'j ri cuya' ri Dios, rech quixcuin che u to'ic iwib pa ri itzel k'ij. Aretak c'ut coc'ow ronojel, co quixtaq'ui' canok.

¹⁴ Co ba' chixtac'alok. Chicojo' ri kastzij, je jas jun pas ximibal re ri u xe' i pam. Chicojo' ri suq'uil, je jas jun ajch'o'j cucoj ch'ich' cho uwo u c'u'x che u to'ic rib.

¹⁵ Chisuc'umaj iwib che u tzijoxic ri jamaril, jas jun ajch'o'j cucoj ri u xajäb.

¹⁶ Paquiwi' c'u conojel, ri i cojonic are chicojo' che i quetequic ch'ich' ri quebelpoc'naj wi conojel tak ri e u ch'ab ri itzel ri quenicowic.

¹⁷ Chicojo' ri colobal iwib je jas jun ajch'o'j cucoj to'bal u jolom. Chic'ama' ri u ch'ich' re ch'o'j ri Uxlabaxel, are wa' ri u tzij ri Dios.

¹⁸ Mitanaba' ri u banic ch'awem ruc' Dios: chixbochi'nok xukuje' chixtz'onom che ri Dios amak'el, pa ri Uxlabaxel. Chixc'asc'atok, mixtuktubic, chibana' c'u ch'awem puwi' ronojel ri u tinimit ri Dios.

¹⁹ Xukuje' chibana' ch'awem panuwi' in, rech aretak quinch'awic, ri Dios cuya' ri tzij chwe, rech man quinxe'j ta wib aretak quintzijoj ri tzij re colobal ib ri man etamatal ta can nabe.

²⁰ Ri Dios in u takom che u tzijoxic we utzalaj tzij ri'. Rumal c'u wa' in c'o pa che'. Chibana' ch'awem panuwi' rech man quinxe'j ta wib, quintzijoj jas ri takal u banic wumal.

Ri Pawl cuya' rutzil wächaj

²¹ Ri Tiquico cubij na ronojel chiwe jas ri nu banom xukuje' jas ri cätajin quinbano rech quiwetamaj. Ri Tiquico are' lok'alaj kachalal xukuje' jicalaj pataninel pa ri u chac ri Ajawaxel.

²² Rumal c'u ri' xintak bic iwuc' rech quiwetamaj jas ri ka banom, rech cucu'bisaj na i c'u'x.

²³ Are' ri Dios ri Tataxel, xukuje' ri Ajawaxel Jesucrist, chuya' chque ri achalaxelab jamaril xukuje' lok'ok'ebal c'uxaj, rachilam cojonic.

²⁴ Tok'ob chque conojel ri quelok'ok'en ri Kajaw Jesucrist, ruc' jun lok'ok'ebal c'u'x ri man cajalc'at taj.