Efesios 5 - Quiché Bible

Ri qui c'aslemal ri e ralc'ual ri Dios

¹ Chibana' ba' iwe ri cuban ri Dios, jacha' chi ix alc'ualaxelab ri ix lok'ok'em;

² chiwuc'aj ri c'aslemal aj lok'ok'ebal c'uxaj, jas ri Crist xujulok'ok'ej. Xuya' ri u c'aslemal rumal kech, jacha' sipanic, tabal tok'ob cho ri Dios, are jun c'oc'alaj uxlab ri cäkaj chuwäch.

³ Chibana' jas ri takal chiwe ix tastalic tak winak che u patanixic ri Dios. Miban c'ut macunic cuc' ixokib achijab, miban tz'ilalaj tak jastak, mirayij q'uialaj jastak. Tz'ilol c'u wa' che ri tastalicalaj u tinimit ri Dios.

⁴ Mibij q'uixbalalaj tak tzij, mawi conalaj tak tzij. Miwetz'bej qui wäch niq'uiaj winak chic. Are jastak wa' man takal ta chiwe. Xane' quixmaltioxin che ri Dios.

⁵ Iweta'm chic chi conojel ri quemacun cuc' ixokib achijab, o cäquiban tz'ilalaj tak jastak, o cäquirayij q'uialaj tak jastak (xa junam wa' ruc' ri qui k'ijilaxic tak diosib), conojel wa' man c'o ta quechbal pa ri rajawibal ri Crist ri xukuje' rech ri Dios.

⁶ C'o jun mixsubuw ruc' tak tzij ri man c'o ta qui patan. Cumal c'u we jastak ri' cäpe ri royowal ri Dios paquiwi' ri man queniman taj.

⁷ Miban ba' iwe cuc' jas ri cäquiban ri e are'.

⁸ Ri i c'aslemal ojer c'o pa ri k'eku'm. Are c'u ri camic c'o chic pa ri sakil rumal rech chi ix jun chic ruc' ri Ajawaxel. Chibana' ba' iwech ri caquiban ri e aj sakilal.

⁹ Ri u wächinic c'u ri sakilal are ronojel utzil, suq'uil xukuje' kastzij.

¹⁰ Chiwetamaj ba' jachique jastak ri quekaj chuwäch ri Ajawaxel.

¹¹ Miban iwe ri jastak ri man c'o ta quechbex chque; ri cäquiban ri winak ri e c'o pa ri k'eku'm, xane' chebiya' chi sak.

¹² Q'uixbal c'ut qui tzijoxic ri jastak ri cäquiban ri e are' chi c'uyal.

¹³ Conojel ri jastak quek'alajisax rumal ri chäj.

¹⁴ Ri sakil cuk'alajisaj ronojel. Rumal ri' cäbixic: “Chatc'astajok, at ri catwaric, chatwalij chquixo'l ri cäminakib. Ri Crist catuya' na pa sak.”

¹⁵ Kas chiwila' na jas ri quibano. Miban iwe jas ri man c'o ta qui no'j, xane' chibana' iwe jas ri c'o qui no'j.

¹⁶ Chiwechbej tak ri k'ij che u banic ri utz, rumal rech chi itzel tak k'ij uj c'olic.

¹⁷ Mäsach ri i chomanic, xane' chiwetamaj jas ri u rayibal ri Ajawaxel.

¹⁸ Mixk'abaric. Chupam c'u wa' c'o c'axc'olil. Xane' chnojisax ri iwanima' che ri Ruxlabal ri Dios.

¹⁹ Chitzijobela' iwib cuc' tak salm, bix, xukuje' bixonic aj uxlabal. Chixbixonok, chinimarisaj u k'ij ri Ajawaxel ruc' ronojel iwanima'.

²⁰ Amak'el chimaltioxij ronojel che ri Dios ri Tataxel pa ri u bi' ri Kajaw Jesucrist.

Ri qui c'aslemal ri cojonelab pa tak cachoch

²¹ Chiyala' iwib pa takic chbil tak iwib, rumal rech chi nim quiwil wi ri Crist.

²² Ri ix ixokib, chiyala' iwib pa takic chque ri iwachajil, jas ri i nimanic che ri Ajawaxel.

²³ Rumal rech chi ri achi are' u jolom ri rixokil, jacha' ri Crist are' u jolom ri comon cojonelab. Xukuje' ri Crist are Colol re ri comon cojonelab, are wa' ri u cuerp.

²⁴ Rajawaxic chi ri ixokib cäquiya' quib pa takic chque ri cachajil pa ronojel, jas ri comon cojonelab cuya' rib pa takic che ri Crist.

²⁵ Achijab, chebilok'ok'ej ri e iwixokil, jas ri Crist xulok'ok'ej ri comon cojonelab. Xuya' c'u ri u c'aslemal rumal rech.

²⁶ Jeri' xuban che rech cux jun tastalic comon cojonelab. Je ta ne xuch'aj ruc' ja' aretak xujosk'ij rumal ri tzij,

²⁷ rech cutac'aba' ri comon cojonelab chuwäch are', jun comon cojonelab ri nim u k'ij, man tz'ajtajinak taj, mawi c'o bach'uy che, mawi jun jasach jewa' xane' jun tastalic comon cojonelab, utz ronojel.

²⁸ Jeri' xukuje' ri achi rajawaxic culok'ok'ej ri rixokil, jas ri u lok'ok'exic ri u cuerp ri are' chbil rib. Apachin ri culok'ok'ej ri rixokil, culok'ok'ej rib ri'.

²⁹ Man c'o ta jun cäretzelaj u wäch ri u cuerp chbil rib, xane' cutzuku, cuchajij. Je xukuje' cuban ri Crist che ri comon cojonelab.

³⁰ Uj c'ut u tz'akatil ri u cuerp. Ri uj rech ri cuerp ri'.

³¹ Rumal ri', ri achi quebuya' can ri u tat u nan, cätuni' na ruc' ri rixokil. Ri e quieb quebux na xa' jun.

³² Are jun jasach wa' ri man etamatal ta can nabe, ri nim u banic. Ri in c'ut quinbij c'u wa' chrij ri Crist xukuje' ri comon cojonelab.

³³ Ri ix c'ut chijujunal chi lok'ok'ej ri iwixokil jas ri u lok'ok'exic iwib. Ri ixok xukuje' rajawaxic nim cäril wi ri rachajil.