Efesios 2 - Quiché Bible

Uj colotajinak rumal ri lok'ok'ebal u c'u'x ri Dios

¹ Ri ix nabe ix cäminak pa tak ri iwetzelal xukuje' pa tak ri i mac.

² Xiban ri mac jas ri u beya'l we uwächulew ri', xinimaj ri nim u banic ri c'o u takanic pa ri quiakik', ri uxlabal ri cätakan paquiwi' ri man queniman ta che ri Dios.

³ Jas ri e are', ojer konojel xkaban can ri ka rayinic aj winak re mac, xkaban ri u rayibal ri ka ti'jal, jas ri xkachomaj. Rumal c'u ri' takal chke we ta xpe ri royowal ri Dios pakawi', je jas ri niq'uiaj chic.

⁴ Are c'u ri Dios sibalaj xel u c'u'x chke, xujulok'ok'ej ruc' ri nimalaj lok'ok'ebal u c'u'x.

⁵ Jeri' chi, aretak uj cäminak can cumal ri ka mac nabe, xuya' ka c'aslemal ruc' ri Crist. Rumal c'u ri u tok'ob ri Dios ix colotajinak chic.

⁶ Ri Dios xujuc'astajisaj junam ruc' ri Crist Jesus, xukuje' xuban chke chi xujut'uyuba' ruc' pa ri caj.

⁷ Jewa' xubano che u c'utic pa tak ri k'ij junab ri quepe na, ri nimalaj u tok'ob chke xukuje' ri rutzil chke rumal ri Crist Jesus.

⁸ Rumal ri u tok'ob ri Dios ix colotajinak chic, rumal ri i cojonic. Man ix taj xixbanowic pa iwe wi, xane' xak sipam chiwe rumal ri Dios.

⁹ Man cumal ta jastak ri quibano, rech jeri' man c'o ta jun cuya' cunimarisaj rib.

¹⁰ Ri Dios are' xujbanowic, xuban c'ac' tak winak chke rumal ri Crist Jesus, rech cäkaban utzalaj tak chac, ri xebusuc'umaj ulok ri Dios ojer, rech je cäkabano.

Ri jamaril ri ka rikom rumal ri Crist

¹¹ Rumal c'u ri', chnataj chiwe ri man ix aj judeyib taj: cäquibij c'u ri aj judeyib chiwe chi man ix kopim taj, cäquibij c'ut ri e are' chi e kopim. E kopim c'ut ri e u wi' ri u tz'umal ri e achijab wi cuc' k'abaj che quetal.

¹² Chnataj chiwe chi ojer canok man c'o ta ri Crist iwuc', man c'o ta iwe chque ri winak aj Israel, man c'o ta iwe che ri e u c'ulwächinic ri Dios mawi che ri e u chi'm. Xak ix c'o cho ri uwächulew, man c'o ta can ri Dios pa iwanima' mawi c'o cu'bisabal i c'u'x.

¹³ Camic c'ut ix jun chi ruc' ri Crist Jesus. Nabe canok sibalaj naj ix c'o wi che ri Dios, xixkebisax c'u ulok rumal ri u quiq'uel ri Crist.

¹⁴ Ri Crist are ka jamaril. Ri quieb tinimit xuban jun chque, xuwulij ri tapia ri c'o chquixo'l, ri e tasowinak.

¹⁵ Pa ri u cuerp xusach u wäch ri pixab xukuje' tak ri e u takomal xukuje' tak ri e colomibal. Ri u chomanic are ri qui winakirisaxic kas pa ri are' chque ri quieb jun c'ac' winak, je c'u wa' ri u banic ri jamaril rumal.

¹⁶ Jeri' ri Crist xutanaba' ri ch'o'j ri c'o chquixo'l ri quieb tinimit rumal ri u cämical cho ri ripibal, xuya' jamaril chquixo'l ruc' ri Dios. Xuban chque ri quieb chi xa' e jun cuerp chic.

¹⁷ Ri Crist xpe c'ut, xutzijoj jamaril chiwe ri ix c'o naj, xukuje' chque ri e c'o nakaj.

¹⁸ Rumal c'u ri Crist, ri uj quieb ka wäch cuya' cujoc ruc' ri Tataxel rumal ri xa' jun Uxlabaxel.

¹⁹ Rumal c'u ri' man ix tastal ta chic che ri u tinimit ri Dios, mawi ix ta chi jalan winak; ri xak ta ix oc'owel ix junam chic cuc' ri winak ri e rech ri Dios, ix jun cuc' ri e aj uwo rachoch ri Dios.

²⁰ Ix je ta ne jun ja, ri yacom puwi' ri tac'alibal ri e cojom wi ri takomxenlab xukuje' ri k'axal tak tzij. Ri Jesucrist are' ri nabe abaj re ri u ch'u'c ja.

²¹ Che c'u wa' ri Crist u nuc'um wi rib ronojel ri ja caq'uiy c'ut rech cux tastalicalaj rachoch ri Ajawaxel Dios.

²² Jeri' xukuje' ri ix junam cuc' ri niq'uiaj chic, ix jun ruc' ri Crist rech iwonojel quixux xa' jun ja jawije' cäjeki' wi ri Dios pa ri Uxlabaxel.