Colosenses 3 - Quiché Bible

Chebitzucuj ba ri jastak aj chicaj

¹ We ix c'astajinak chi ruc' ri Crist, chebitzucuj ba' ri jastak aj chicaj, jawije' ri t'uyul wi ri Crist pa ri u wiquiak'ab ri Dios.

² Chebichomaj ba' ri jastak ri e aj chicaj, man are ta ri e re ri uwächulew.

³ Ix cäminak chi c'ut, are' c'u ri i c'aslemal c'u'tal ruc' ri Crist pa ri Dios.

⁴ Ri Crist are' ri i c'aslemal. Aretak cäpetic, c'äte ri' ri ix xukuje' quixc'oji' na ruc' pa juluwem.

Ri ojer c'aslemal xukuje' ri c'ac' c'aslemal

⁵ Chibana' ba' chi cäcäm ronojel ri quech ri e u tz'akatil ri e itzel tak e i rayinic ri e rech ri uwächulew: chi c'o jun mamacun cuc' ixokib achijab, mawi muban tz'ilalaj tak jastak, mawi mac'oji' u rayinic che u macurisaxic ri u cuerp, mawi mec'oji' itzel tak u rayinic, mawi mebuya' c'olbal chi ri ranima' queburayij tak k'inomal (are c'u wa' ri qui k'ijilaxic ri e diosib).

⁶ Cumal c'u we jastak ri' cäpe ri royowal ri Dios paquiwi' ri winak ri man queniman taj.

⁷ Ri ix xiban ronojel wa' nabe canok pa ri ojer i c'aslemal.

⁸ Camic c'ut, miban chi conojel we jastak ri': Mäpe iwoyowal, miban i c'anal, miban etzelal, miwetz'bej qui wäch niq'uiaj winak chic, mixyok'onic, mibij q'uixbalalaj tak tzij,

⁹ mibila' ri man kastzij taj chixo'l. Iwesam chi c'u bic ri ojer i c'aslemal xukuje' ri jastak ri xiban nabe canok.

¹⁰ Iwatz'iakim chi iwib ruc' ri c'ac' i c'aslemal. Cätajin c'u cuq'uex rib rech cajunamataj ruc' ri u wächbal ri Dios ri xixwinakirisanic, rech kas quiwetamaj u wäch.

¹¹ Man c'o ta chi cubij we aj judey o we man aj judey taj, we kopim ri u wi' ri u tz'umal ri ix achijab wi o man kopim taj, we naj cäpe wi, we man c'o ta retamanic, we lok'om pataninel o tzokopitalic; ri c'o cubij chi ri Crist are' ronojel pa conojel.

¹² Ri Dios quixulok'ok'ej, ix u cha'om, u banom tastalic tak winak chiwe. Chc'ol tok'obisan wächaj pa ri iwanima', chel i c'u'x chque niq'uiaj winak chic, minimarisaj iwib chquiwäch niq'uiaj chic, mibanala' c'ax chbil iwib, chc'ol i coch'onic,

¹³ chisachala' i mac chbil tak iwib we c'o jun c'o royowal chrij ri jun chic. Jas ri Ajawaxel xusach ri i mac ix, je chibana' ix xukuje'.

¹⁴ Puwi' c'u ronojel wa', chc'ol lok'ok'ebal i c'u'x. Are c'u wa' quixuc'an pa jun tz'akatalaj chomanic.

¹⁵ Chiya' ba' che ri u jamaril ri Crist chajawin pa tak ri iwanima', xukuje' xixusiq'uij c'ut rech quiban xa' jun cuerp; xukuje' chiya' ta c'u xmaltioxinic.

¹⁶ Are ta ri u tzij ri Crist cäjeki' iwuc', kas cunojisaj ri iwanima'. Chitijola' iwib, chipixbela' iwib ruc' utzalaj tak no'j; chibixoj salm che ri Dios, bix, xukuje' bixonic aj uxlabal ruc' maltioxic che ri Dios pa ri iwanima'.

¹⁷ Apachique ri quibano o ri quibij, chibana' ronojel pa ri u bi' ri Ajawaxel Jesus, ruc' maltioxinic che ri Dios rumal ri are'.

Jas rajawaxic cuban jun cojonel chque ri e c'o ruc'

¹⁸ Ix ixokib ri ix c'ulanic, chixniman chque ri iwachajil. Are wa' ri rajawaxic quibano pa ri i cojonic che ri Ajawaxel.

¹⁹ Ix achijab ri ix c'ulanic, chebilok'ok'ej ri iwixokil, macoji' c'anil xukuje' c'ayil pa iwanima' chquij ri iwixokilal.

²⁰ Alc'ualaxelab, chebinimaj ri i tat i nan pa ronojel. Are c'u wa' ri cäkaj chuwäch ri Ajawaxel.

²¹ Tataxelab mebitzur ri e iwalc'ual rech man caqueblaj ta qui c'u'x.

²² Ix lok'om tak pataninelab, chebinimaj ri iwajaw waral cho ri uwächulew pa ronojel. Chebipatanij, man xuwi ta c'ut aretak quixquilo rech quixkaj chquiwäch, xane' ruc' ronojel iwanima', chixe'j iwib chuwäch ri Dios.

²³ Apachique ri quibano, chibana' ruc' ronojel iwanima', je ta ne are quipatanij ri Ajawaxel, man are ta ri winak.

²⁴ Iweta'm c'ut chi ri Ajawaxel cuya' na ri echbal che tojbal iwe, rumal rech chi are' quipatanij ri Crist ri Ajawaxel.

²⁵ Apachin c'u ri cuban ri etzelal cuc'am na ri tojbal re ri etzelal ri cubano. Ri Dios man jalan ta cäril wi jun winak chuwäch jun chic.