Chapletajic 9 - Quiché Bible

U c'ulwächinic ri Dios ruc' ri Noe

¹ Ri Dios xutewichi'j ri Noe xukuje' ri e u c'ojol cuc' tak we tzij ri': “Chec'ol q'ui iwalc'ual, chinojisaj ri uwächulew.

² Conojel ri awaj re ri uwächulew quebirbob na che xe'n ib chiwäch. Conojel awaj ri e c'o pa ri quiakik', pa ri plo, e c'o chuxe' ri i takanic.

³ Cuya' quitij iwe apachique awaj, xukuje' apachique ichaj ri quiwaj, quinjach c'u pa i k'ab.

⁴ C'o c'u jun jasach ri man cuya' taj quitijo: ri ti'j rachil ri u quiq'uel, chupam c'ut ri quic' c'o wi ri c'aslemal.

⁵ In quinch'ojij na chque ri winak chquijujunal, xukuje' chque ri awaj chquijujunal, ri i quiq'uel chijujunal. Quinch'ojij na chque ri winak chquijujunal ri u c'aslemal ri rajil u tz'akat.”

⁶ “We c'o jun cucämisaj jun winak, jun winak chic cacämisan na ri are', ri winak c'ut xwinak'irisaxic che ri u banic ri u ca'yebal ri Dios.

⁷ Are c'u ri ix, ¡chec'ol q'ui iwalc'ual chinojisaj ri uwächulew cumal!”

⁸ Xubij chi c'u ri Dios che ri Noe, xukuje' chque ri u c'ojol:

⁹ “Chiwilampe', quinjekeba' ri nu c'ulwächinic iwuc' xukuje' cuc' tak ri e iwija'lil.

¹⁰ Xukuje' cuc' conojel ri awaj ri e c'o iwuc' ri xebel ulok pa ri jucub: ri chicop ri c'o qui xic', ri awaj ri e aj uwo ja, ri juyubal tak awaj, xukuje' cuc' conojel awaj re ri uwächulew.

¹¹ Ri nu c'ulwächinic iwuc' ix man cäq'uextaj ta na: man quinsach ta chquiwäch ri winak, xukuje' ri awaj ruc' jun k'ekal jäb. Mawi jumul cuban ta chic jun k'ekal jäb ri cusach ta chi u wäch ri uwächulew.

¹² Are wa' ri retal ri nu c'ulwächinic ri xa jumul quinban iwuc', xukuje' cuc' conojel awaj:

¹³ Nu cojom ri nu räxquiak'ab pa ri sutz', cajwataj c'u na jacha' che retal ri c'ulwächinic ri quinban ruc' ri uwächulew.

¹⁴ Aretak quintak ulok sutz', puwi' ri ulew, cäc'utun ri nu räxquiak'ab pa ri sutz'.

¹⁵ Cänataj c'u ri c'ulwächinic ri nu banom iwuc' xukuje' cuc' conojel ri awaj, man cäpe ta chi c'u na jun k'ekal jäb che u sachic i wäch.

¹⁶ Aretak ri räxquiak'ab c'o pa tak ri sutz', ri in quinwil na cänataj c'u ri c'ulwächinic ri xa jumul nu banom ruc' ronojel winak, xukuje' ruc' ronojel awaj ri c'o cho ri uwächulew.

¹⁷ Are wa' ri retal ri c'ulwächinic ri nu jekebam, ruc' ronojel winak xukuje' awaj waral cho ri uwächulew.” Jewa' ri tzijobenic xuban ri ruc' ri Noe.

Ri Noe e rachil ri u c'ojol

¹⁸ Ri Sem, ri Cam, xukuje' ri Japet, e are wa' ri u c'ojol ri Noe ri xebel ulok pa ri jucub. Ri u tat ri Canaan are' ri Cam.

¹⁹ E are' tak wa' ri e u c'ojol ri Noe, cumal c'ut ri e rija'lil xpok'colij chi jumul ri uwächulew.

²⁰ Ri Noe xux ajticonijel, are' ri nabe ri xticow uva.

²¹ C'o jun k'ij ri Noe xutij ri u wa'l uva, xk'abar c'ut. Xtzakic, xch'ani c'ut pa u niq'uiajil ri u lic'om rachoch.

²² Aretak ri Cam, ri u tat ri Canaan, xrilo chi ch'anal ri Noe ri u tat, xel bic, xbe che u bixic chque ri quieb rachalal.

²³ Are c'u ri Sem xukuje' ri Japet xquic'am jun atz'iak xquiq'uiak chquij ri kas qui teleb che u ch'ukic ri qui tat. Rech man cäquil taj chi ch'analic, xa chquij xebinic xebec, chquiwäch c'u xeca'y wi.

²⁴ Aretak xoc'ow ri u k'abaric, ri Noe xretamaj c'ut ri xban che rumal ri Cam ri ch'i'p u c'ojol,

²⁵ ri Noe xubij che: “¡Chc'okox na ri Canaan! ¡Cux na lok'om pataninel ri man nim ta u k'ij chque ri e rachalal!”

²⁶ Xubij chi c'ut: “Chi ri Ajawaxel ri nu Dios chtewichi'n ri Sem, are' c'u ri Canaan chux u lok'om pataninel.

²⁷ Chnimarisax u k'ij ri Japet rumal ri Dios; chjekel pa tak ri rachoch ri Sem, chcoj c'ut ri Canaan che u lok'om pataninel.”

²⁸ Ri Noe xc'asi' na oxib sient ruc' cawinak lajuj junab (350) aretak oc'owinak chic ri k'ekal jäb,

²⁹ belejeb sient ruc' cawinak lajuj (950) u junab ri Noe aretak xcämic.