Chapletajic 8 - Quiché Bible

Xpacun ri k'ekal jäb

¹ Xnataj ri Noe che ri Dios xukuje' xenataj conojel ri awaj che ri e c'o ruc' ri Noe pa ri jucub. Xutak ulok jun quiakik' puwi' ri uwächulew, nojim xbutzajic ri ja';

² xetz'apitaj ri jul pa ri ulew ri quel wi ulok ri nimalaj plo, xukuje' ri quebel wi ulok ri ja' cho ri caj. Xtani' c'u ri jäb,

³ nojim xbutzajic ri ja'. Chuq'uisbal ri jun sient ruc' cawinak lajuj (150) k'ij, ri ja' xbutzajic,

⁴ pa ri uwuklajuj (17) rajilabal ri uwuk ic', xcanaj c'u can ri jucub puwi' ri juyub Ararat.

⁵ Xutakej c'u u tzajic ri ja', pa ri nabe k'ij re ri ulajuj ic', quek'alajin chic ri nimak tak juyub.

⁶ Aretak oc'owinak chic cawinak (40) k'ij, ri Noe xujak ri u wenta'n ri jucub ri u banom,

⁷ xutzokopij c'u bic jun joj; are c'u ri joj cärapapic cäbe jeri' cäbe jela', reyem chi cächaki'jar ri uwächulew.

⁸ Aretak u tzokopim chic ri joj, xutzokopij chic jun palomax che rilic we chaki'j chic ri uwächulew;

⁹ ri palomax man xurik taj jawije' xtaq'ui' wi xtzelej chi c'u jumul pa ri jucub, c'ä ch'ukutal c'u ri uwächulew rumal ri ja'. Ri Noe xresaj ulok ri u k'ab xuchap ri palomax, xucoj bic ruc' pa ri jucub.

¹⁰ Xreyej chi na wukub k'ij ri Noe, xutzokopij chi c'u jumul ri palomax.

¹¹ Xa jubik' man coc ri ak'ab aretak xtzelej ri palomax pa ri jucub, ruc'am jun alaj u k'ab aseitun ruc' ri u tza'm. Jeri' ri Noe xretamaj chi cätajin cäbe u chaki'jaric ri ulew.

¹² Xreyej chi na wukub k'ij c'ä te' ri' xutak, chi bic jumul ri palomax; man xtzelej ta chi c'ut ri palomax.

¹³ Pa ri nabe k'ij re ri nabe ic', aretak c'o chic wakib sient ruc' jun (601) u junab ri Noe, xchaki'jar ri uwächulew. Ri Noe xresaj ri u wi' ri jucub, xrilo chi chaki'j chic ri ulew.

¹⁴ Pa ri juwinak wukub (27) rajilabal ri ucab ic', sibalaj chaki'j chic ri ulew.

¹⁵ Xubij ri Dios che ri Noe:

¹⁶ “Chixel ulok pa ri jucub ri at, ri awixokil, ri e a c'ojol, ri e awalib.

¹⁷ Xukuje' chebawesaj bic ri awaj ri e c'o awuc': ri chicop ri c'o qui xic', ri awaj ri e aj uwo ja, xukuje' ri awaj ri cäquijururej tak quib puwi' ri ulew, cheboj pa ronojel c'olbal, chepok'ok c'ut cheq'uiyir cho ronojel ri uwächulew.”

¹⁸ Xel c'u ulok ri Noe pa ri jucub rachil ri rixokil, ri e u c'ojol xukuje' ri e ralib.

¹⁹ Xukuje' xebel ulok conojel ri awaj ri e aj uwo ja, xukuje' ri e juyubal tak awaj, ri awaj ri cäquijururej quib, xukuje' ri chicop ri c'o qui xic'.

²⁰ Xuban c'ut ri Noe jun porobal ri che u ya'ic u k'ij ri Ajawaxel. Xebuc'am awaj xukuje' chicop ri c'o qui xic' ri e ch'ajch'oj jujun che jujun qui wäch, xebuporoj che tabal tok'ob ri quechajirisaxic chuwäch ri Ajawaxel.

²¹ Aretak xopan ri c'oc'alaj ruxlab ri tabal tok'ob chuwäch ri Ajawaxel, xubij: “Mawi jumul quinc'okoj ta chic ri ulew u mac rech ri winak, kas c'u pa ri rac'alal ulok ri winak xuwi cuchomaj ri man utz taj. Xukuje' mawi jumul quinsach chic qui wäch conojel ri awaj, jas ri nu banom.”

²² “Joropa' k'ij ri cäjeki' ri uwächulew, kas amak'el c'o wi ticonijic xukuje' wächinic; cuban na k'ak', cuban na tew, cuban na k'alaj, cuban na sak'ij, cuban na pa k'ij, cuban na chak'ab.”