Chapletajic 5 - Quiché Bible

Ri e rija'lil ri Adan

¹ E are wa' ri cajilabal ri e rija'lil ri Adan. Aretak ri Dios xebuban ri winak, xuwinakirisaj jas ri u ca'yebal ri Dios;

² chi achi, chi ixok xebuwinakirisaj xuya' ri u tewichibal paquiwi'. Pa ri k'ij ri xewinakirisaxic, ri Dios xubij: “Winak caquibinaj na.”

³ Ri Adan jun sient ruc' juwinak lajuj (130) u junab aretak xalax ri u c'ojol ri sibalaj junam cäca'y ruc', ri xucoj Set che u bi'.

⁴ Xc'asi' chi c'u na wajxakib sient (800) junab ri Adan. Xebalax chi na niq'uiaj u c'ojol, xukuje' niq'uiaj u mia'l;

⁵ belejeb sient ruc' juwinak lajuj (930) junab xc'asi' ri Adan. Je u junab wa' xcämic.

⁶ Ri Set jun sient ruc' job (105) u junab aretak xalax ri Enos ri u c'ojol.

⁷ Xc'asi' chi c'u na wajxakib sient ruc' wukub (807) junab ri Set. Xebalax chi na niq'uiaj u c'ojol, xukuje' niq'uiaj u mia'l;

⁸ belejeb sient ruc' cablajuj (912) junab xc'asi' ri Set. Je u junab wa' xcämic.

⁹ Jumuch' lajuj (90) u junab ri Enos aretak xalax ri Cainan ri u c'ojol.

¹⁰ Xc'asi' chi c'u na wajxakib sient ruc' olajuj (815) junab ri Enos. Xebalax chi na niq'uiaj u c'ojol, xukuje' niq'uiaj u mia'l;

¹¹ belejeb sient ruc' job (905) junab xc'asi' ri Enos. Je u junab wa' xcämic.

¹² Oxc'al lajuj (70) u junab ri Cainan aretak xalax ri Mahalaleel ri u c'ojol.

¹³ Xc'asi' chi c'u na wajxakib sient ruc' cawinak (840) junab ri Cainan. Xebalax chi na niq'uiaj u c'ojol, xukuje' niq'uiaj u mia'l;

¹⁴ belejeb sient ruc' lajuj (910) junab xc'asi' ri Cainan. Je u junab wa' xcämic.

¹⁵ Oxc'al job (65) u junab ri Mahalaleel aretak xalax ri Jared ri u c'ojol.

¹⁶ Xc'asi' chi c'u na wajxakib sient ruc' juwinak lajuj (830) junab ri Mahalaleel. Xebalax chi na niq'uiaj u c'ojol, xukuje' niq'uiaj u mia'l;

¹⁷ wajxakib sient ruc' jumuch' olajuj (895) junab xc'asi' ri Mahalaleel. Je u junab wa' xcämic.

¹⁸ Jun sient ruc' oxc'al quieb (162) u junab ri Jared aretak xalax ri Enoc ri u c'ojol.

¹⁹ Xc'asi' chi c'u na wajxakib sient (800) junab ri Jared. Xebalax chi na niq'uiaj u c'ojol, xukuje' niq'uiaj u mia'l;

²⁰ belejeb sient ruc' oxc'al quieb (962) junab xc'asi' ri Jared. Je u junab wa' xcämic.

²¹ Oxc'al job (65) u junab ri Enoc aretak xalax ri Matusalen ri u c'ojol.

²² Ri Enoc xniman che ri Dios pa ronojel ri u c'aslemal. Xc'asi' chi c'u na oxib sient (300) junab. Xebalax chi na niq'uiaj u c'ojol, xukuje' niq'uiaj u mia'l;

²³ oxib sient ruc' oxc'al job (365) junab xc'asi' ri Enoc.

²⁴ Ri Enoc xak xsachic, xc'am bic rumal ri Dios rumal rech chi xniman che ri Dios pa ronojel ri u c'aslemal.

²⁵ Jun sient ruc' jumuch' wukub (187) u junab ri Matusalen aretak xalax ri Lamec ri u c'ojol.

²⁶ Xc'asi' chi c'u na wukub sient ruc' jumuch' quieb (782) junab ri Matusalen. Xebalax chi na niq'uiaj u c'ojol, xukuje' niq'uiaj u mia'l;

²⁷ belejeb sient ruc' oxc'al belejeb (969) junab xc'asi' ri Matusalen. Je u junab wa' xcämic.

²⁸ Jun sient jumuch' quieb (182) u junab ri Lamec aretak xalax jun u c'ojol,

²⁹ ri xucoj Noe che u bi', xubij c'ut: “Ri Ajawaxel xuc'okoj ri ulew, sibalaj c'u c'ax cäkarik che u josk'ixic; cujuto' c'u na we ac'al ri' rech cujuxlanic.”

³⁰ Chwi' ri ralc'ualaxic ri Noe, xc'asi' chi na job sient ruc' jumuch' olajuj (595) junab ri Lamec. Xebalax chi na niq'uiaj u c'ojol, xukuje' niq'uiaj u mia'l;

³¹ wukub sient ruc' oxc'al wuklajuj (777) junab xc'asi' ri Lamec. Je u junab wa' xcämic.

³² Job sient (500) chic u junab ri Noe aretak xebalax ri Sem, Cam, Japet ri e u c'ojol.