Chapletajic 46 - Quiché Bible

Ri Jacob cäbe pa Ejipt

¹ Ri Israel xutakej ri u be ruc' ronojel ri c'o ruc'. Aretak xopan pa Beerseb, xucoj tabal tok'ob chuwäch ri u Dios ri Isaac ri u tat.

² Pa ri chak'ab ri' ri Dios xuch'abej ri Israel pa jun c'utwächinic, xucoj ri u bi' che u siq'uixic, Jacob, ri are' xutzelej u bixic: “In c'o waral.”

³ Ri Dios xubij che ri Jacob: “In ri' ri Dios, ri u Dios ri a tat. Maxe'j awib che ri a benic pa Ejipt, quinban c'u na chi ri e awija'lil quebux na jun nim tinimit ri nim u k'ij.

⁴ Ri in quinbe na awuc' pa Ejipt, kas c'u in quebenwesaj na ulok ri e awija'lil chila'. Aretak c'u catcämic cäc'oji' na ri Jose chaxcut.”

⁵ Xel c'u bic ri Jacob pa Beerseb. Ri e u c'ojol ri Israel xquiya' ri qui tat xukuje' tak ri alc'ualaxelab xukuje' tak ri quixokil chquipam tak ri cäret ri xebutak ulok ri ajawinel che qui c'amic bic.

⁶ Ri Jacob xukuje' conojel ri e rech xbe pa Ejipt, xequic'am bic ri qui wacax, ri qui chij, xukuje' ronojel ri jastak quech ri c'olic.

⁷ Conojel tak ri e u c'ojol, conojel ri e u mia'l, xukuje' ri e ri' u mam chi alabom chi alitomab, conojel xebuc'am bic.

⁸ E are tak wa' ri qui bi' ri aj israelib ri xebe pa Ejipt; ri u bixic wa', ri Jacob xukuje' ri e rija'lil: Ri Ruben ri nabeal u c'ojol ri Jacob.

⁹ Ri e u c'ojol ri Ruben: ri Hanoc, ri Palu, ri Hezron, ri Carmi.

¹⁰ Ri e u c'ojol ri Simeon: ri Jemuel, ri Jamin, ri Ohad, ri Jaquin, ri Zohar xukuje' ri Saul, ri ral jun ixok aj cananey.

¹¹ Ri e u c'ojol ri Levi: ri Jerson, ri Coat, ri Merar.

¹² Ri e u c'ojol ri Juda: ri Er, ri Onan, ri Sel, ri Pares, ri Zar; ri Er xukuje' ri Onan xecäm can pa Canaan. Ri e u c'ojol ri Pares e are ri Hezron, ri Hamul.

¹³ Ri e u c'ojol ri Isacar: ri Tola, ri Pu, ri Job, ri Simron.

¹⁴ Ri e u c'ojol ri Zabulon: ri Sered, ri Elon, ri Jaleel.

¹⁵ E are' alc'ualaxelab wa' ri xebuya' ri Lea che ri Jacob aretak e c'o pa Padan-aram, c'o c'u wi na ri' ri Din ri ral ali. Conojel ri e rija'lil e juwinak oxlajuj (33) winak, chi achijab chi ixokib.

¹⁶ Ri e u c'ojol ri Gad: ri Zipion, ri Hagui, ri Ezbon, ri Sun, ri Er, ri Arodi, ri Arel.

¹⁷ Ri e u c'ojol ri Aser: ri Imna, ri Isu, ri Isuy, ri Beriy, xukuje' ri canab ri Ser u bi'. Ri e u c'ojol ri Beriy: ri Heber xukuje' ri Malquiel.

¹⁸ E are' alc'ualaxelab wa' ri xebuya' ri Zilp che ri Jacob. Ri are' u lok'om pataninel ri Laban ri xusipaj che ri Lea ri u mia'l, e are' tak c'ut ri e rija'lil e waklajuj (16) winak chi conojel.

¹⁹ Ri e u c'ojol ri Jacob ri xeralaj ri Raquel, e are wa': ri Jose xukuje' ri Benjamin.

²⁰ Ri e u c'ojol ri Jose ri xeralaj ri Asenat, e are wa': ri Manases, ri Eprain, ri xil qui wäch pa Ejipt. Ri Asenat u mia'l ri Potiper ri cojol tabal tok'ob pa On.

²¹ Ri e u c'ojol ri Benjamin: ri Bela, ri Bequer, ri Asbel, ri Jer, ri Naaman, ri Ehi, ri Ros, ri Mupim, ri Hupim xukuje' ri Ard.

²² E are tak wa' ri e rija'lil ri Raquel xukuje' ri Jacob, e cajlajuj (14) winak chi conojel.

²³ Ri u c'ojol ri Dan: ri Husim.

²⁴ Ri e u c'ojol ri Neptali: ri Jazeel, ri Gun, ri Jezer, ri Silem.

²⁵ E are' alc'ualaxelab wa' ri xebuya' ri Bil che ri Jacob. Ri are' u lok'om pataninel ri Laban ri xusipaj che ri Raquel ri u mia'l, e are' tak c'ut ri e rija'lil e wukub (7) chi conojel.

²⁶ Conojel ri e rachalaxic ri Jacob ri xebopan junam ruc' pa Ejipt, e oxc'al wakib (66); man xebajilax ta c'u ri quixokil ri e u c'ojol.

²⁷ Ri e u c'ojol ri Jose ri xil qui wäch pa Ejipt e quieb. Conojel ri e rachalaxic ri Jacob ri xebopan pa Ejipt e oxc'al lajuj (70).

²⁸ Ri Jacob xubij che ri Juda chi cänabej che u bixic che ri Jose rech cäpe che u c'ulaxic pa Gosen. Aretak opanem cuban pa Gosen,

²⁹ ri Jose xtakan che u suc'umaxic ri u carwaj rech cäbe che u c'ulaxic ri u tat. Aretak xril u wäch ri u tat, xulak'apuj, sibalaj xok'ic.

³⁰ Ri Israel xubij che ri Jose: “¡Chincäm chi ba' wi, xinwetamaj c'ut chi at c'aslic!”

³¹ Ri Jose xubij chque ri rachalal xukuje' chque conojel ri rachalaxic ri u tat: “Quinbe ruc' ri ajawinel, quinya' u bixic che chi ri e wachalal xukuje' ri rachalaxic ri nu tat ri e c'o pa Canaan, e ulinak wuc' che qui canajic waral;

³² e qui c'amom c'u ulok ri qui chij, ri qui wacax, xukuje' ri jastak quech, quinbij che chi ri i chac are ri qui yuk'uxic chij xukuje' niq'uiaj awaj chic.

³³ Aretak c'u chixusiq'uij ri ajawinel che u c'otic i chi' jas ri i chac,

³⁴ quibij che chi ix ticol tak chij xukuje' wacax jacha' ri e i mam. Jeri' quixcuinic quixcanaj canok pa ri ulew Gosen, rumal rech chi man cäya' ta c'olbal chque ri aj ejiptib chi quejeki' cuc' ri ajyuk' tak chij.”